1 Pita 1
1
1-2Iau Pita tiga apostolo ta Jisas Krais, iau pakat iakan ra nianga ukaia ho muat ing muat lon harbasia hoing ira wasire kaia ta ira kaba hanuo Pontas ma Galesia ma Kapadosia ma Esia ma Bitinia. Iau pakat iakan ra nianga tupas muat ing God no adahat Sus gate gilamis muat haruat ma no uno lilik menalua. Ma God ga huna bul no uno lilik menalua wara nunure um muat. Ga gilamis muat ma no pinapalim tano Tanuo ing no Tanuo ga bul hasisingen muat bia muat naga halhaal. Ma ga gilamis muat waing muat na taram Jisas Krais ma bia Jisas na sapur hagamgamatien muat ma no dena.
Iau sasaring bia muat na hung tun at ma ra harmarsai tika ma ra malum.
Da pirhakasing God kanong dahat na tinane ra harhalon nong pa na panim laah.
3A pirhakasing uram tupas God. Aie no God ma no Sus ana no udahat Watong Jisas Krais. Ga manga marse dahat kaik gaam tar ra sigar nilon ta dahat bia dahat naga kis nanaho ma ra nurnuruan uta ira bilai na linge na tabar dahat me. Ma kaiken ra linge na kis hatikai. Ma ga tale bia na tar ra sigar nilon ta dahat kanong Jisas Krais ga taman tut hut sukun ra minaat. 4-5God ga marse dahat huo bia dahat naga tinane kaiken ra bilai na linge wara udahat at. Kaiken ra linge pa na panim laah ma pa na marota ma pa na marmarukuan. Ma God i te hakabet timaan kaiken ra linge aram ra mawe wara gaie muat ing God i balbalaure bat muat bia muat pa na hiruo. Tano numuat nurnuruan, kaik gi balaure bat muat hokaiken waing muat naga kap nora harhalon. Ma iakan ra harhalon i taguro taar bia na hanuat palai tano hauhawatine ta ira pakana bung.
6Io kaik, muat manga guama sukmaal bia kaiken ma namur ta dahin i nanaas bia ari a matahu harwalar i umubal muat. 7Kaiken ra harwalar i haan tupas muat wara hamines bia ira numuat nurnuruan i tutun. Ma di la walwalar gol mah huo. Di la bul ie narako tano iaah wara hamhamines no bilbilai tana. Ma sen i tale bia gol na panim laah ma no matana no nurnuruan tutun i lua tano matana no gol. Hokaiken, ira walwalar na haan tupas muat bia ira numuat nurnuruan naga tur dadas. Io kaik, ing Jisas Krais na harapuasa na pirlat muat ma na hamar muat ma na hatamat muat. 8Muat pai le nes ie iesen muat sip ie. Ma kaiken mah muat pai nes ie ma sen muat nurnur tana. Io kaik, muat manga hung ma ra bilai na gungunuama sakit ing pai tale bia da hapupuo. 9Ma muat guama huo kanong muat hatur kawase no harhalon, aie no hunena no numuat nurnuruan.
10Ma ira tangesot ing diet git iangianga utano harmarsai ing na haan tupas muat, diet git manga walwalar wara sisilih uta iakan ra harhalon at. 11No Tanuo ta Krais narako ta diet git tangtange hamines ira linge uta Krais, gom huna hinawas bia Krais na kap nora harangunngutaan ma bia na kap ira uno minamar namur. Diet git walwalar bia diet na nunure iakan ra pakana bung ma bia kaiken ra linge na hanuat hohe. 12God ga hapuasne ta diet bia diet pa ga iangianga na tangesot uta kaike wara gaie diet at. Taie. Diet ga tangtange kaike wara gaie muat. Ma diet ing diet ga pir muat ma no tahut na hinhinawas narako tano dadas tano Halhaliana Tanuo God ga tulei meram ra mawe, diet ga hinawase muat uta kaiken ra linge at. Ma kaiken ra linge ira linge ing ira angelo diet sip bia diet na nunure.
Dahat na halhaal sukun ira sakena ma dahat na manga ru God.
13Io kaik, muat na kure ira numuat lilik bia muat na taguro wara nilon timaan. Na tahut bia palai ira numuat lilik. Waak muat nanaho ta ira linge bia. Muat na nanaho sen mon ma ra nurnuruan tano harmarsai nong Jisas Krais na kap hawaat taar ta muat ing na hanuat puasa. 14Nalua muat ira tabuna palpalai muat gaam git murmur ira numuat sakana sinisip. Ma sen kaiken muat ira bulu na ut na taram nianga, kaik waak muat bale leh kaike ra tuarena sinisip bia na kure muat huo. 15God nong ga tatau muat i halhaal. Io, i tahut bia ta ira numuat magingin, muat at mah, muat na halhaal sukun ira sakena haruat mei. 16Kanong warah, no nianga ta God di ga pakat ie i tange hoken: “I tahut bia muat na halhaal sukun ira sakena kanong a halhaliana iau.”
17-18Ma bia muat sasaring tupas God, muat kilam ie bia Mama. Aie nong i kure ira matanaiabar. Ma no uno harkurai i takodas. Pa na kure hagahe tikai ma harahut bia tiga mes. Taie. Na kure ira tunotuno haruat ma ira udiet magingin. Io kaik, i tahut bia muat na lon ma ra but na urur tupas ie ing muat kis na wasire baak ta iakan ra ula hanuo kanong muat nunure no kunkulaan ing God ga tar wara kul halangalanga muat sukun ira numuat mangana nilon menalua. Iakano nilon ing muat ga kap harausur laah ta ira hintubu muat ma pa ga tale bia na harahut muat ta dahin. Ma God pa ga kul halangalanga muat ma ra linge hoing ra gol ma ra siliwa ing i tale bia na panim laah. Taie. 19No kunkulaan ga tabi matana. Aie no de Krais. Aie hoing tiga nat na sipsip na hartabar, pataie ta da sakena tana, i melmel harsakit. 20Menalua tano hakhakisi tano ula hanuo God ga bul no uno lilik bia na gilamis ie. Iesen ta kaiken ira hauhawatina pakana bung i te hanuat puasa wara gaie muat. 21Ma muat, muat ira ut na nurnuruan ta God kanong muat haan tupas ie narako ta Krais. Ma God, aie nong ga hatut haut Krais sukun ra minaat ma ga tar ra minamar tana. Io kaik, ira numuat nurnuruan i kis ta God ma ira bilai na linge muat nanaho ma ra nurnuruan i hanuat meram ho God.
Dahat na tar ra harmarsai hargilaas haruat ma ira udahat sigar nilon.
22Io, muat te taram ira tutun God i te hapuasne, kaik muat te hagamgamatien ira numuat lon wara tartar ra harmarsai tutun ta ira hinsaka muat gar ta Krais. Muat te gil um huo, kaik i tahut bia muat na tar tun at ra harmarsai harbasia ta muat meram narako ta ira kati muat. 23Kanong warah, muat te kap ra sigar nilon. Muat pai kap no sigar nilon tano pat na daha ing na marota. Taie. Muat te kap ie ta nong pa na marota. Ma aie no nianga gar ta God, a lilonai ma pa na panim laah. 24Ma i palai bia iakan i tutun kanong,
“Ira tunotuno diet haruat ma ra huro,
ma ira minarine no tunotuno i haruat ma no puspusuno no huro.
No huro na mahiawa,
ma no puspusuno na puko laah.
25Iesen no nianga gar tano Watong na kis hatikai.”
Ma iakan ra nianga, aie nong di ga harpir taar ta muat mei.
Currently Selected:
1 Pita 1: gfkNTP
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
