IRPHUTNA 39

Josefa le Potifara dôngma

1Khanchu Josefa chu Aigupta rama an hruaia: Faroa hnuaia hruaitu inkhat, a enkolhai chunga hruaitu, Aigupta mi Potifara’n Ismaela hai kuang ata a le’rchôka. 2#Tîr 7.9 Khan Rengpa chu Josefa kuanga omin, Josefa chu vânnei tak a nia. Aigupta mi ina omin, 3khan a pu khan, Rengpa’n a ompuia, a sinthônahai hi Rengpa’n hlochukna a pêk ti an hriat suaka. 4Khanchu Josefa chu a pu mit a tung tak taka; khanchu a in sûngkua tena hruaitu nitna khom iam zoiin a pêka, a inei murdi a kut chunga a sia zita. 5Khanchu hiang hin Rengpa’n satvurna changin Josefa sikin Aigupta in sûng mihai chu an in le loi, neinun sampârhai chunga Rengpa’n sat a vur ual uala. 6Khanchu a inei murdi chu Josefa kuta a sia vinga, a kuanga irchon om murdi chu a pu’n inhrepui loiin a kuta a pêk hleta, a bu nêk hrang ti no kai chu. Khan, Josefa chu mi hmêl sa le nunhoi tak a nia. 7Kha zoi chu hiang hi a nia; a pu dôngma’n Josefa chu an dita; sûn khat chu, “Ni zâlpui ro,” a tia. 8Ama’n chu, a pu dôngma zâlpui hrang khan nuam maka, “Irngai ro, ka pu’n hi ina hin, ki kuang neinun omhai chunga ircham neina ni pêka ama’n ite nin hrepui maka, 9hi ina hin keima nêka irchamnei tûte om mahaia; a dôngma ni ni sikin nangma ti no chu ki kuanga hin ite inhroi maka; khasikin itin mo hi sual liantak hi sinin Pathian chunga sin ki insiat thei hrang?” a tia. 10Khanchu sûn tin zân tin hmunkhat hmârkhata ompuiin, a chongpui khomin ama zâlpui hrang rêng rêng tum viat maka.

11Khaanga sintho hrangin in sûnga a va lûta; kha ni khan in sûnga tûte mi dang om mahaia. 12Khanchu a pi khan, “Ni zâlpui ro,” tiin a songkol a lei chel pea: khanchu a songkol mâksanin an tâna, a suaksana. 13Khanchu a pi kuta a songkol mâksanin an tân tah ti an hriatin chu, 14a ina omhai chu a koihaia; “En roi hi, mualphoi ni sak hrangin Hebrai mi inkhat a hong lûta, ni zâlpui hrang tiin, irhâi inringtakin ki ikhêk a ni hi. 15Irhâi ki phoi pea ki khêkkhum tena chu hi a songkol mâksanin an tân ta,” a tia. 16Khan Josefa pu hong mâka chu a songkol a lei dôn chiana, 17khanchu hiang hin kêng a ni tah ti thu a hrila, “Hebrai mi ei kuanga sintho hranga ni hong ihruai khan, mualphoi ni sak hrangin ki omna a hong lûta. 18Khan hiang hin a nia, irhâi inringin ki khêk pe tena kêng a chi’n a ni intânsan; hi a songkol mâksanin a om rak ta,” a tia.

19Khanchu hiang hin a nia, Josefa pu khan a dôngma’n “Ni sinthotuin,” hiang hin a ni ilo lam a nih ti a hril an hriatin chu, a ning a sate’n an mur pea. 20Khanchu Josefa pu khan a hruaia intângna ina a khuma, khanchu kha intângna ina khan a om tâka. 21#Tîr 7.9 Khannisianlân Rengpa chu Josefa kuang khan a om maia, intângna in nghâktuhai khom an rentirhaia; 22khan, intângna in nghâktu khan, intângna ina om tuhai chunga hruaitu’n an siaa; khanchu an itho murdi kha Josefa itho a hong ni tâka. 23Rengpa chu Josefa kuanga a oma, a sintho murdi Rengpa’n hlo an chuktir pe sikin; intângna in enkoltu khan Josefa kuta thil om kha ite a nangna om pe ta maka.

Currently Selected:

IRPHUTNA 39: HRACLBSI

Highlight

Copy