LUKE 11

Pauchamna Thua Sinsakna

(Mat 6.9-13; 7.7-11)

1Chun, tihi ahi a, Isu chuh khawitak mun ahim ah a paucham a. A paucham zawh phet chun, a sinsakte laka khat chun, “Lalpa, Johan in a sinsakte paucham dân a hilh guol khan, kei u le ei sinsak ta” a ti a.

2Chun, Isu’n a kawm u ah, “Na paucham tieng u leh zie tawbang hin paucham un:

‘Ka pau, Na min zahum henla;

Na gam hungtung henla.

3Ni chenga ka nêk khawp uh an nei pie’n la.

4Ka gitlohnateu ei ngaidam inla,

Kei un le ka chung u a thil hihkhielte ka ngaihdam bangun.

Thepna ah ei puilut ki’n,’”

tiu in a ti a.

5Chun, a mah chun sinsakte kawmah, “Na laku a kuo ahim in zawl nei henla, zankhang lai in a In ah va chieh hen la, a kawmah, ‘Zawlpa, chângthâk pêk thum ei palâk sak ah. 6Ka zawl khuolzin in ei hung tawh a, a ânga luih ding bangmah ka nei puoh ngâl a!’ ti henla, 7a zawlpa chun In sung lam apat in, ‘Nei subuoi ki’n, kawt a kikhak zo ta a; kei leh ka chate le zâlkhun a kuol kei tau hi. Hung tho a bangmah hun pie thei ding kei ta puoi,’ ti’n dâwng ta leh; 8Ka hilh na hiu hi, a zawlpa a hih ziekin tho in ava pie zieng puoh na a, a nget tuntun ziekin tho in a deih zat zat va pie’n a. 9Khutichun, ka hun tih na hiu hi; Ngên un, tichun piek in um unlau; hawl un, tichun mu’n lau; kiu un, tichun hawn sak in um unlau. 10Kuole, a hawl ta chun a mu sek u a, kuole a kiu ta chuh hawn sak ding a hiu. 11Nang haw lawi laka pa khat hi, a chapa’n chângthâk ngên henla hileh, kuo a suong pie ding? A hih leh, nga hun ngên henla hileh, kuo a nga sanga gûl pie ding? 12A hih leh aktui ngên leh, kuo a aikawm pie ding? 13Zieziekchun, nang haw migilo bawnin, na chateu thilpha piekna chang na het u chun, na Pau van a um chun a ngente chuh Thagau Thiengtho a pie na lâwm lâwm ding e!” a ti a.

Isu leh Beelzebul

(Mat 12.22-30; Mrk 3.20-27)

14Chun, Isu’n thitha pau theilo khat a nawhdawk a, thitha chuh a pawt dawk phetin, pau theilo pa chuh a hung pau ta a. Mipite chun mak a sau a; 15Himahleh, khenkhatte chun, “Thitha lengpa Beelzebul zieka thithate a nawhdawk sek ahi,” a tiu a. 16Mi dang in la, Isu chuh Pathien apat ahim tih zedapna’n, thilmak hih dingin a ngên u a. 17Himahleh, Isu chun a ngaihtuoh hawu chuh a he a, a kawm u ah, “Khawi gam hileh, amau kido ta a mangthai sek ui; inkuon khat le amau kido ta chuh a mangthai sek ui. 18Setan le, amah a kido chun bangti’n a a gam a tundawk ding? Beelzebul thilhih theihna ziekin thithate a nawhdawk hi nei ti ngâl u a. 19Khutia chuh ken Belzebul zieka thithate nawhdawk ka na hih chun, na chateu in kuo ziekin ana nawhdawk sek u leh? Zieziekchun, amau chuh nanguh hun vaihawm sak dingte ahiu hi. 20Amah vang chuh ken Pathien khutzung vanga thithate nawhdawk sek ka hih chun, Pathien gam chuh na laku ah a hungtung tai tih a sulang ahi.

21“Mi hât chun, hiem bukim chawia a In a ven sung cheng, a thil neihte chuh bit takin a um sek hi. 22Himahlele, a sanga hatzaw’n a hun do a, a zawh tieng leh, a In neipa kivenna gâlvan cheng chuh a chuhthâk saka; tichun, a sum a lâksak chuh a hawmzak sek hi.

23“Kuole, kei lama pang lo chuh ei do ahi a, kuole ei lâkkhâwm pih lo chuh a thehzak ahi.

Thagau Buok Hung Vaihkitna

(Mat 12.43-45)

24“Thitha buok chuh mi sung apat a a pawt in, chawlhna ding hawl in gamgaw munte achun a vak vielviel ta a, a muh theih loh phet chun, ‘Ka pawtna In mah a khan vaikit mai ing ka,’ ti’n a ngaihtuoh ta a. 25Khutichun, a chieh kit ta a, In chuh thiengtho tak leh ngim takin a va mu ta a. 26Tichun, a va pawtdawk a, amah sanga phalo zaw, thitha dang sagih a hun pui a, a hung u a, taka chun a cheng tau a. Khutichun, zie mihiempa dinmun chuh a tunga sang khan a tawp lam chun a hung phamawh zaw sem hi!” a ti a.

27Chun, Isu’n zie thu a gen lai chun, mipi laka numei khat a hung kiko dawk a, a kawmah, “Nang hun vawpna gil chuh a hamphâi, chun, na nawichep le!” a ti a. 28Himahleh, Isu’n a dâwng a, “Ahi, Pathien thu za a, zawpte hi mi hampha ahi zawu hi!” a ti a.

Thilmak Ngekna

(Mat 12.38-42)

29Chun, mipite chuh a kawma a hung khawm lai u chun, a kawm u ah, “Tulai khang thakte hi khang gilo ahiu hi; thilmak hih a ngek khelkhel u a, himahlele, Jona melchikna tihloh chuh a kawm u ah melchikna himhim piek hi puo’n a. 30Jona chuh Ninevi khuo a mite dinga melchikna a hih guol khan, Mihiem Chapa hi tulai khangthakte ding hin melchikna hung hi’n a. 31Thutan ni chu leh, Sheba lengnu kha tulai khangthakte tawh hung tho untin, tulai khangthakte hi mawh hun chan sak in a; Solomon chitna thugen ngaitha dingin kâwlmawng apat in a hung ngâl a; ka hun hilh na hiu hi, Solomon sanga lopi zaw zie tak a hin a um a puo.#1 Let 10.1-10; 2 Kh 9.1-12 32Thutanna ni leh Ninevi khuo mite chuh tulai khangthakte tawh hung tho un ding un tin, mawh hun chan sak unau; Jona thugen ziekin a lung uh a hêi ngâl u a; ka hun hilh na hiu hi, Jona sanga lopi zaw taka hin a um a puo!

Sapum Thaumei

(Mat 5.15; 6.22-23)

33“Kuoma’n thaumei de’n In nuoi ah a kawih ngei puou a, chun, lawh nuoi ale a kawih ngei diek puou hi,#Zik khenkhat a chun, ‘Lawh nuoi ale a kawih ngei diek puou hi’ tih hi a um puoi mi a lut tieng leh a muh theihna dingun, a tunna achun a tung zaw sek ui. 34Na sapum a dingin na mit chuh thaumei ahi. Na mit a chîm chun, na sapumpi le a vak dawk sek; himahleh, na mit a phatloh le vang, na sapumpi athim zo kêi sek hi. 35Khutichun, na sunga vak chuh thim a na hi khâi mawh, chingthei ah. 36Khutichun, na sapumpi chuh, a thimna lai um lo hiela a vak chun, thaumei vak hawih takin a hun salh guolin vak suok kêi ina,” a ti a.

Pharisaite leh Dan thuzikte Thiemmawhna

(Mat 23.1-36; Mrk 12.28-40)

37Isu’n a thugen a zawh phat chun, Pharisai khatin a kawma an ne dingin a chiel a; tichun a chieh a, an ne dingin a chu ta a. 38Isu’n khut sawp masa lo a an a nek chuh a muh phetin, Pharisai pa chun mak a sa ten a. 39Lalpa chun a kawmah, “Nang haw, Pharisaite’n, khawn leh kuong pawlam chuh na sawp ngim ngut sek u a, na sunglam hawu chu la, lepgukna leh gitloh in a dim ngâl a. 40Mingawlte! pawlam siem pa Pathien chun, sunglam le a siem hilo ahim? 41Khutichun, na khawn u leh na kuong sungteu a um chuh mi chagahte kawmah pieu in, tichun, thil bangkim chuh nang haw adi’n thiengtho ding ahi.

42“Na chunguh a gik hi! Nanguh Pharisaite haw, Pudina bang, pathikhawm ngat bang leh, thai tin chengte Pathien kawmah sawma-khat na pie sek u a, himahleh, vaihawm dikna leh Pathien hehpih ding chuh na ngaihsak ngâl puou a. Ziehaw chuh apuo, na sin ding u chuh, a dangte hih chuh haihsan diek lo in,#Tpd 27.30

43“Na chunguh a gik hi! Nanguh Pharisaite haw, Kikhawpna ina chutna phapen hauh masak leh, dawl muna zahum taka kiho chuh na deihchuom sek ngâl u a. 44Na chunguh a gik hi! Thân ahi tih he lo a, a chunga helo a mi a chiehna sek bang u hi na hiu hi,” a ti a.

45Dan sinsaktu khatin a kawmah, “Sinsakpa, zie thu na gen haw hi, kei u le nei sumuolpho ahi,” a ti a.

46Isu’n a dâwng a, Na chunguh a gik hi! “Nanguh, dân sinsakte, Thil puok haksa tak, mi chungah na ngau a, nang haw’n la, panpih dingin na khutmuk chau le na tawih sak nuom puou a. 47Na chunguh a gik hi! Thiemgaute a dingin thân hawihtak tak bang na sa sek u a, a hun suonteu in a thah thiemgaute a ding ngêi chuh. 48Nang haw hun suonte thilhih chuh, nang haw’n le na phasakpih ngêi u a, thiemgaute a that sek u a, nang haw’n a thân dinguh na siem sek uh ahi. 49Zieziekchun, Pathien Thupil inle: ‘A kawm u ah thiemgaute leh thupuo te sawl ing ka ting, khenkhat chuh that untin, khenkhat chuh a na sugimthei un au,’ 50Tichun, tu huna mite hi, khawvel siem tunga kipat leh, 51Abel thisan kisuoh apat, Mun Thiengtho leh maichâm kikala Zakaria thisan suoh a a um ni tienga, thiemgau thah a umte chengcheng ziek chun gawt in um un au. Ahi, ka hun hilh na hiu hi, tulai khanga mite hi ziehaw ziek chun gawt in um tei un au!#Tsb 4.8; 2 Kh 24.20-21

52“Na chunguh a gik hi! Nanguh, dân sinsakte haw, Hetna dinga kawt hawnna chabi chuh na kivawp u a; nang haw la lut guo diek lo in, mi dang lut guote la na kham ngâl u a!” a ti a.

53Isu’n zie tak mun chuh a nutsieh phetin, dân sinsakte leh Pharisaite chun nasatak in a nielkalh tau a; thil tamtak chungchâng ah dawtna a siem khum u a, 54thil bang ahim khat a gen khelh, a mat theihna dingun, a chang zing tau hi.

Currently Selected:

LUKE 11: GANGBSI

Highlight

Copy