DANGYASARAO 10

Peter jang Korneli

1Kaisari nolei ha bumu Korneli thiyaba, subung saosi dong ba. Bo Italy dol thiyaba ni siphaiya rjasi ni hoja se. 2Bo Madai khe maniyaba subung se, bonsi nokhorsi bo Madai khe khin re; ode, malai ne gabang jinis ri re, ar Madai niha bo bonsi hamsi ning bi re. 3Bo ning sainbli japhai hi, saomi lai ragao sisi saogari jang Madai ni degla saosi boni ha hapsing hi, bokhe grao thiba khe nu ba, O Korneli, thihi.

4Bo hamsisi nai dada khin ba, ode O Gabra, snadi? thihi sing ba.

Sorgo ni degla thiphin ba, Ning biyaba buthu jang jinis yaophayaba grao buthu khe wainso mane khlai hi, Madai niha sohi kha. 5Duha, Joppa nolei ha subung haiha hi, subung saosi, Simon Peter thiyaba khe long tha. 6Migur slamyaba Simon ni noh ha naorai jahi dong, boni noh jakha de sagor ni dergong ha dong. 7Sorgo ni degla thang bani yaohon ha, Korneli jarni dangyasa ode Madai khe maniyaba siphaya saosi khe long ba. 8Bonsi gini niha bo khrip grao khe sainthi blai hi Joppa nolei ha bonsi khe haiha kha.

9Gibin basain ha, bonsi thangba ha, nolei gabasi ha sohi ba jang, Peter, sainjer ni makham jima ni bubli ha, Madai bima ni khlai hi, noh khim basao ha bo gakhu ba. 10Bo hukhrijao phai hi, makham jima nangjao kha; thikhabo, bonsi ji mane salaiba ha ning, phain merei jao kha. 11Nokhasao khuru hi sma ba bokhoh masi rih gedeba lai, sersi giding bogrong grongbri ni phrang khathai dada hah ha dikkhlai ba khe bo nu ba. 12Boni bising ha de, igah gongbri ode hang gnang ar basao ha khrip jadi dao bo dong ba. 13Boniha, masi khurang jang, Peter, baija hi, sthai hi ji lah, ode bo thiphai ba.

14Thikhabo, Peter thi ba, Gabra, ang jiya dou, gathar niyayaba jang gathar khlaiyayaba asaba khebo ang jiya.

15Phingin, khurang jang, Madai gathar khlaiyaba asaba khebo ning gathar niya da thi, ode thi ba. 16Olei ning phintham ja kha, boha srap bo nokhasao ha sugu phin lang la kha.

17Peter saomi lai nuyaba khe, bo la snadi ja kha thihi khah waimu nang hi dongba ha, Korneli subung haihayarao Simon ni noh khe singso kha, ode boha ning bonsi derga kholei ha songphai hi, 18bonsi jirik ba, Simon, Peter thiyaba, eraha naorai jahi dong ba? thihi bonsi sing ba.

19Peter boni saomi ni grao khe baohi dongba ha, Bese jang bokhe thi ba, Nai lah, ning khe subung gini smai du, 20odebani, baija hi, akhai dada, musi khebo lonya jaya hi bonsi ni yaohon rikpha lang lah. Bonsi khe ang ning haiha ba se. 21Odebani, Peter bo buthu ni sagang ha bo akhai hi, bonsi khe thi ba, Nisi smaiyaba de ang ning, nisi snadi khusi jang phai ba?

22Bonsi thiphin ba, Korneli, siphaya rjasi ni hoja, jing khe haiha ba. Bo Madai khe khinyaba, Juda jadi khripbo man khlaiyaba, ar gibi subung se. Bo niha sorgo ni degla saosi nujao hi, ning khe boni noh ha thang mane longha du, ning grao sainthiyaba khna mane khlai hi. 23Subung buthu khe noh ha longsing hi, bonsi khe thu ri kha.

Gibin basain ha, baija hi bonsi jang baosi bo thang ba, Joppa nolei ni subung sereba sereba lonyarao bo bonsi jang baosi thangpha ba. 24Gibin basain ha, Kaisari nolei ha bonsi hapsing hi kha. Ode, Korneli de boha jarni apnarao ode jarni lugu khathik buthu khe bo longthim hi, bonsi khe jonhi ning dong ba. 25Peter hapsing ma jaba ha, Korneli khe bo lamjao hi boni igah rogong ha yasgu thuhi Madai khe khlimba lai bo khe khlim ba. 26Thikhabo, Peter bokhe yao remkhu hi, Song lah, ang bo subung se, thihi thi ba. 27Bo jang baosi sainlai hi ning, noh bising ha hap ba, oraha subung gabang bojom jaba hi dengba khe bo nu ba. 28Bonsi khe Peter thi ba, Juda jadi gibin jang dongpha lai ba bo gathar niyathai khe nisi ning mithi du; thikhabo, Madai ang khe thi du, asaba subung khe bo gathar gusu da thi. 29Odebani se, ang musibo thiyahi nisi longba jang phai ba, duha ang nisi khe sing du, snadi khusi ni khlai hi ang khe long ba?

30Korneli thi ba, Nokha saintham ja kha, ang jarni noh ha phintham hading ha biba ha, subung saosi rih guphu jnayaba khe phin hi ani sagang ha songphai hi, thi ba, 31Korneli, ning biyaba khe khna ha kha, ode ning jinis yaophayaba buthu khe bo Madai tharmai kha, 32Odebani, Joppa nolei ha subung haiha hi Simon, Peter thiyaba khe nini ha longha lah, bo sagor ni dergong ha, migur slamyaba Simon ni noh ha naorai jahi dong, 33Odebani, nini ha ang srap subung haiha ba se; ning phai kha ham kha dou. Odebani, Gabra ning khe snadi grao thiba bokhe khna mane jing khripbo Madai ni sagang ha dong ba se.

Peter grao thiyaba

34Boha Peter thiba, Madai de subung hamjaodao hamjaoyadao jaya thihi gibi jang ang tharmai du; 35thikhabo, khrip jadi ni bising habo sere bokhe khin hi, hamba khusi dangyaba si de, bo khaja jaoyaba subung jama se. 36Bo ning, santi ni hamba graojma, Jisu Krista ni khuh jang sainthi hi Israel greng buthu niha grao haiha ba, (Jisu de khrip subung ni Gabra se). 37Johan baptisma ni grao khe bai bani yaohon ha, Galili raji ni phrang jenhi, Juda raji ni khrip haphai ha grao gublung tharba khe nisibo mithi du thi. 38Nazareth Jisu ni balam ni grao de, olei bokhe Madai ni Bese Gathar jang raothai ha lupha hi bo subung ni basao ha hamba khusi dang ba, ode Soithan jang dukhu rijaoya ba khrip khebo ham ri phalang re. Bede thikhade, Madai bo jang baosi dongpha du. 39Juda raji jang Jerusalem ha bo khusi dangyaba buthu khrip ni jing ning sakhi se. Bokhe de kross ha dikpha hi bonsi sthai kha. 40Thikhabo Madai ning bokhe nokha sain tham ha bo mathang phin hi, gibi jang bonsi ne phnu ri phai kha. 41Ode khrip subung niha niya hi, boni grao ni sakhi ne khlai hi sagang ha, Madai ning saikho kha, jing ning subung githi ni phrang baijaphin bani yaohon ha bo jang baosi jipha laiyarao lingpha laiyarao se. 42Bo githirao jang thanghi dongyarao ni basao ha bisardar ne Madai salaiyaba de ebo ning thihi, subung buthu niha bai mane ode sakhi ri mane khlai hi Madai ning jing khe sani ba se. 43Sere bokhe lon du, boni bumu ni khlai hi phap buthu ni map mai ma se thiyaba boni balam khe gorasalirao khrip bonsi sakhi ri du, bo ode thi ba.

Jentailrao Bese Gathar mai ba

44Odehe, Peter grao khe thisaiba ha ning grao khnayarao khrip ni basao ha Bese Gathar sophai kha. 45Judarao ni bising ha lonyarao, Peter jang baosi phaiyarao, Bese Gathar riyaba khe Jentailrao ni basao habo lukhru bani hamsi ning gmang ba. 46Bede thikhade, grao jophuyayaba jang grao thihi, Madai khe bakhan khlaiba khe khna kha. 47Ebo ni balam ha, Elei subung buthu, jing lai Bese Gathar maiyarao de bonsi baptisma jaya mane khlai hi dih yaowaiba khe sere mathao phuma? thihi Peter thi ba. 48Odebani, Jisu Krista ni bumu jang baptisma ri mani grao ri ba. Boni yaohon ha basain glao dongthao mane khlai hi bonsi bokhe khainsu ba.

Currently Selected:

DANGYASARAO 10: DIMASBSI

Highlight

Copy