IRPHUTNA 16

Hagari le Ismaela

1Khan Abrama dôngma Saraii khan chu nâi a neipui no sikin: Saraii khan Aigupta mi suaknu inkhat an idôn a oma, a’rhming chu Hagari a ni. 2Khan, Saraii khan Abrama kuang, “Irngai ro duah, Rengpa’n nâi a ni pêk no sikin, irngaihoi takin ki suaknu irpôlpui ro; ama ata nâi ki nei khomin a sa,” a tia. Khanchu Abrama’n Saraii thu chu a zôma. 3Khanchu Abrama dôngma Saraii khan Abrama chu Kanaan rama kum 10 a om hnungin a suaknu Hagari chu a hruaia; a pasal Abrama kuanga a dôngma hrangin a pêka. 4Khan, Hagari kha a’rpôlpuia; an râia, khan an râi ti a’rhriatin chu a pi kha a theimâk tâka.

5Khanchu Saraii khan Abrama kuang, “Ki thil tuang hi nangin a mô pêl ro: ki suaknu chu nangma ompui hrang ki tia, an râi ti a’rhriatin chu a ni theimâka; Rengpa’n nang le keima kâr hi ngaitua ta ri se,” a tia. 6Abrama’n Saraii kuanga khan, “Irngai ro, ni suaknu chu ni kuta om kêng a ini, a sa ni iti lam takin lo ta ro,” a tia. Khanchu Saraii khan deng an theitira, a rotsan tâka. 7Khan Rengpa vântîrtônin tâng chârna tuikuang kôla Sur khua panna lama a lei hmua; 8“Hagari, Saraii suaknu, khô rengata ni ihong mo, khôna fe hrang mo ni ni?” a tia. Khan, ama’n, “Ka pi Saraii kuang ata ki hong irot a ni,” a tia.

9Khan Rengpa vântîrtônin a kuang, “Ni pi kuang fe nôkin lân, a thu thuin om ro,” a tia. 10Vântîrtôn ngêtin a kuang, “Ni’rchi chu tep zoiloi rakin nang la’ntam pe ki ti,” a ti pe nôka. 11Vântîrtônin a kuang, “Irngai ro, nâi ni vong ta, nâipasal nei ni ta; Pathianin ni dengthei lam an hriat tâk sikin, a’rhming khom Ismaela#16.11: Ismaela ti chu Hebraiin “Pathianin an hriat” tihna nih a ti. ni iphua hrang a ni. 12Ama chu mihriam laia om loiin ram sakuartung angin; mi murdi doi a ta, mi tinin ama khom doi an ti; a urênghai leh khom omsuam no nihai,” a ti pe nôka.

13Khan Hagari chu a chongpuitu Rengpa irhming chu, “Nang hi hmutheitu Pathian ni ni,” tiin a bêa, “Hi zel hin a ni hmutu ki ien zuiloi hrang mo?” a’rtia. 14Khasikin kêng tuisunsuak chu Beer-lahai-roi, iti a ni. “Tuisunsuak hring hmutu a ni,” Kades le Bered khua kâra om a ni. 15#Gal 4.22 Khan Hagari’n Abrama kha nâipasal a neipuia; khan Abrama’n Hagari leh an nâi chu a’rhming Ismaela a phuaa. 16Khan Hagari’n Abrama nâi a nei lai hin Abrama chu kum 86 mi a ni.

Currently Selected:

IRPHUTNA 16: HRACLBSI

Highlight

Copy