ROM 4

Abraham Taküm Tatishitsü

1Ajangla asen tebou Abrahami shi tsütsü nungi kechi tajangzük angu ta aseni ashitsü? 2Kechiyong Abraham mapa agi metentsüra pai asükümtsü akok. Saka Tsüngrem matsüngdang masü. 3Kechiyong Laishibai kechi ashir? “Abrahami Tsüngrem dak amang, aser pa tamang asoshi Tsüngremi pa temeshi ta züngshi.” 4Kechiyong nisung kati mapa inyakra, pa taaji sempet ama masü saka sentsüh ta züngshir. 5Saka shibai mapa meinyaki ochi mashiba pur metendaktsüsang dak amangdir, pa tamangji temeshiba ama züngshitsü. 6Tsüngremi shiba dang mapa medeni temeshiba ta züngshir pa tepelatsü, iba indang Dawidi yamai ashir:

7“Shirnok tai tokogo, aser shir temenentem endoktsüogo parnok tepelatsü.

8 # TKe. 32.1 Shiba dak Kibubai temenen sentsüh mezüngloktsü,

iba nisung tepelatsü.”

9Anungji iba tepelatsü mejeptokba pur asoshi dang asü mesüra memejeptokba pur asoshia alitsü? Kechiyong asenoki ashir, “Abraham pa tamang asoshi Tsüngremi pa temeshi ta züngsem.” 10Ajangla aji koda züngshi? Pa mejeptoker külen asü, mesüra memejeptok dang? Pa mejeptoker külen masü, saka memejeptoki alidang liasü. 11Memejeptoki alidang pa tamangji temeshiba ta züngshitsü atema pai temejeptokbaji agizük. Anungji memejeptokia shirnoki amangdir parnok ajak tebuji pa akümtsü, aser parnok tamangji temeshiba ta züngshitsü. 12Ano temejeptokertem oda yimya ka nung mejeptokba pur masü, saka asen tebu Abraham pa memejeptok dang akaba tamang tsüngsü nungji anitakertem tebu akümtsü asoshi pai temejeptokba temaitsüji agizük.

Tamang Ajanga Tenangzükba Agizük

13Tsüngremi Abraham aser pa semchirtem nem parnoki alima senmang amangtsü ta tenangzükba agütsübaji ozüng ajanga masü, saka tamang temeshiba ajanga lir. 14Kechiyong ozüng benshirtemji senmangertem kümdaktsüra, tamangji tazüngla aser tenangzükbaji amajok akümer. 15Kechiyong ozüng jagi terasaba bener arutsür, saka kong ozüng maka idakji ozüng dang tashi mangabaji mali.

16Abrahamji asenok ajak tebou asünung tenangzükbaji ozüng benshirtem dangiang masü, saka pa tamang lemsatepertem; oda pa semchirtem ajak dangi ibaji Tsüngremer angati sempet ka ama mela-a lir, ibaji tamang dak metaloka lir. 17Zülua aliba ama, “Kin aika tebu ni na kümdaktsüogo.” Kechiaser Tsüngrem shiba dak Abrahami amang aser shibai tasür takümdaki shia arudaktsür; aser khenyongi maliba osettem pa ozüng agi poktetdaktsür pa madang tenangzükbaji tajung lir. 18Aji oda ne semchirtemji alitsü ta pa dang ashiba amato paji kintem aika tebu akümtsü asoshi teimla maka danga pai amang aser imla. 19Aser pa küm noklang ka shi tain asünung, pa temang tasü ama aser Sarah nu menden tapung ta bilemaka, pai tamang nung kodanga tashi meiti maküm. 20Saka Tsüngrem tenangzükba nung kodanga rata-a, mesüra tamang makai maliasü, aser pai Tsüngrem nem tenüngsang agütsü 21Saka pai kechi nangzük, ibaji Tsüngremi ataloktsütsü akok ta pai jungjunga amang. 22Anungji pa tamangji temeshiba ta züngshi. 23Pa züngshi ta aliba otemji pa asoshi dang mezülu. 24Saka asenok asoshia aji zülua lir. Kechiyong shibai asen Kibuba Yisu tasü nungi shia arudaktsü, pa dak asenoki amang nung ano asenok atema asen tamangji temeshiba ama züngshitsü. 25#Isa. 53.4 Iba Yisu asen temenen asoshi bendanga agütsü aser asenok metendaktsütsü asoshi tanaben shia arudaktsü.

Currently Selected:

ROM 4: AONAGABSI

Highlight

Copy