NASEPTE 1

1Deihtak Theophilus: Ka lehkhabu masa akhan, Isu thilhih leh, a nasep kipat tunga a thu sinsakte chengcheng khah ka zik a;#Luk 1.1-4 2Thagau Thiengtho thilhih theihna a, a sawlchak telte kawma thu a pieka, van a puih toh a a um ni geia thu khah. 3Zie sawlchakte kawm achun dahum chuh a thuok nung in hetna tamtak in hing in a ki-etsak a, ni sawmli zet a kawm u ah a kilak a; Pathien gam thu a gen sek. 4A kawm u a a um sung chun, hiti hin thu a pie a: “Jerusalem khuo taihsan kiu inla, Pa thil tiem, na kawm u a ka gen kha na ngak zing un.#Luk 24.49 5Johan khan tui in a baptist sek a, himahlele, ni sawtlo kâl in Thagau Thiengtho in baptistma chang unla,” ti’n.#Mat 3.11; Mrk 1.8; Luk 3.16; Joh 1.33

Isu Van a a Kalna

6Chun, sawlchakte chuh Isu tawh a hung kikhawpkhawm phet un, a kawmah, “Lalpa, tuhin ahim, Israel te kawma Gam na piek kit ding?” ti’n a dawng u a. 7Isu’n a kawm u ah, “Pa’n a hun leh a ni chuh amah thu thu a a guot a hi a, nanguh het ding ei puoi. 8Himahlele, Thagau Thiengtho chuh na chung u a a hungtun tieng leh, thilhih theihna hun nei unlau, tichun, Jerusalem khuo ale, Judea leh Samari gam khuo tin ale, kâwlmawng tiengin ka thu hetpihte hi’n lau,” a ti a.#Mat 28.19; Mrk 16.15; Luk 24.47, 48

9Chun, zie thu haw chuh a gen zawhin, a muh zing sau in van a puih toh in a um ta a, tichun, meipi’n a muhphak loh u ah a puito ta a.#Mrk 16.19; Luk 24.50, 51 10A kal toh laia van lam en a a din pet un, mi nih puon vam silh in a kieng u ah a hung ding u a; zie mi nih te chun, 11“Galili gama mite haw, bang dinga van lam en a ding zing na hiu hi? Zie Isu, na kawm u apat van a puih toha um hi, van a kal na muh guol mah u hin, amah mawng hi hungkit ina,” a tiu a.

Juda Thasang ding Têlna

12Chun, Sawlchakte chuh olive tâng a tih uh apat chun Jerusalem khuo ah a vaikit tau a; zie tâng chuh Jerusalem khuo kieng a hi a, Chawlhni a chiehna hun phet ahi. 13Khawpi a lut phet u chun, a umnau indan chungnung a chun a kal to u a: Peter leh Johan tawh, Jakob leh Andrew, Philip leh Thoma tawh, Bartholomai leh Matthai tawh, Alphai chapa Jakob leh, Simon, Zelot lawi a tel leh, Jakob chapa Juda tawh ahiu hi.#Mat 10.2-4; Mrk 3.16-19; Luk 6.14-16 14Ziehaw chengcheng chuh, numeite tawh, Isu nu Mari tawh, Isu suohpihte tawh, lungthim munkhata, phachuomngai taka paucham in a um zing sek u a.

15Chun, zie nung sawtlo cha chun gingtute kikhawp khawmna a um a, a bawn u chun za leh sawmnih vel ahiu a; tichun, Peter chuh a ding a, a kawm u ah, 16“Suohpihte haw, Thagau Thiengtho in, David manga Isu mante puipa Juda thu a genlawk kha, zie Pathien lehkha thu kha hungtung him ding ahi. 17Juda chuh I lak u a simtel ahi a, I nasepnau a hin chan le a nei ngâl a.”

18(Zie Juda chun a gitloh hih zieka a dangka muh chun mun khat a chaw a, a bungbu’n a kie a, a lai ah a puokkek a; a gil chengcheng a pawt vek ta a.#Mat 27.3-8 19Zie thu haw chuh Jerusalem a chêngte cheng chengin a na zau a; zie mun chuh amau pau in, “Akeldama” a tiu a, zie chuh “thisan mun” tihna ahi.)

20Pahchakna Labu ah zie thu hi zik a hi: “A umna sukgam in um hen, A sung ah kuomah um kihe’n, tih leh A nasepna mun hi mi dangin luoh he’n,” tih hi.#Sam 69.25

21“Khutichun, Lal Isu, I laku a lut sek pawt sek pa a um sung cheng a; 22Johan in baptistma thu a gen apat, I kawm u apat van a puih toha a um ni tieng khan zie a I lak u a tel sekte laka hin mi khat, Lalpa Isu thawhkitna ei hetpih dingin a um ding ahi,” a ti a.#Mat 3.16; Mrk 1.9; Luk 3.21; Mrk 16.19; Luk 24.51

23Khutichun, mi nih a guot u a: khat chuh Joseph Barsabas a tihpau, (a min dang Justas le kiti) leh, Matthias ahi. 24Chun, a paucham u a, “Nang Lalpa, mihiem chengcheng lungthim he pa, 25Juda chun amah muna chieh dingin, zie a nasepna leh sawlchak na a haihsan hi, a thasang dingin zie te nih laka hin a kuo zaw hi a na tel, kei uh nei hetsak ah,” a tiu a. 26Tichun, phun a san u a, a phunsân u chuh Matthias chungah a chu a; tichun, amah chuh sawlchak sawmlekhatte laka chun simtel a hi tai.

Currently Selected:

NASEPTE 1: GANGBSI

Highlight

Copy