MATHI 25

Aiür Ter Agi O-entepba

1“Idangji Kotak Yimliji tasüngtet aiür ter milen bener kiyimsang ajurutsü aoba mesüka alitsü. 2Parnok rongnung pungu tamashi aser pungu shisa taka liasü. 3Kechiyong tamashi pungu jagi parnok milen aben saka totzü maben; 4Saka shisa akartemi pei milen den tagi nung totzü aben. 5Saka kiyimsangji mapang talangka menua liasü aser parnok anünüa amua oadok.

6“Saka ayatrem nung ayimtenba ola adok, ‘Kiyimsang ajiang! Pa den ajuruteptsü arung.’ 7Idangji item tasüngtet aiür ajakji arameso aser pei pei milen renem. 8Aser tamashirtem jagi shisa akartem dangji ashi, ‘Nenok totzü nungjagi onok nema tera kua, kechiaser onok milen sepdagi.’ 9Saka shisa akartem jagi ashi, ‘Ashiko onok aser nenok asoshibo totzü jagi mepiritsü akok; anungji nenoki tayokertem dangiang oang, aser nenok asoshi aliang.’ 10Parnok talitsü oya alidang kiyimsang aru aser shirnok renema liasü parnok pa den benjong jagi ao; aser kishiji shibangadok.

11“Tesülen tanüngba tasüngtet aiürtemji arua ashi, ‘Kibuba, Kibuba, onok nem kishi lapokjang.’ 12Saka pai langzü, ‘atangji ni nenok dang ashir, ni nenok memetet.’ 13Anungji saksalema liang, kechiaser anogoji mesüra mapangji kodangar nenoki memetet.

Sen Mori Agi O-entepba

(Luk. 19.11-27)

14 # Luk. 19.11-27 “Kechiaser ibai nisung kati pei kilirtem ja-a arua, pei oset parnok nem bendanga agütsür linük tanga kati aoba mesüker. 15Pai ka nem sen mori pungu; ka nem mori ana aser ka nem mori ka, ta nisung shia nem pei akokba yari agütsü aser pa aeni ao. 16Idangji sen mori pungu agizükbai oa aji agi shishia, ano sen mori pungu tali ajangzük. 17Aji oda mori ana agizükbaia ano mori ana tali ajangzük. 18Saka shibai sen mori ka agizük, pai oagi ali tur pei kibur sen miima ayu.

19“Tang mapang talangka lir külen item kilir kibur aru aser parnok den senji züngdangtep. 20Idangji mori pungu agizükbai ano talila mori pungu bener arua ashi, ‘Kibur, nai kü nem mori pungu agütsü; ajiang ni ano mori pungu talila ajangzüktsüogo.’ 21Pa kiburi pa dang ashi, ‘Lanlia, tajung aser temulung lemtetba kilir, oset ishika madak ne dak temulung lemteta liasü, ni na oset aika madak yutsüdi; na ne kibur tepela daki iang.’ 22Ano mori ana agizükbaia arua ashi, ‘Kibur, nai kü nem mori ana agütsü, ajiang ni ano mori ana tali ajangzüktsüogo.’ 23Pa kiburi pa dang ashi, ‘Lanlia, tajung aser temulung lemtetba kilir; oset ishika madak ne dak temulung lemteta liasü, ni na oset aika madak yutsüdi. Na ne kibur tepela daki iang.’ 24Aser mori ka agizükbaia arua ashi, ‘Kibur, na tetokdak nisung, aser kong nai maten angji arur, aser kong nai meprok angji bendener ta ni metet. 25Aser ni tsübua liasü, anungji ni oagi ne sen mori ali nung miima ayu; ajiang ne meyong kechi aji nai angur.’ 26Saka pa kiburi langzüa ashi, ‘Tamajung aser azümesen kilir, ni kechi nung maten yangji arur, aser ni kechi nung meprok yangji bendener ta nai metet. 27Anungji sen rizünger ket nung nai kü sen yutsütsü tim liasü, aser ni arudang kü meyong dak tetemlok keter ni meyipa ngula. 28Anungji nenoki pa nungi sen moriji bener oang, aser aji mori ter akaba nem agüjang. 29#Mat. 13.12; Mar. 4.25; Luk. 8.18 Kechiaser shibasa aka pa nem tali agütsütsü saka shiba maka, pa kechi aka, ajia pa nungi bener aotsü. 30#Mat. 8.12; 22.13; Luk. 13.28; 19.11 Aser nenoki tagidak makaba kilirji kimalen tammang dakji endokang. Yangji tajepba aser tepu shitepba alitsü.’

Kintem Obendangba

31 # Mat. 16.27; 19.28 “Saka kodang Nisung Chir pei sentsüwangshi nung aser pa den tenyartem ajak arudir, idangji pa pei sentsüwangshi chuba menden nung amentsü, 32aser kintem ajak pa tsüngdang anitentsü, aser nabongtem nungi santem sannüker kati sadangba ama, parnok pai ka nungi ka sadangtsü; 33aser pai santem pa tajichilen, aser nabongtem tabelen ta ayutsü. 34Idangji Chubai pa tajichilen alirtem dang ashitsü, ‘Arung, kü Bui moatsürtem, nenok asoshi alima yangludang nungi renema akaba Yimli senmang amangang. 35Kechiyong ni ya-a liasü, aser nenoki kü nem chiyungtsü agütsü, ni tzüra-a liasü, aser nenoki kü nem jemdaktsü; ni aenersa liasü, aser nenoki ni aniok; 36mangsa alidang nenoki kü nem abendaktsü; ni shiranga liasü, aser nenoki ni semdang ni tepuokdak liasü, aser nenoki kü dangi aru.’

37“Idangji temeshipur jagi pa dang langzütsü. ‘Kibuba, kodang onoki na ya-a ngua chiyungdaktsü, mesüra tzüradang, ne nem jemdaktsü? 38Kodang onoki na aenersa ngua na aniok, mesüra mangsa alidang na abendaktsü? 39Kodang onoki na shiranga, mesüra tepuokdak ngua, ne dangi aru?’ 40Idangji Chubai parnok dang langzütsü, ‘Atangji ni nenok dang ashir, item kü adianu tilatiba rongnung ka dang tanga nenoki kechi inyak aji nenoki kü dang inyak.’

41“Idangji pai tabelen alirtem dang ashitsü, ‘Nenok atakatem kaortem, kü dang nungi aenshia, mojing aser pa tenyartem asoshi tatem makaba mi renema aliba jagi iang. 42Kechiaser ni ya-a liasü, aser nenoki chiyungtsü magütsü; ni tzüra-a liasü aser nenoki kü nem tajemtsü magütsü; 43Ni aenersa liasü, aser nenoki ni maniok; ni mangsa liasü aser nenoki kü nem mabendaktsü; shiranga aser tepuokdak liasü aser nenoki ni mesemdang.’ 44Idangji parnoki langzüa ashitsü, ‘Kibuba, na ayadang mesüra tzüradang, mesüra aenersa alidang, mesüra mangsa alidang, mesüra shiranga alidang, mesüra tepuokdak alidang, onoki kodang na ngua meyari?’ 45Idangji pai parnok dang langzüa ashitsü ‘Atangji ni nenok dang shidi, item tilatem rongnung ka dang nenoki kechi meinyak, aji nenoki kü dang meinyak.’ 46#Dan. 12.2 Itemji tatem makaba temerenshi daki aitsü, saka temeshipur teti taküm daki aitsü.”

Currently Selected:

MATHI 25: AONAGABSI

Highlight

Copy