2 RÊNGHAI 13
13
Israel rêng Jehoahaza
1Ahazia nâipa Joasa chu Judai rama kum sômhni inthum an lalna kum a niin chu, Jehua nâipa Jehoahaza khom Israel rêngin an lala. Samari khuaa, kum sômhleihni an lala. 2Reng Jeroboama Nebata nâipa angin Rengpa ta hrangin thil sual a thoa, Israelhai a hruai insualhaia, a thil saloi thohai masan nuam maka. 3Khasikin Israelhai chunga Rengpa ning an mura, Suria rêng Hazaela le a nâipa Benhadaba’n Israelhai chu inhnê hrangin a’rsabeia. 4Jehoahaza chu Rengpa makunga a chongchaia, Suria rêngin Israelhai deng an theitirhai lam a hmuin a chongchaina a zuang sâm nôka. 5Rengpa’n Israelhai kôla a san hrang a tîr pehai ngaia. Suriahai ata chu a sansuakhaia, irtharngam takin an om nôk ngai. 6Nebata nâipa rêng Jeroboama in sûng mihaiin Israelhai an ihruai insualna dikloi ata irlet nuam loiin, an la sual maia, Asera illim chu Samari khuaa khan an la donsui mai ngaia.
7Jehoahaza chu sipai tômte a nei tâk sikin, sakor chung chuang mi sômringa, tâli sômkhat le kea fe sipai sîngkhat vai a neihai tâka, Suria rêngin an hnê hrai sikin, kea pil vâiphin sir angin a isirbe a ni. 8Jehoahaza thil tho danghai chu, a ihâi lam dân chu Israelhai thurchi irziakna lekhabua a chuang. 9A thia, a nâipa Jehoasa’n ar thûlin a inlal nôk a ni ta.
Israel rêng Jehoasa
10Judai rama Joasa kum sômthum sari an lal kumin Jehoasa chu Israel rêng a nia; Samari khuaa kum sômhleiruk an lala. 11Ama khomin Rengpa mithmua thilsual, Israel rêng Nebata nâi Jeroboama’n Israelhai a hruai sualna kha masan thei loiin a sunzom maia. 12Jehoasa thil tho dang Judahai rêng Amazia le an irdoia, a ihâi lam dân thuhai chu Israel rênghai thurchi irziakna lekhabua a chuang. 13Jehoasa chu a thia, Samari khuaa rênghai thâna an phûma. A nâipa Jeroboama inhnina chu ar thûlin an lal nôk ta.
Elisa thina thu
14 #
2 Rng 2.12
Deipu Elisa chu a thipuina hrangin natna tuangin zâlhmuna a zâla, thi anai pe tâk sikin rêng Jehoasa’n a va pana; “Ka pa, ka pa, Israelhai inzôktu roiinpui tiin,” a châ tâka.
15Elisa’n a koia, “Thal ngul nei le thal chi danghai ni pe hi roi,” a tia. 16Israel rêng kuang khan, “Thal ngulnei hi chel ro,” a tia. A chel zoiin chu Elisa’n rêng kut intûkin, “Sak tianga tukver kha inhong hi roi” a tia. an inhong pea. 17“Thal kha hei kâp ta” a tia. A hei kâpa, deipu Elisa’n, “Suria inhnê hrang Rengpa thal ni ni, Suriahai le Afek-ah irdoi nin ta, an hnêtu ni ni ti,” a tia. 18Elisa’n rêng kuang khan, “Thal dang kha la nôk ro,” a tia. A hei lâka, “Irnêng kha sun ro,” a tia, voithum a suna a mong tâka. 19Pathian mi kha a ning an mur pea, voiringa voiruk khom sun ro, Suriahai chu inhekhai zoi ni ti, voithum kêng ni inhnêhai hrang a tia.
20Elisa chu a thia, an phûm tâka, kum a hong thar rikipin Moabhaiin Israel ram an hong doihaia. 21Mi inkhat hi a thia, phûm an irsoi lai takin Moab rual pâl khat an honga, Elisa thâna khan an van boka an intâna.#13.21: An intâna ti hi Hebraiin chu a intâna ti a ni. Kha pa ruak leh khan Elisa ru a zu tônin chu a hong hring zela, a ngîr suak tâka.
Israel le Suriahai irdoina
22Jehoahaza dam sûng chu Suria rêng Hazaela’n Israelhai chu deng an theitira. 23Khannisianlân, Rengpa’n lung a thunghaia, insiat chit an ini hrang a nuam no sikin, Abrahama, Isaka le Jakoba hai kuanga a thuthung chu a’rngaiinnatin, irnghil thei maka, atûn ten hin a la irngaisâng a ni. 24Suria rêng Hazaela chu a thia, a nâipa Benhadada chu ar thûlin an lala. 25Jehoahaza nâipa Jehoasa’n Hazaela nâipa Benhadada kut ata a pa Jehoahaza khua le tui an ilâkpai pehai chu a lâk kîr nôka, an irdoina voithum an hnêa, Israel ram khuahai chu a sutpai zoi tah a ni.
Currently Selected:
2 RÊNGHAI 13: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
