TÎRTÔNHAI SINTHO 4

Petera le Johana Sanhedrin makunga an ngîr

1Khaanga Petera le Johana’n mipuihai kuang thu an insîr lai khan, Ochaihai kha tempil pulis hruaitupa le Sadukaihai an kuang an honga. 2Jisua thoinôkna thu hrilin mipuihai kha mithi thoinôkna thu an irchutirhai sikin a sân an ning an mur tak taka. 3Khanchu an chelhaia, khohloi tiang a ni sikin a tûk dênin intângna ina an khumhai tâka. 4Khannisianlân, an thu irngaituhai laia tamtakin an iam sa tâka, an tam lam chu pasal ulian ringot khom sângringa vêl an ni.

5A tûka chu Juda hruaituhai, Upahai, Dân irchutirtuhai Jerusalema an inkhôma. 6Kha kha Ochai inlaltak Anna, Kaiafa, Johana, Alexander hai Ochai inlal irchihai leh an inkhôm a ni. 7Petera le Johana kha an laia an inngîrtirhaia, “Itina an indam thei ma ni, tu irhmingin mo hi thil hi nin itho,” tiin an irdonhaia.

8Khanchu Petera kha Irtha Irthiangin a sipa, an kuang, “Mipui hruaituhai le upahaio, 9a vuan hin ke’nbâi indam thua itina indam mo a ini nin ni irdona, 10nangnihai le Israel mi murdi’n inhre ri sehai; Nazaret Jisua Krista, nin ihembe, Pathianin mithi lai ata a ikaithoi tâk irhming khan indam a nia; atûn hin nin makunga dam vangin a ingîr tâk a ni. 11Jisua hi a ni, Pathian Thu bu’n,

‘Ama hi kêng nangni in sintuhaiin nin inuamloi lung nin ipai kha,

a kila lung poimo tak a hong ni ta,’

a tia. #Ipn 118.22

12“Tu dang kuang khom saninhringna om mah, irvân hnuaia mihriam irhming iphua laia ni saninhring thei irhming dang rêng rêng om mahai,” a tia.

13Petera le Johana hai an ihâi lam kha an hmua, lekha thiam no le mi’nmôl mai mai an nih ti an inhriattin, a sân a’rkhêl an tia; Jisua kuanga om ngai an nih ti an inhriat ta. 14Khan, an mi indam, an kuanga ngîr kha an enin ite dem hrang lak om maka. 15Khanchu Sanhedrin ata kha an insuaktirhai zoiin chu an chonga. 16“Hi mihai hi itin mo ei ithohai ta hrang? An sinirkhêl tho hi Jerusalema om murdi’n an inhriat tâk hi; eini khomin ei isêl thei loi hi. 17Aniachu, mi’n an inhriat irzat ual nona hrangin tu kuang khom Jisua irhminga thu’nsîr nôk ta loi hrangin lei insîhai rei,” an tia.

18Khanchu anni kha an koihai nôka, Jisua irhminga thu insîr loi hrangin le irchutirhai ta loi hrangin thu an pêkhaia. 19Khannisianlân, Petera le Johana’n an kuang, “Pathian mithmua, Pathian thu zôm nêkin nangni thu zôm mo a idik ual, ngaitua roi. 20Keini chu thil kin ihmu le kin inhriat hi insîr loiin om thei ma ung,” an tia. 21Khan, anni khan a sate’n an insîhaia, an insuahai tâka. An thiltho sika mi murdi’n Pathian an chôiindôm sikin hremna zoro’nchum an ihmu loi a ni. 22Irkhêl taka an indam kha kum sômminli nêka ulian a ni.

Iamtuhaiin hâina hrangin an chongchai

23Petera hai kha an suaka, an rualhai kuang an va fea, Ochai inlalhai le upahaiin an kuang an insîr kha an hrilhai zita. 24An thu irngaituhai khan irrualin inring takin Pathian an insama, “O inlaltak, Nangma, irvân, irnêng, tuikhanglianhai le a sûnga thil om murdi siamtu ni ni;#Fes 20.11; Neh 9.6; Ipn 146.6 25Nangma’n Irtha Irthiangin kin irchibulhai ni siahlo Davida bâiin hi thu hi nin sîra,

‘Jentailhai ithoa mo an ninginmur?

Mipuiin ithoa mo thil chanlamboi an ingaitua? #Ipn 2.1-2

26Irnêng rênghaiin an irsiam irfôk tâka,

Hruaituhai khom a chungchânga an insîr irhlôma,

Rengpa le a Krista doi hrang,’

tiin. 27“Khaang tak khan hi khuaa hin ni siahlo irthiang, Jisua sahriak ni ipoltu chunga khan, Heroda le Pontia Pilata hai kha Jentailhai, Judahai leh an inthurual tâka.#Mt 27.1-2; Mk 15.1; Lk 23.1,7-11; Joh 18.28-29 28Nangin ni lei inkung anga intungtir ni itum kha, hlo inchuktir hrangin an ipungkhôm a ni. 29Rengpa, atûna an ni ikhap lam hi irngai ta, ni thu hril ngam hrangin ni suakhai hi huaisenna ni pe ro. 30Mihai indam hrangin ni sinthotheina inlangin lân, ni siahlo irthiang Jisua irhmingin irsinsianahai le thilirkhêlhai inthotir sa roh,” an tia.

31Khaanga an chongchai zoiin chu an omkhômna hmun kha a hong inhnînga, an rêngin Irtha Irthiangin an sipa, hâi takin Pathian thu an hril tâka.

Iamtuhaiin thil an irkopirhlôm

32Iamtuhai kha milung hmunkhat le lungrîl hmunkhat irputin an oma, an laia tukhomin an thil neihai kha ‘Ki ta bîk a ni,’ ti mahai; itinrêng an irkopirhlôm ta.#Tîr 2.44-45 33tîrtônhai khan a sinthotheina lian tak neiin Rengpa Jisua thoinôkna thu an hril ngaia, an rêngin Pathian satvurna an dong senga. 34An laia tukhom irsam om mahai, in mani, ram mani, an ineihai kha an zuara, a man kha an hong chôia. 35tîrtônhai kuang an inhlana, an intak lam ang takin kha sum kha an sem ngai. 36Khan, Josefa, tîrtônhaiin Barnaba an iti (Kha kha “Irtharngamna nâi” tihna a ni) Levia irchi, Kupra chômbunga omtu khom khan, 37ram a neia, a zuara, a man kha hong chôiin tîrtônhai kuang an hlan ta.

Currently Selected:

TÎRTÔNHAI SINTHO 4: HRACLBSI

Highlight

Copy