2 RÊNGHAI 2
2
Elija irvâna hruaina
1 Rengpa’n Elija chu irvân tiang kêllaiherin a hruaina hrang zoro a hong tunga. Elija le Elisa chu Gilgal ata an fea, lampuia an fe laiin, 2“Hi hin lei om ro, Rengpa’n Bethel nei hrangin a ni tîr,” Elija’n a tia. Elisa’n, “Pathian hring le ni hringna sâlin nang ki ti, lei om no ning,” a tia. Bethel hmuna an fe suam ta. 3Kha laia deipu pâl omhai khan, Elisa kuang an va fea, “A vuan hin ni pu hi Rengpa’n a ilâk hrang a nih ti mo nin hriat?” an tia. Ama’n “Kin hriat dâihrek hi roi,” a tia. 4Elija’n Elisa kuang, “Hi hin lei om ro, Rengpa’n Jeriko-a fe hrangin a ni ti,” a tia. Elisa rêkin chu, “Pathian hring le a hringna sâlin nang ki ti, nang om pe ual no ning,” a tia. Khanchu, Jeriko-a khan an fe suam nôk tâka.
5Khataka deipu rual omhai chu Elisa kuang an honga, “A vuan hin Rengpa’n ni pu hi a ilâk hrang a nih ti mo nin hriat?” an tia. Ama’n, “Kin hriat, dâihrek hi roi,” a tia.
6Elija’n Elisa kuang, “Hi hin lei om ro, Rengpa’n Jordan dunga fe hrangin a ni ti,” a tia. Elisa’n hiang hin a sâma, “Pathian hring le ni hringna hin, nang om pe no ning,” a tia.
7An fe nôk suama, deipu sômringa’n an zuia, hla vit ata an thîrhaia, Jordan dung kôla khan an ngîra. 8Elija’n a puan ar kheka, a thepin, vadung tui a vîka, a’rsen phata, tui tôn viat loiin an irkâna, 9#Dhn 21.17 Tui an irkân zoiin chu, Elija’n Elisa kuang, “Nangma rengata ilâkin ki om mân, imo nang tho pe inlân ni nuam?” a tia. Elisa’n, “Ni’rtha man#2.9: Elisa hin nâipa upa tak irchon ang hi a ngên a ni (Dhn 21.17) bâk hni ang hi dong ki nuam,” a tia. 10Elija’n, “Thil intak tak ni izong a ni; khannisianlân, an ni lâk lai tak ni ni hmu’n chu chang ni ta, ni ni hmu no’n chu chang no chi ni,” a tia.
11Fe puma an chong lai takin, mei sakor le mei tâli ikai an honga, an laia a senhai raka. Elija chu kêllaiherin irvân tiang an lâkin a vuangpui tâka. 12#2 Rng 13.14 Elisa’n a hmua, “Ka pa, ka pa, Israelhai hruaitu inthang, ni ife tâk mo?” a tia. A hmu no tena chu, a puansilhai a kheka, bong hniin an potthêra. 13A chunga Elija puan zuang tâk chu a lâka, a kîr nôk ta. Jordan tui kôla khan a ngîra. 14A chunga Elija puan zuang tâk kha a lâka, tui kha a vîknaa, “Kho mo Elija Pathian Rengpa chu,” a tia. Tui a hei vîkin chu tui kha a’rsen phata, Elisa chu varâl a’rkân thei tâka. 15Jeriko-a om deipu sômringahaiin an hmua, “Elija irtha dong ang kha Elisa chunga a iom a ni ta hi te,” an tia. 16Ama irtongpui hrangin an fea, a makunga an khûksadela, “Irngai ro, mi hrâttak tak sômringa kin oma, ni pu chu Rengpa irtha’n a hruaia kho tiang tânga mo, phâia mo a imâksan rak a ni ngânin te, lungkham takin keini’n va zong kin ti,” an tia. Elisa’n, “Va zong no roi,” a tia. 17Elisa ta hranga inzak rak ang dôrin an ngên sikin, “Va fe roi,” a tia.
18Kha tena chu mi sômringahaiin sûn thum an zonga, hmu mahaia, Jeriko-a Elisa a om laiin an kîr nôka, “Fe no roi nangni ki ti kha te,” a tia.
Elisa sinirkhêl thôna
19Jeriko khuaa mi a senkhathai Elisa kuang an honga, “Kin khua hi ni ihmu tâk angin kho hoitak a nia. Khannisianlân, kin tui fâk a sa no sikin nâi inhring thei ma ung,” an tia. 20Ama’n, “Berbu thara michi se unglân, ni hong pe roi,” a tia. An lâk pea. 21Tuikuanghaia khan a fea michi a phul pehaia, “Rengpa’n tuihai chu a’rthiangtir tâka, tûte thi pai ta no chin ni,” a tia. 22Atûn ten hin Elisa iti angin tuihai hi a irthiang tâk a ni.
23Kha hmun ata kha Bethel khuaa a fe tâka; lampuia a fe laiin kho sûng rengata nâipang an honga, innuisanna hrang takin, “Lukol, lukol, kîr nôk ta ro,” an tia. 24A hong irheiin chu a hmuhaia, Rengpa irhmingin khomâk a sâmhaia. Rampui ata savompui inhni an hong suaka, nâipang sômminli inhni an sê thathai zela. 25Khatak ata chu Samari khua tiang a pan nôk ta.
Currently Selected:
2 RÊNGHAI 2: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
