LUKE 22
22
Jisuni basao ha masap
(Mt. 26.1-5; Mk. 14.1,2; Jn. 11.45-53)
1Humao giriyaba hon ni mel, Baiglai Mel thiyaba, sampha phai kha. 2Jonthairao ar Dara khe slingriyarao, subung buthu khe khin bani, Jisu khe phirik phirik sthai mani lama smai ba.
Juda Jisu khe rem ri mane baodu
(Mt. 26.14-16; Mk. 14.10,11)
3Jhigin ni bising ha, Juda Iskariot thiyaba ni bising ha Soithan hap ba. 4Odehe, bo thang dada, bedehe bo Jisu khe rem rima thihi Jonthairao ar Madaikhoh raokhiyarao ni hojarao jang sainlai ba. 5Bonsi khajahi bone rang ri mane grao hanggai ba. 6Bo jajao hi subung buthu jang mithi jaoyahi, Jisu khe bonsini yao ha yaopha mane hajora smai kha.
Baiglai Busuni khlaihi salai ba
(Mt. 26.17-25; Mk. 14.12-21; Jn. 13.21-30)
7Humao giriyaba mel ha, Baiglaini Melni khlai hi, melma basa buthu khe sthai mani basain sophai kha. 8Jisu, Peter jang Johan khe elei sanihi haiha ba, Nisi jinthane Baiglai Busuni jimu salai tha.
9Bonsi bo khe sing ba, Braha salai mane ning jing khe nangjao ba?
10Bo thiphin ba, Nisi nogor ha hap hiba ha, subung saosi dihdig jang dih khaoba khe nisi goron nang. Bo hapyaba noh ha bokhe rikpha lah. 11Ode, noh ni bubra niha thi lah, Slingriyah ning khe thidu, ani rikphayarao jang Baiglaini mel jhiginyaba nohkhoh gedeba braha? 12Bo basao ni khutha masi khe nisi ne phnu nang. Oraha nisi khrip jadi salai hi dengyaba khe mai ma se. Oraha ning jinthane salai lah.
13Odehe bonsi thang dada bonsi niha bo sainthiba lai ning khrip nuhi ba. Odehe, bonsi oraha Baiglaini mel salai kha.
Gabrani horni jimu
(Mt. 26.26-30; Mk. 14.22-26; 1 Kor. 11.23-25)
14Makham jimane bubli sophai kha. Jisu jarni rikphayarao jang khalai phang khampha kha. 15Bo bonsi khe thi ba, Ang dukhu maiya saniha, nisi jang ebo Baiglaini mel khe jima hamsi ning nangjao du. 16Ang nisi khe thi du, Madaini raji ha, gibiyaba mel phaiya si de, ang ebo khe ji nang niya kha!
17Ode, bela khe lahahi, Madai niha hamjaoma rihi thiba, Ebo khe lahahi nisi ronlai lah, 18Ang nisi khe thi du, Madaini raji sophaiya si de, duha ni phrang, ebo grep bidih khe ang ling nang niya kha.
19Ode, bo hon khe bo lahahi, Madai niha hamjaoma ri ba. Bo khe sgao hi bonsine ri ba, Ebo ning ani saomang, nisine riginyaba. Ang khe wainso mane ebo khe dang lai lah, thi ba. 20Odelei ning, bonsi jibani yaohonha, bela khe laha dada, Ebo ning nisine baigoyaba ani bithi, grao gadain khayaba se, thihi thi ba. 21Thikhabo, nai lah, ang khe remginyaba subung ebo basang ha ang jang baosi dongpha du. 22Marsini Basa de Madai salaiba lai ning thang ma nang ma, thikhabo remriyaba ni khlai hi bisi bubain risi nang!
23Bonsini bising ha sere oleiyaba khusi dangma thihi bonsi saosi jang saosi singlai ba.
Dedaothao jamani niyalai ba
24Bonsi ni bising ha, sere dedaothao jama thibani graoha rikphayarao niyalai ba. 25Jisu bonsi khe thi ba, “Jentail saraoni rajarao, jarni subung buthu ni basao ha, khemotha jang yaowai re, ar hamba khusi dangba thihi thi re. 26Nisini bisingha de elei ja nang niya; thikhabo, nisini bisingha dedao thaoyaba gidi thaoyaba lai dong thing, ar naisoyaba leng lai dong thing. 27Sere dedao ja ma, jimane khamyaba na bone makham samlai khu riyaba? Gibi jang ning jimane khamyaba dedao. Thikhabo, ang de nisini bising ha makham khu riyaba lai dong ba.”
28“Ang dukhu jayaba ha nisi ang jang dongpha ba, 29ani bupha anthane raji riba lai ning, ang bo nisine ri du. 30Ani raji ha nisi, ani basang ha jihi linghi dongphu mani khlai hi, ar Israel sengphong jhi gini ni basao ha nisi Rajani khamthan ha khamphu ma.”
Peter niyalaiba thidayaba
(Mt. 26.31-35; Mk. 14.27-31; Jn. 13.36-38)
31Simon! Simon! Khna lah! Phadain dangyaba maigrik ni phrang maijubu khe gibin khlaiba lai, hamba hamya gibin khlai mane nisi khe sain du. 32Thikhabo, nisini lonma khe gmaya mane ang bi du, ning ani gede phaiphin khali, nini daphlungrao khe rao ri lah.
33Peter Jisu khe thiphin ba, Gabra, phatho ni ha ning jang thangma, ar thihginyaba ha bo ang ning jang thangpha ma se.
34Jisu thi ba, Peter, ang ning khe thi du, dini hor ha, alang tham ning ang khe mithiya thihi thiyasi de daono gisi nang niya.
Juli, yaphadap ode seng
35Odehe, Jisu jarni rikphayarao khe sing ba, Juli ar yaphadap langya hi nisi khe ang haihaba ha, asaba soyahi nisi dong ba?
Musi giri dongya, bonsi thiphin ba.
36Bo bonsi khe thi ba, Duha la sere niha seng ar juli dong, bo lang la thing; ar sere niha seng giri, bo jarni rih phain dada barai la thing. 37Bede thikhade, ang thi du, phaphirao jang baosi ning sainpha jao kha thihi rebyaba ani basao ha sophaima ja kha. Sumjabani thikhala, ani basao ha rebyaba grao khrip sophaima ja kha.
38Boni rikphayarao thi ba, Nai lah, Gabra, eraha seng magin dong!
Ja kha bo thiphin ba.
Oliv hadingha Jisu bi ba
(Mt. 26.36-46; Mk. 14.32-42)
39Bo baigolang hi, nalai lai ning Oliv hadingha bo thang ba, boni rikphayaraobo, bo jang rikpha ba. 40Bo hathan ha sohi dada, bonsi khe thiba, Naigrik ha galaiya mane nisi bi lah.
41Bonsi ni phrang khaisa jaindao hi thang dada, bo yasgu thuhi bi ba. 42Abai, ning nangjao re thikhade, ebo bela khe ani phrang disai lah. Thikhabo, ang nangjaoba lai niyahi, ning nangjaoba lai ning ja thing. 43Sorgoni degla saosi boni ha nujao hi, bone raoma ri ba. 44Bo hamsi ning waimu nang bani khah ri hi biphin ba; boni glimdih thijao lai hah ha galai ba. 45Bo bi blai dada, baija hi boni rikphayarao niha thangphin baha, bonsi mudri jang gablai hi thuba khe bo nuhi ba. 46Bo bonsi khe thi ba, Nisi sumjabani thu ba? Naigrik ha galaiya mane baijahi bi lah.
Jisu khe rem mani grao
(Mt. 26.47-56; Mk. 14.43-50; Jn. 18.3-11)
47Bo grao thisaiba ha ning, subung buthu sophai ba, rikphayarao jhigin ni bising ha saosi, Juda thiyaba subung gabang labu hi Jisu khe khudim mane phai ba. 48Thikhabo, Jisu bo khe thi ba, Juda, Marsini Basa khe khudim dada ning rem ri ma?
49Rogong ha dongyarao, japhai ginyaba khe nuhi, Gabra, jing seng jang dain ma? thihi sing ba. 50Odehe, bonsini bising ha saosi, Jonthaima ni lengni yaodani khmao khe dainkhao kha.
51Thikhabo, Jisu thiba, Elei jang ning ja kha! Bo subungni khmao ha yao dopha dada bo khe ham riphin ba.
52Bo khe rem mane phaiyarao, Jonthairao ar Madaikhoh khe naisoyarao ar hojarao niha Jisu thi ba, Ang khe makhao khe remba lai rem mane seng, daobu labuhi phai ba? 53Sain midi Madaikhoh ha nisi jang ang dongpha ba; thikhabo, nisi ang khe rem ma baoya. Duha de nisini bubli ja kha, ar andarni hukhum yaowaiyaba bubli ja kha.
Peter Jisu khe niyalaiba
(Mt. 26.57,58,69-75; Mk. 14.53,54,66-72; Jn. 18.12-18,25-27)
54Odehe, Jisu khe bonsi rem dada, Jonthaima ni noh ha langpha ba; ar Peter de gajain ni phrang bo khe rikpha ba. 55Hakhli ha bonsi wai suba, oraha waisi khamyarao niha Peter bo kham hi ba. 56Wai jdanyaba ha lengjik saosi bo waisi khamba khe nuha ba; bo khe naipha dada thi ba, Ebo subungbo Jisu jang dongphayaba saosi se!
57Thikhabo, Peter niya ba, Masainjik, ang bokhe mithiya! thihi thi ba.
58Khaisa yaohon ha, gibin subung saosi Peter khe nuhi thi ba, Ningbo bonsini bising ha saosi ning!
Thikhabo, Peter thiphin ba, Lugu, ang de niya.
59Gontha si ni yaohon ha, gibin subung saosi thi ba, Ebo subungbo gibi jang ning Jisu jang dongpha ba; bobo Galili rajini subung se!
60Thikhabo, Peter bo khe thiphin ba, Lugu, sumjadi khe ning thi ba, bokhe ang mithiya!
Bo grao sainthiba ha, daono gisi ba. 61Gabra naiphin hi Peter khe naiha ba, ar Peter, dini ha daono gisiya sani ha alang tham ning ang khe mithiya jamai si ma Gabra boni ha thiyaba khe wainsophin ba. 62Odebani, Peter baji gede baigo langhi hamsi ning gra ba.
Jisu khe minithai ba
(Mt. 26.67,68; Mk. 14.65)
63Jisu khe remyarao bokhe minithai hi su ba. 64Boni mukhang khe khaphong hi bokhe bonsi sing ba, Sere ning khe do ba? Ning thi sang! 65Ar bonsi hamya grao gibin gibin jang siji hi bokhe ran ba.
Jisu bisar ha song ba
(Mt. 26.59-66; Mk. 14.55-64; Jn. 18.19-24)
66Phorongma ha, Hojarao, Jonthairao ar Dara khe slingriyarao, bojom jalai hi Sanhedrin ha bo khe langpha ba. 67‘Ning Krista ning thikha de, jing khe thi lah’! bonsi thi ba.
Bo bonsi khe thiphin ba, “Nisi khe ang thi re thikhade, nisi ang khe lon nang niya, 68ang nisi khe grao sing re thikhade, nisi ang khe thiphin nang niya. 69Thikhabo, duha ni phrang de Marsini Basa judao thaoyaba Madaini yaoda gede ha khamba khe nisi nu nang.”
70Bonsi khrip thilai ba, Ode thikhade, ning Madaini Basa ning?
Bo thiphin ba, Nisi ang ning thihi thi du.
71Ode, bonsi thi ba, Gibin sakhi musi jing nangdaoya kha! Bo jarni khuh jang thiyaba khe jing khna kha.
Currently Selected:
LUKE 22: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
