MATHI 4
4
Yisu Atitangba
(Mar. 1.12-13; Luk. 4.1-13)
1Idangji mojing nem atitangdaktsütsü asoshi Tanelai azüngmeyakdak lisem limai Yisu anir ao. 2Pa lirnü aser lir aonung lumiseta lir külen, pa yaadok, 3aser tatitangba jagi arur pa dang ashi, “Na Tsüngrem Chir süra, item lung agi amtsük kümang ta shiang.” 4#Taz. 8.3 Saka Yisui langzü, “Ya zülua lir, nisungi am tesa agi dangbo taküm malitsü, saka Tsüngrem bang nungi adokba o shia agi alitsü.” 5Idangji mojingi pa temeshi yimti-i anir atu. Mojingi Yisu tenla ki kilem kolak nung mendaktsü; 6#TKe. 91.11 aser pa dang ashi, “Na Tsüngrem Chir süra, ne sasa tsükang, kechiaser yamai zülua lir, ‘Na atema Tsüngremi pei tenyartem dang melatsü, aser ne tetsüng lung ka nunga memetsüdaktsütsüsa parnok kabu nung na ajungkettsü.’ ”
7 #
Taz. 6.16
Yisui pa dang ashi, “Ano ya zülua lir, ‘Nai Kibuba ne Tsüngrem tatitang.’ ” 8Ano mojing jagi pa tenem kanga talang kati anir atu, aser pa dang alima yimlitem ajak aser item sentsüwangshi sayu; 9aser pai Yisu dang ashi, “Nai apudaker ni külemra, item ajak ni ne nem agütsütsü.”
10 #
Taz. 6.13
Idangji Yisui pa dang ashi, “Satan, yang nungi oadokang; kechiaser ya zülua lir, ‘Nai Kibuba ne Tsüngrem külemang aser paji dang nai tenzükang.’ ”
11Idangji mojingi pa toktsü, aser ajiang kotak tenyartem aru, aser parnoki pa tenzük.
Yisui Galil Nung Sayutsüngitsü Tenzükba
(Mar. 1.14-15; Luk. 4.14-15)
12Kodang Yohanji puogo ta Yisui angazük, pai Galili pila ao. 13Aser Yisui Nazaret toktsür oa Zebulun aser Naftali linük nung tzüyimküm nung aliba Kapernaumi arua ali. 14Ibai ainkar Isaiai shinba o ataloktsü asoshi liasü,
15 #
Isa. 9.1,2 “Bendanger meyong Galil, Yordan ajanga or,
tzüyim tsütsü aliba,
Zebulun lima aser Naftali lima,
16ammang nung mena alirtemi tesangwa tulu ka angu,
aser tasür lima aser tasüba akhüm nung mena alir dangi tesangwa adok.”
17 #
Mat. 3.2
Iba mapang nungjagi Yisui sayutsüngitsü tenzük, aser ashi, “Nenok temulung meyipang, kechiaser kotak yimli anasa lir.”
Angopur Pezü Ajaba
(Mar. 1.10-20; Luk. 5.1-10)
18Aser Galil tzüyim anasa Yisu jajadang pai adianu ana angu: Simon shiba dang Peter ta aja aser pa tenu Andria. Parnok tzüyim nungji zütsük onya liasü; kechiyong parnok angopurtem liasü. 19Aser pai parnok dang ashi, “Arung, kü sülen anitakang, aser ni nenok nisung apurtem kümdaktsüdi.” 20Idangyongjisa parnoki zütsüktem toktsür Yisu sülen anitak. 21Ano yang nungjagi oa tangar adianu ana, Zebedier jabaso Yakob aser pa tenu Yohan, rong ka nung parnok tebu Zebedi den parnoki zütsük yanglushia pai angu; aser pai parnoka aja. 22Aser idangyongjisa parnoki rong aser pei tebu toktsür pa sülen anitak.
Yisui Telok Tulu Ka Nung Sayutsüngiba
(Luk. 6.17-19)
23 #
Mat. 9.35; Mar. 1.39 Yisui Galil ajak sema, parnok sinagogtem nung sayua aser Kotak Yimli Osangtajung indang sayutsüngia, nüburtem rongnung tashitak tapu tapu aser shirangba tapu tapu anebtsüyonga ao. 24Aser Yisu nüngsang indang Siria ajak nung sangdong; aser tashitak aser timtem tapu tapu agi atonger shirangertem, temenen tanelai apubatem, nashira aketertem aser togimra aketertem ajak parnoki Yisu dangi anir aru; aser pai parnok anebtsü. 25Aser Galil, Dekapoli, Yirusalem aser Yihuda nungi, aser Yordan külen nungi telokti jenti Yisu sülen anitak.
Currently Selected:
MATHI 4: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.