1 THURCHI SUINA 29
29
Tempil sinna hranga tholôm
1 #
1 Tsn 22.5
Reng Davida’n irbukkhômhai laia, “Ki nâipa Solomona hi Pathian inthang mi a nia, khannisian, a la nâiinpang hraia, a sia le sa lan hriat infel maka. Sin tho hrang lak a tama, a isin hrang lak hi mihriam in ni maka, Rengpa Pathian in a ni. 2Ki thei la lamin ki hrâtna ki lei hmang tâka, rângachak hai, sumru hai, dârhai, thîr hai, thing hai, lunghlu hai, lung mantam hai, lung enhoi, le sailungvâr hai ki bukkhôm tâka. 3Hi khêla khom keima sum rengata sumru le rângachak ki pêka, Pathian tempil hrang hi ki’rvei sikin. 4Ofir rângachak a sa zât her nuaikhat, hâl irthiang sai sumru her nuai hni sîngminli vêl tempil sûng tianga bang irvôtirna hai, 5A theithiamhaiin an nuam lam taka irvôtirna hrangin ki pêka, Rengpa hrangin tu mo thilpêk sat irngaia pe thei?” a tia. 6Nam tina hruaitu hai, le sorkâr sinthohaiin irphal takin thil an pêk tâka. 7Tempil sinna hrangin rângachak her nuaikhat sîngsari, sumru her nuai irzathum sômminli, dâr her nuai irzaruk sômhni, thîr her nuai sômthum irzaminli nêka tam khom an pêka. 8Lung mantam neihai khomin, Rengpa tempil hrangin an pêka, Gersona irchi Jehiela’n a enkola. 9Mipuihai an râi a fân pehaia, phal takin mâni thua Rengpa hranga pêk an ni sikin an lôm a ni, rêng Davida khom a sate’n a lôm a ni.
Davida’n Pathian a inpâk
10Khasikin, Davida’n Israel irbukhai laia Rengpa an pâka, “O Rengpa kin pu Israelhai Pathian, kumtuanga inpâk inruk ni ni. 11#Mt 6.13 Ni roiinpuia, sinthothei tak ni nia, ni’rsânga, ni saa, irnêng le irvâna thilhai hi ni ta a nia, o Pathian an laltak ni nia itinrêng chunga thuneitu ni ni. 12Irchongna le chôiindômna murdihai hi nangma ata hong suak a nia, hrâtna le sinthotheina ni neia, mi ni siam inlianin nin hrâttir thei. 13Khasikin kin Pathian kuang lômthu kin hril, nir hming roiinpui kin inpâk a ni.
14“Keima le ki mihaiin hi dôra tam ni makunga thilinhlan kin ipêk thei hi, kin thei sika ni maka, itinrêng hi ni ta a nia, khasikin ni ta hi kin hong ipêk nôk a ni. 15O Pathian, ni makunga chu kin pi le puhai ang khan, keini khom mikhual, zoro sôtnotea om ang hi kin nia, kin dam lai nihai chu irhlîm anga om a nia, a ihek zôi ngai a ni. 16O Rengpa kin Pathian nir hming inpâkna hranga ni in sinna kin hrâtna hai kin insuakhai hi, nangma ata suak a nia. 17Mi lungrîl ni fia ngaia, mi nun sahai chu ni lôm ngai. Keima’n chu hi thilhai hi phal taka lungrîl fel le dik tak irputin ki hong inhlan a ni, ni mi hong pungkhômhai khomin thilinhlan hong pêk nuam dân ki ihmu a ni. 18O Pathian kin irchibul Abrahama hai, Isaka hai, Jakoba hai Pathian, hianga lungrîl hi ni nâihai irputtirhai maiin lân, nangma hranga iamoma an om mai theina hrangin hrunghai ro. 19Ki nâipa Solomona hi, ni thupêk irzuk taka a zôm theina hrangin hrungin lân, ni tempila hmangrua ki ilâk pehai hi, a sin zoi theina hrangin changpui mai ro,” a tia.
20Davida’n mipuihai chu, “Nin Pathian Rengpa hi inpâk roi,” a tia. Irbukkhômhaiin an irchi Pathian Rengpa an inpâka, an kûna, Rengpa chôiindômin, rêng khom an chôiindôm sa. 21Zînga chu sa an thata, Rengpa hrang thil an inhlana, mipuihai khom an infâktir hai, sehrât sângkhat, kêlbelra sângkhat, belrate sângkhat an thata, maichâma hâlirvôm thil an inhlana. Uain thilinhlan khom an neia. 22Kha ni khan chu Rengpa kuang raifân takin an fâkin an ina. Solomona chu rêng a nih ti an inpuang nôka, Rengpa irhmingin roirêltua sahriak an pol nôka, Zadoka khom ochai ni hrangin sahriak an pol tâka. 23#1 Rng 2.12 Khanchu, Solomona’n a pa rêngtoihmun, Rengpa inding pe kha a lua tâka, rêng hlochuk tak a nia, Israel mi murdi’n a he an lâka. 24Sorkâr mi lian, sipaihai le Davida nâi danghai khomin Solomona chu an rênga tep hrangin chong an inkunga. 25Solomona chu Rengpa’n nam pumpuihai irngaisâng an nitira, Israelhai chunga roirêltu murdi irthûlin, Solomona’n a mihai a ichôiirsâng a ni.
Davida inlal sûng
26Jesaia nâi Davida chu Israel murdihai chunga, 27#2 Sam 5.4-5; 1 Tsn 3.4 Kum sômminli an lala, Hebrona kum sari, Jerusalema kum sômthum inthum. 28Tar kûna damin a thia, ar chonga, mi’n an inzaa, a nâipa Solomona’n ar thûlin an lal nôk ta. 29Davida thurchi a phut ata a mong dênin deipu inthum Samuela, Nathana le Gada hai lekhabua irziak ving a ni. 30A roirêl dânhai, a sinthothei lamhai, a chunga thil tunghai, Israel le a kôlvêl ram chunga thil tunghai an irziak ving a ni.
Currently Selected:
1 THURCHI SUINA 29: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
