IRPHUTNA 14

Abrama’n Lota a sansuak

1Khan Sinar khuaa rêng Amrafela hai, Elasar khuaa rêng Arioka hai, Elam khua rêng Kedorlaomera hai, Goiim khua rêng Tidala hai dam lai khan hiang hi a nia, 2anni’n chu Sodom khuaa rêng Bera kha an doia, Gomora khuaa rêng Birsa hai, Adma khuaa rêng Sinaba hai, Zeboim khuaa rêng Semebera hai, Bela khuaa rênghai kha an doia. (Bela khua chu Zoar khua a ni ta.) 3Khahai murdi kha Sidim hual sûnga khan an irsan irhlôma (hi hual sûng hi Tuipui Al a ni.) 4Kum sômhleihni sûng chu Kedorlaomera hnuaia an oma, a kum sômhleithum changna’n chu an hong tehel an zong tâka. 5Khanchu kum sômhlei minlina’n chu Kedorlaomera le a kôla rêng omhai an honga, Asterot-Karnaim rama Refa-hai, Ham rama Zuzim-hai, Seva-kiriathaim rama Enim-hai leh 6ramchâr kôla om El-paran dung, Seir tângrama om Hor-hai dênin an hong inhnêhaia. 7Khanchu an kîr nôka En-mispat an tunga, (hi hi chu Kades a ni ta) Amalek rama mi murdi le Amor-hai Zazon-tamar khuaa omhai khom kha an thathai nôka.

8Khanchu Sodom khuaa rênghai Gomora khuaa rênghai, Adma khuaa rênghai, Zeboim khuaa rênghai, Bela khuaa rênghai an suaka, (Bela chu Zoar khua a ni ta.) Khan Sidim hualsûnga khan annihai doi hrangin irnak an lâk irruala, 9Elam khuaa rêng Kedorlaomera hai, Goiim khuaa rêng Tidala hai, Sinar khuaa rêng Amrafela hai, Ellasar khuaa rêng Arioka-hai doi hrangin; rêng minli’n, rêng ringa an doihaia. 10Khan Sidim hual chu âlkatara khuri’n a sipa, khan Sodom le Gomora khuaa rênghai chu an intâna, âlkatara khura khan an tâka, a tâk banhai kha tâng tiang an rota. 11Khanchu Sodom le Gomora khua mi le an sumpuan le fâk nêk omhai an lâka, an fea. 12Lota Abrama sangpa nâi, Sodom khuaa om chu, a sumhai le ama khom lâkin an fe nôk ta.

13Khan mi inkhat hong intân chu a hong lûta, Hebrai mi Abrama kha a hrila: Abrama chu Amor mi Mamre thing irkhang kôla om ngai kha a ni. Mamre chu Eskola sang le Anera sanghai an ni; annihai hi chu Abrama hai leh irkop an ni. 14Abrama’n a nâi kha suak hrangin an hruai ti an hriatin chu, a ina irzira mihriamhai, irchu sai tâk 318 a hruaihaia, Dan khua dênin a’rzûlhai ta. 15Khan zâna chu anni doi hrangin ama le a mihai kha a’rsempuihaia; an thathai ta. Hoba khua dênin an irzûlhaia. (Hoba chu Damaska khua hmâr tianga om a ni.) 16Khan sumpuan murdi chu a hong chôi nôk vinga, a nâi Lota le a sumhai khom, nupanghai khom a hong hruaihai nôka, mi dang om murdihai le.

Melkisedeka’n Abrama sat a vur

17Khan Kedorlaomera le a kôla rêng omhai a thathai zoiin chu Sodom rêng chu Save hualsûnga khan Abrama don hrangin a fea, (Save hual chu rêng hualsûng a ni ta.) 18#Heb 7.1-10 Khan Salem khuaa Rêng Melkisedeka’n bai le uain a lâka, Abrama a pêka. Ama chu Pathian inchungtak a ni. 19Melkisedeka’n Abrama chu sat a vura, “Irnêng le irvân siamtu, Pathian inchungtakin, Abrama chu satvur ri se! 20ni râlhai ni kuta nang pêktu, Pathian inchungtak chu inpâkin om ri se,” a tia. Khan Abrama’n ama kha itinrênga sôma inkhat a pêka. 21Khan Sodom khuaa rêngin Abrama kuang, “Mihriamhai hi ni pe’n lân, sumhai hi chu nangin la ro,” a tia. 22-23Khan, Abrama’n Sodom khuaa rêng kuang khan, “Pat malkhat khom, kekok insuina hruite khom, ni inei ite la no ning, itinrêng irvân neitu Pathian inchungtak makunga ki kut ki iphar a ni ta, anino’nchu, ‘Abrama chu keima irchongtir kêng ni itih hrang mo ni ma’ 24ruathartehai fâk inhek hrang le a ni zuihai mantum ti no chu ite la no ning; Anera hai, Eskola hai, Mamre haiin an mantumhai chu la ri sehai,” a tia.

Currently Selected:

IRPHUTNA 14: HRACLBSI

Highlight

Copy