DANGYASARAO 4

Peter jang Johan bisar ha song ba

1Peter jang Johan, subung buthu niha bonsi grao sainthiba ha, Jonthairao, Bikhoh ni hojarao, Saddukairao, bonsi ni gede srap sophai ba. 2Bonsi malaine sling rihi ode, Jisu ni dara jang githi ni bising ni phrang baijaphin bani grao khe bonsi thibani, bonsi khah ha hamsi ning jajaoya ja ba. 3Ode, bonsi, bonsi khe remhi, sainbli jakha bani dakhna sosi ne khlai hi phatho ha bonsi khe jeb ba. 4Thikhabo, grao khnayarao subung gabang mani ba; bangba ja kha de miyahrao gaja rjing bowa lai ja du.

5Odehe, gibin basain ha bonsini hojarao, khraorao, Dara khe slingriyarao, Jerusalem ha bojom ja ba, 6Jonthai dedao thaoyaba Anna, Kaiapha, Aleksandra, Jonthai dedao thaoyaba ni bumu buthu khrip jang dong ba. 7Peter jang Johan khe boni gejer ha bonsi song ri ba, Ebo khusi khe sereni hukhum jang, sereni bumu jang nisi dang ba? thihi bonsi sing ba.

8Peter de Bese Gathar jang gablai hi, bonsi niha, Khrip subung hojarao, 9subung raoyayaba khe ham ri bani balam ha, ebo subung la bede ham ba thihi dini ang khe nisi nai nai kha de, 10nisi khrip bo tharmai lah, Israel ni khrip subung bo tharmai la thing, Nazareth Jisu Krista khe kross ha nisi dikthai hi Madai ning subung githi ni bising ni phrang bokhe baija ri phin kha; boni bumu jang bo subung de eraha nisini sagang ha song du. 11Ebo ning Madai ni laisi ha thiyaba,

Nisi noh dangyarao, nisi longthai dangkhlaiyaba,

bokhe suhi longthai nangdao thaoyaba ja kha, thiyaba bo ning ja kha.

12Gibin saosi niha bo sogoma giri, nokhasao ni bakhla ni subung buthu ni bising habo jing khe sogo mani gibin bumu musibo giri, ode bo thi ba.

13Peter jang Johan khitha raoba khe bonsi nuhi, laisi ringyayarao ode sida sada subung se thihi bonsi tharmai hi, bonsi gmang lai ba. Jisu niha bonsi dongba thihi bonsi tharmai kha. 14Thikhabo, bonsi hamriyaba subung khe bonsi ni rogong ha songba nuhi, musi khebo bonsi niya phuya kha. 15Odebani, bonsi bisar ni phrang bonsi khe haiha bani yaohon ha, bonsi jar jang jar sainlai ba. 16Ebo subung buthu khe jing bede khlai ma? Gmang thaosisiyaba khusi bonsi dang du thihi Jerusalem ha dongyarao khripbo khna thar kha, jing bo niya phuya, 17thikhabo, subung niha ebo grao ar gublungya mane khlai hi, duha ni phrang saosi nihabo ebo bumu jang grao thiya mane khlai hi jing ran nang, ode bonsi thi ba.

18Odebani, bonsi khe bonsi longhi, Jisu ni bumu lahi grao thiya mane bonsi magna ba. 19Thikhabo, Peter jang Johan de bonsi niha, Madai ni muthai jang Madai ni grao khe maniba thane, nisi ni grao khe maniba jadao, bokhe bao lah. 20Jing de jing jinis nuyaba jang khnayaba buthu khe sainthiya hi dongphuya, ode bonsi thi ba. 21Odehe, bonsi khe ranphin daohi, bonsi haiger ba. Subung bang bani saja ri mane bonsi hajora maiya; bonsi khusi dang bani khrip subung bo Madai khe bakhan khlai lai du. 22Bo gmang thaosisi khlai hi ham riba de nokha maithai jang bisagin thane bo bangdao kha.

Lonyarao ni bithai

23Peter jang Johan de bonsi goba jang bonsi ni dol buthu ni bising ha thang hi, Jonthaimarao jang khraorao bonsi niha thiyaba khrip grao khe khna rithar ba. 24Bo grao buthu khe khnayarao de khurang baosi jahi bol jang Madai niha, Gabra, ning pirthi buthu, nokhasao buthu, sagor buthu, ode boni bising ha dongyaba khrip khebo, ning se slam ba; 25ning ning Bese Gathar jang, jini greng nini dangyasa David ni khuh jang ebo grao khe thi ba;

Jentailrao snadi jabani bonsi thamsi baigo ba?

Khrip jadi snadi jabani jinis haglai khe bonsi bao ba?

26Gabra jang boni Krista ni basao ha la,

Habsao ni rajarao bonsi naijiya ja ba,

Hojarao bo bonsi longthim lai ba.

27Ebo nolei ha de nini dangyasa gathar, ning thao huyaba Jisu ni basao ha, Herod jang Pontia Pilat jang, Jentailrao jang Israel subung buthu gibi jang bonsi longthim lai ba. 28Nini yao jang nini khasu jang khah mane khlai hi ning sagang ha ning salai dayaba bokhe ning bonsi dang du. 29Odebani, duha O Gabra, bonsi ni raothai buthu khe nai lah; nini lengrao khe khitha raoma jang nini grao khe sainthi ri lah. 30Subung buthu khe ham ri mani khlai hi, nini yao khe phlao lah; ode nini leng Jisu ni bumu jang sin ode gmang thaosisiyaba khusi dang phunu ri lah, thihi bonsi bi ba.

31Bonsi bi blaiba jang bonsi ni dongthan noh khe smao hi, bonsi khrip bo Bese Gathar jang gablai hi, khitha rao dada Madai ni grao khe sainthi kha.

Khrip yaowai phalai bani grao

32Lonyarao de khah masi, baothai masi jahi bonsi dong ba; bonsi ni bising ha masi bo bonsi ni rang dongyaba khe, Ani se thihi thiya; khrip jinis khe bonsi yaowai phalai re. 33Apostolrao de raothai jang Raja Jisu thang hi baija phinyaba ni grao khe sakhi rihi, bonsi khrip ni basao ha hamsi ning khasaoma dong ba. 34Bonsi ni bising ha saosi bo suliya jaya, hah buthu, noh buthu, bonsi niha dongyaba si khe bonsi phain hi boni dam khe labu hi, 35Apostolrao ni igah rogong ha bonsi deng re; ode, bonsi nangyaba khe jagothai khrip ne bonsi ron re.

36Ode, Josef, Levi jadi ni subung, Kupra hahgojo ha dongyaba, Apostolrao bokhe Barnaba thiyaba (boni bumu ni ortho de santi ni basa) de, 37jarni hah dongyaba khe phain hi, boni dam khe labu hi, Apostolrao ni igah rogong ha deng kha.

Currently Selected:

DANGYASARAO 4: DIMASBSI

Highlight

Copy