LUKE 4
4
Jisu ni naigrik
(Mt. 4.1-11; Mk. 1.12,13)
1Jisu Bese Gathar jang gablai hi, Jordan dihbu ni phrang phaiphin dada, Bese Gathar jang bo khe hajengling ha langpha ba. 2Oraha basain jang bisagin ni bising ha bokhe Diabol naigrik ba. Ode, bo basain buthu ha musibo jiya. Yaohonthao ha bo hukhri jao kha.
3Diabol bo khe thi ba, Ning Madai ni basa thikhade, ebo longthai khe hon jamane grao ri lah.
4Jisu bo khe thiphin ba, Subung de hon jang se ning thangya thihi laisi ha rebyaba dong.
5Diabol bo khe hathan guju ha langpha dada muphrip gasi ha habsao raji khrip khe phnu ba. 6Ode, Diabol bo khe thi ba, Ebo buthu khrip ni basao ha hukhum jang raoma anthane ri kha. Ang sere ne rima nangjao re, ang riphu du. 7Ning ang khe khlim re thikhade, ebo buthu khrip nini jathar nang.
8Jisu bo khe thiphin ba, Ning jarni Gabra Madai khe khlim lah, ning boni khusi khe se ning dang lah, ode thihi laisiha reb du.
9Odehe, Diabol bo khe Jerusalem ha langpha hi, Madaikhoh ni nohkhu ha songri dada, bo khe thi ba, Ning Madai ni basa thikhade, jar khe eraha ni phrang galai lah. 10Madai ni laisi ha reb du, ning khe juru mane bo jarni deglarao khe haiha nang, 11Bonsi ni yao jang ning khe bamkhu ma. Niyakha de igah ha longthai nang hi bumai nangma se thihi reb du.
12Jisu bo khe thiphin ba, Ning jarni Gabra Madai khe nai nai ma da bao, thihi laisi ha reb du.
13Odehe, Diabol Jisu khe khrip naigrik jang nainai hi boni yaohon ha khaisa bubli ni khlai hi bo ni phrang degao lang kha.
Jisu Galili ha khusi dangjen ba
(Mt. 4.12-17; Mk. 1.14,15)
14Odehe, Jisu bese ni raothai jang Galili ha thangphin kha. Ode bo haphai ha boni grao gubblung thar kha. 15Bonsini sunagog ha bonsi khe sling ri ba. Subung buthu khripbo bo khe sugu hi khaja pha ba.
Jisu khe Nazareth ha lamjaoya
(Mt. 13.53-58; Mk. 6.1-6)
16Ode Jisu jar deyaba juyaba nolei Nazareth ha thangphin ba. Ode, nalai dangba lai ning Lenggo basain ha Sunagog ha hap hi Madai ni laisi khe phuri mane songkhu ba. 17Gorasali Isai ni laisi khe boni ha ri ba, ode bo laisi thonyaba khe khru dada olei rebyaba khe bo phuri ba.
18Gabra ni bese ani basao ha dongbani,
Dukhisarao niha hamba graojma khe sainthi mane bo ang khe saikho ba.
Leng jahi dongyarao khe haiger ri mane,
Ganarao muh nuphin mani grao khe sainthi mane, ar
Dukhu rijaoyarao khe sogo mane,
19Gabra ni khah khusi jayaba maithai ni grao khe sainthi mane bo ang khe haiha ba.
20Odehe, laisi bothon khe bo thon khuphin hi dangyasa ne riphin dada, bo kham ba. Ode sunagog ni subung buthu khripbo bo ni basao ha muh galai ba. 21Bo bonsi khe thi ba, Madai ni laisi ni grao, nisi dini ha khnayaba, sophai kha.
22Bo khasaoma ni grao joyaba khe khnayarao khna hi gmang ba. Odebani, khripbo bo jang khajapha ba. Bonsi thilai ba, Bo Josep ni basa niya?
23Bo bonsi khe thi ba, Daktor, ning jar khe ham ri lah. Kapernaum nolei ha ning dangyaba khusi, jing khnayaba khe ebo jarni nolei ha bo dang lah, thihi nisi thi nang. 24Ode bo bonsi khe thida ba, Ang gibi jang nisi khe thi du, jarni nolei ha de saosi bo gorasali khe lamjaoya. 25Ang gibi jang nisi khe thi du, Elijah thanghi dongba basain ha hadi hayaba ni habsao ha asari galai ba. Boha Israel rajiha banjik gabang dong ba. 26Thikhabo, bonsi ni bising ha saosi niha bo Elijah khe haihaya, Sidon raji ni Zerephat ha banjik saosi dongba, boni ha se ning haiha ba. 27Gorasali Elisa thanghi dongbani basain ha bo, Israel raji ha khunthi jayaba subung gabang dong ba. Thikhabo, Suria raji ni Naaman khe garhi de saosi khe bo ham riya.
28Ebo grao khe khnaba jang, Sunagog ha dongyarao khrip bo, boni basao ha thamsi baigo ba. 29Ode bonsi baija dada Jisu khe nolei ni phrang rikhon hi bonsini nolei khro ni longrang ha langpha hi, braha ni phrang bo khe dangkhla mani khlai hi bonsi lang ba. 30Thikhabo bo de bonsi ni gejer ni phrang thang la kha.
Sgo sgain gajaoyaba khe ham ri ba
(Mk. 1.21-28)
31Galili raji ni nolei masi Kapernaum ha thang dada Lenggo basain ha subung buthu khe bo sling riba. 32Khemotha jang bo sling ri bani boni slingrithai khe subung buthu khrip bo gmang ba. 33Sunagog ha sgo bese gusu gajaoyaba dong ba. Bo bol jang jirik khaohi thi ba, 34Nazareth Jisu, jing khe sumjadi khlaima bao ba? Jing khe sjam mane phai ba? Ang mithi du, ning Madai ni subung gathar se.
35Jisu bo khe jo dada, Ning phirik phirik dong lah, bo subung ni phrang baigo bu lah, thihi thiba jang, bo subung khe sgo sgain hah ha galai rihi, boni bising ni phrang baigo hi thang la kha.
36Bonsi khrip bo gmang lai hi thi lai ba, Ebo la sumjadi grao ja kha? Boni khemotha ni grao jang khusi dangphuyaba raothai jang bese gusu buthu bo baigo lang du! 37Ode, bo haphai ni khrip hathan buthu ha boni grao gubblung thar kha.
Jisu limyarao khe gabang ham ri ba
(Mt. 8.14-17; Mk. 1.29-34)
38Bo baija langhi sunagog ni phrang baigo ba, ar Simon ni noh ha hap hi ba. Ode, Simon ni busuma limba raobani bonsi boni khlai hi khainsu ba. 39Jisu boni rogong gabasi ha songpha dada limthai khe bo joba jang limma jam kha. Bo masainjik baija hi bonsi ne naiso nuso kha.
40Ode, sainjro didih ha gibin gibin limyarao sayarao khrip khe boni ha labu ba, ode bonsi khe khrip ni basao ha yao deng hi hamthai ri ba. 41Sgo sgain buthu bo, Ning de Madai ni Basa se, thi hi bol jang jirik khao dada ar subung buthu ni sao ni phrang baigo lang ba.
Jisu grao thimani thang ba
(Mk. 1.35-39)
42Phorong nokha naiba jang bo baigo lang hi hagra siri siri hathan ha thang ba, ode subung buthu bo khe smai hi goron ba jang bonsi bo khe mathaoma bao ba. 43Thikhabo, bo bonsi khe thi ba, Gibin nolei buthu habo Madai ni raji ni hamba graojma khe sainthi ma nang du, olei dangmane ning ang khe haiha ba se.
44Odehe, bo Judai raji ni sunagog buthu habo grao sainthi phalang ba.
Currently Selected:
LUKE 4: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
