IRPHUTNA 41

Josefa’n Faroa irmang a hrilfiana

1Khanchu kum hni zoia chu, Faroa’n irmang a phana; Nail vadung kôla hin a oma. 2Sehrâtpui sari satak le mar tak tak, tuidung ata an hong suaka, phâiruanghai fâkin an oma. 3Khanchu sehrâtpui dang sari, kông tak tak, le por derdurin an hong suak nôka, tui ata kha sehrât danghai leh khan phâiruang bila hmun khatin an lêng suama, 4khan sehrât kông le por derdurhai khan a sa le a marhai kha an fâkpaihaia, khanchu a hong har tâka. 5A hong zâl nôka, irmang a phan nôka; bu kung khata hin a vûi sari lianpapa le ra satak takin a vûi om a hmua, 6kha irzoiin chu a vûi sari nei phâivua isêm inrîl thei pai anga chînte te an hong suak nôka, 7khan a vûi chîntehai khan, a vûi lian le sahai kha an involpaihai vinga. Khanchu Faroa a hong hara, e! ki’rmang kêng a ni hi teh a tia. 8#Dan 2.2 Zîng khua a hong vâra, Faroa chu a char an dong oka, khanchu Aigupta ram sûnga mitphil, dôithei, mi vârhai zong hrangin mi a tîra; khan Faroa’n a hril pehaia, khannisianlân tûte’n a hrilfia pe thei om mahaia.

9Kha lai takin, uain pêktupa khan Faroa kuang khan, “A vuan hin ki sual kin hriatsuak ta. 10Faroa’n a suakhai chunga a ning an mura, khasikin kei le bai siamtupa chu intângna in hruaitupa kuanga intângna ina ikhumin kin oma; 11zân khat chu kin ruaiin irmang kin phana, a dadang a nia; 12khanchu kha kin omna hmuna khan hruaitu inkhat, Hebrai ruathartepa a oma, kin irmanghai kin hrila, ama’n kin irmang omlam angin a ni hrilfia pea. 13Khanchu atûn hin ama ni ihrilfia pe lam angin a hong idik a ni; kei chu ki sin ki tho nôka, bai siamtupa chu inkhâi thatin a om ta a ni,” a tia. 14Khanchu Faroa khan Josefa kha a van koitirhaia, irhnot takin irkhumna in ata an hong hruaia, tui mei tôn zoiin, a tukrivohai thûlin, Faroa makunga a hong lûta. 15Khanchu Faroa khan Josefa kuang, “Irmang ki neia tûte a hrilfia thei om mahai, nangin irmang thu nin hriata ni hrilfia pehai thei tih mi insîr kin hriata,” a tia. 16Josefa’n, “Kha thu kha chu keima inhriat ni maka, Pathianin Faroa chu lungngam takin nang sâm ri se,” a tia.

17Faroa’n Josefa kuang, “Irngai ro, ki’rmang tiang hin tui kôla ki lei oma. 18Sehrâtpui sari satak tak, le mar tak tak an hong suaka, phâiruang bila an honga; 19khan sehrâtpui sari dang, kông tak tak, por derdur an hong suak nôka, hianga kông sehrât hi Aigupta rama zel hin la om ngai mahai a ni. 20Sehrâtpui sari satak tak le marhai kha an fâkpaihai vinga. 21an fâk zoihai khomin khop loiin an fâk lua’n irbe loiin an la kông le an la por maia, khanchu ki hong hara. 22Voihnina chu bukung khata hin a vûi sari satak tak a sate zela tak an hong vûi suaka, 23kha zoiin chu, khaang dênin buvûi sari chîn tete phâivua isêm insiatpai hlet dôr an hong suak nôka. 24Khanchu buvûi sari chîntehai hin a vûi lian le sahai kha an involpaihaiin ki hmua; mi thiam mi vârhai ki hrilhaia, tûte’n a ni hrilfia pe thei om mahai,” tiin a hrila.

25Khanchu Josefa’n Faroa kuanga khan, “Faroa ni’rmang hi hmunkhat kêng a ini. Pathianin a itho lat hrang tak hi kêng nang a inhriattir a ni ta. 26Sehrâtpui satak tak le marhai chu kum sari a nia; a vûi sari satak takhai khom kha kum sari a nia; khasikin ni’rmang hi hmunkhat a ni. 27Sehrâtpui kông tak tak, le por derdur mar thei loihai khom kha kum sari a nia, a vûi sarihai leh hmunkhat a ni. Kha kha chu châm tâk hrang kum sari a ni. 28Hi kêng hi Faroa kuanga ki ihril Pathianin a itho lat hrang hi Faroa a inhriattirna a ni. 29Irngai ro, Aigupta rama hin irchongnain kum sari sûng om a ta. 30Kha zoiin chu châm tâk kum sari la hong om a ti, khanchu Aigupta rama irchongnahai hi irzukin châmin a ram hi a ifâk irhmang hrang a ni. 31Irchongna hi a zuitu châm tâk sikin, hi ram hin a sate’n a la intak hrang a ni,” a tia. 32Khanchu Faroa irmang voihni a iphan nasan chu, a tak takin zoro sôtloitea a hong hrang sika a ni.

33Khasikin Faroa’n “Mi inkhat mi vâr le mi bengvâr tak Aigupta rama hin inthang sianlân; hruaitu inchangtir ro, a tia. 34Faroa khan hiang hin tho sianlân, hruaitu inthang sianlân, hi irchongna kum, kum sari sûnga hin bu hmun ringa semin hmunkhat chu bukkhôm sianlân, 35khanchu hruaituhai khan kha buhai kha lâk khômin Faroa ina buk khômin enkolhai sian. 36Khanchu châm kum sari a tâk tena mipuihai nêk hrangin le’rsiam ta ri se,” a tia.

Josefa Aigupta rama hruaitu nina a chang

37Khanchu, kha thu kha Faroa le a sinthotuhai khomin a dik tiin an poma, 38khanchu Faroa’n a sinthotuhai kuang khan, “Hianga Pathian irtha iompui mi hi mo hmusuak thei ni ni?” a tia. 39Faroa khan Josefa kuang, “Pathianin hihai murdi hi nang a inhriattir sikin, nangma anga mi bengvâr le thiam hi om mahai: 40#Tîr 7.10 nangma ngêt kêng ki in sûngkuahai chunga hruaitu ni ni ta, ki khua le tui ni ienkol hrang; rêngtoihmuna vai hin kêng keima inlal ki ti,” a tia. 41Khanchu Faroa’n Josefa kuang, “Irngai ro, Aigupta ram sûnga hin hruaituin nang siam nôk ki ta,” a tia. 42#Dan 5.29 Khanchu Faroa kuta kutsabi kha lâkin Josefa a’rbuntira, puanirphân tukrivo pêkin a’rbeltira, a ringa rângachak irthei a’rhlitir ta. 43Khan a sakor inhnina khan an chuangtira; “A matona hin mi tinin chubai mûk roi,” tiin an khêka. Khanchu Aigupta rama hruaitu a ni tâka. 44Khanchu Faroa khan Josefa kuang, “Keima Faroa’n ki ti, nangma thu ni loiin Aigupta rama hin tûte’n an ke an kut irlek thei viat no nihai,” a tia. 45Khanchu Faroa khan Josefa irhming kha Zafenat-panea#41.45: Josefa irhming thar hi ‘Pathian a chong, Pathian a hring’ tihna ni le a’rhoi. a tia: khan Heliopolis khuaa deipu Potifara nâinu Asenathi an luatira. Khanchu Josefa kha suakin Aigupta ram murdi a’rfang phut tâka.

46Josefa chu kum sômthum mi a ni tena hin Aigupta rêng Faroa hnuaia sin a itho a ni ta; Faroa kuang ata suakin kho tina Aigupta ram chu a’rfang suaka, 47khanchu kha rama khan kum sari sûng kha chu bu a vâng intama. 48Kha sûnga bu an ineihai chu a’rfuangtirhaia. Kho sûnga le hmun inchumnahaia an hrêtirhaia. 49Khanchu Josefa’n tep zoi loi rakin tuipuia chiai nêka tamin bu a bukkhôm tâka.

50Khanchu châm tâk mânin Josefa’n nâi inhni a neihaia, Hekopolis deipu nâinu Asenathi ineipui an ni. 51Josefa nâilutîr irhming chu Manasea#41.51: Manasea ti omzia chu “Hebrai chongin intakna irnghiltir” tihna ang a ni. a tia: “Pathianin ki sinthôna ra le ka pa in sûng mihai a ni’rnghiltir zoi tâk sikin,” a tia. 52Khan a nâi inhnina irhming chu Efraima#41.52: Efraima ti omzia chu “Pathianin nâi inneitir” tihna a ni. a tia. “Pathianin dengthei ki tuangna rama irchi a ni pêk tâk sikin,” a tia. 53Khan kum sari irchongna kum chu a hong hek tâka, 54#Tîr 7.11 châm tâkna kum sari chu, Josefa ihril angin a hong tung irphuta: ram tina châm a tâk tâka; Aigupta rama vai hin fâk nêk hrang a la omsun a nia. 55#Joh 2.5 Aigupta rama mihai khan fâk hrang an boiin chu Faroa kuang fâk hrang zongin an va khêk ngaia, khanchu Faroa’n a mihai chu “Josefa kuang fe unglân; tho roi a iti murdi chu tho ngai unglân,” a tia. 56Khanchu a sate’n châm a tâka Aigupta rama khan, a bu siana in chu an honga, bu kha zuarin a semhaia. 57Irnêng chunga hmun tina a sate’n an châm sikin Aigupta rama Josefa kuanga mi hongin bu an hong izong ngai a ni.

Currently Selected:

IRPHUTNA 41: HRACLBSI

Highlight

Copy