JOHAN 15

Isu Grep gui Taktak chuh

1“Kei Grep gui taktak chuh ka hii, ka Pa a huon ngakpa ahi. 2Ka kizawppih bâk gah lo ta cheng a paih sek a, a gah pha ta chuh a hih thiengtho sek hi, a gah tam zawk diek na’n. 3Na kawm u a ka thugen ziek chun, tu’nle na thiengtho pai zieng tau hi. 4Keimah ah um zingun, keile, nangmau ah um zing ing ka. Bâk chuh grep guia a um zing loh a amah maia a gah theih loh guolin, nang u le keimah a na um zing loh u chun, gah thei puo’n lau.

5“Kei grep gui chuh ka hi a, nang haw a bâk na hiu hi; kuole, keimah a um zinga, keile amah a ka um zing na chuh, zie mah chuh tamtakin a gah sek hi; keimah lo in bangmah na hih thei ngâl puou a. 6Mi, keimah a a um zing loh chun, bâk guola paih dawkin a um a, a vuoi sek; tichun, a chawm u a, mei ah a paih u a, a kâng sek. 7Nanguh keimah a na um zing u a, ka thu le nangmau a a um zing chun, na deih chenguh ngên un, nang u dingin hihin um ina. 8Zie vanga hi ka Pa le limbawla um ahi, tamtak a na gah u hin; khutichun, ka sinsakte hin lau. 9Pa’n ei hehpih guolin ken le ka hun hehpih na hiu hi; ka hehpih in um zingun. 10Nangun ka thupiekte na zawp u chun, ka hehpih in um zing unlau, ken le ka Pa thupiekte ka zawpa, a hehpih a ka um zing guol mah hin.

11“Ka kipahna nangmau a a um zing na’n leh, na kipah uh a bukimna’n zie thu haw hi na kawm u a ka gen ahi. 12Ziehi ka thupiek ahi: Ken ka hun hehpih guol mah hin, nanguh kihehpih un.#Joh 13.34; 15.17; 1 Joh 3.23; 2 Joh 5 13Mihiem in a guol sika a hinna a piek khela hehpihna nasa zaw kuoma’n a nei puoi. 14Thu ka hun piek cheng na hih u chun, ka guolte hi’n lau. 15Suok hun tikit ta puo’ng ka; a pu thilhih suok in a he puoh ngâl a; guolte hun ti zaw ta’ng ka; Pa apat a thil ka het cheng na kawm u ah ka phuong ta ngâl a. 16Nangun nei tel puou a, ken ka hun tel zawk na hiu ui; chieh a, sawttak a um zing dinga tamtak a va gah dingin ka hun guot na hi ngâl u a. Khutichun, ka min a Pa kawma na nget tak uh hun pie zel ina. 17Zie hi ka hun thupiek chuh a hi: Kihehpih tuoh chiet un.

Khawvel in a Hawtnau chuh

18“Khawvel in a hun hawt u leh, a hun hawt mau in kei ei haw tau hi tih na he tau hi. 19Nang haw khawvel mi hi leu chin, khawvel in amah mite a hehpih ding a hii; khawvel a mi na hi ngâl puou a, khawvel a um, ka teldawk na hih zawk ziekun, khawvel in a hun hawt na hiu hi. 20‘Suok, a pu sangin a lopi puoi’ tih ka hun hilh na hi tau kha, hezing un. Amau in kei ei bawlsiet tâk u chun, nang haw le hun bawlsie’n au; ka thu a zawp tak u chun nang haw thu le zawp un au.#Mat 10.24; Luk 6.40; Joh 13.16 21Himahleh, keia na hih ziekun ziehaw cheng hi na chungu ah hih un au, ei sawlpa a het loh ziekun. 22Kei a kawm u a hunga thu gen lo hi leng, gitloh nei lo ding ahiu a; tu’n vang chuh a gitlohnau ah paulap ding a nei ta puou hi. 23Kuole, kei ei haw chun, ka Pa le a hawt a hii. 24Thil kuomah hih khâk loh cheng a kawm u ah hih kileng, gilo a thiemmawh kichanna nei lo ding ahiu a, tu’n vang chuh, amau in kei leh Pa chuh ka nih un ei mu tau a, hawt le ei haw a hi tau hi. 25Bang hitaleh, Dan Lehkhabu ah, ‘Amau haw’n bangmah a ziek dukdak um lo in ei hawu ahi,’ tih zik kha a hung guitun theihna dingin ti ahiu hi.#Sam 35.19; 69.4

26“Chun, Pa kawm apat Lungmuonpa na kawm u a ka hun sawl ding chuh, Pathien chanchin diktak phuongdawk sek, Thagau chuh a hii. Amah chuh Pa kawm apat ka hun sawl ahi a, amah chun ka chanchin hun hetsak ina. 27Chun, nangun le ka chanchin gen unlau, atûng apat ka kawma um na hih tâk ziekun.

Currently Selected:

JOHAN 15: GANGBSI

Highlight

Copy