LUK 1
1
Okila
1Tamarener Theofil; onok rongnung tatalokbatem koba indang tetenzük nung shiri tenük agi itemji angu aser aji tenzükertem liasü, 2onok nem osang koma agütsü, yamaji nisung aikati, item bendentsü meranga liasü. 3Aser iba indang tetenzük nungi ajak shitak ta ni bushiteta liasü. 4Na kechi nung sayua ali idakji ochibaji nai metettsü asoshi nia ne dangi tatongi zülutsü junger ta bilem.
Yohan Baptitsüba Asotsü Indang Shinba
5Yihuda#1.5: Idaki ‘Yihuda’ ta asüba ya Palistine ajonga liasü. nunger chuba Herod mapang nung, Abia putir-ren shilem nungi putir ka tenüng agi Zakaria, aser pa kinungtsü Aron semchir ka tenüng agi Elizabet liasü. 6Tenaprongla Tsüngrem tsüngdang temeshi liasü; Kibubar ozüngtem aser temelabatem amshia tai maket liasü. 7Saka parnok tanur maliasü; kechiaser Elizabet tapung, aser tenaprongla arishi talangka süir liasü.
8Pai pei tataren nung Tsüngrem madang tekülemba mapa inyakdang putir mapa yimsü amato, 9Kibuba temeshidaki tua liangmesen arongtsü an toktangba pa dak kao. 10Liangmesen arongba mapang telok ajongai kima sarasadema liasü. 11Idangji liangmesen arongba tenladak tajichilen Kibuba tenyar ka pa madangi adoka noktak. 12Kodang Zakariai paji angu, pa aoksa, aser tetsübu agi asüng, 13saka tenyar jagi pa dang ashi, “Tetsübuma Zakaria, kechiyong nai sarasademba angashiogo aser nebutsü Elizabeti ne nem jabaso ka sotsütsü aser nai pa tenüng Yohan ta ajatsü. 14Aser nai tepela angutsü aser ne mulung achitsü aser pa asoba nungji jentipur pelatsü. 15Kechiyong Kibuba tsüngdang pa tulu akümtsü. Aser pai yi mesüra mejemtzü majemtsü, saka pa tetsü nu menden nungi Tanela Temeshi agi sünga alitsü. 16Aser pai Israel nunger aika Kibuba parnok Tsüngrem dangi meyipdaktsütsü. 17#Mal. 4.5 Tebutem temulung techirtem dangi meyipdaktsütsü aser tashi mangabapur temeshipur shisatsü dangi meyipdaktsütsü asoshi, asen Kibuba asoshi renema alibapur renemtsütsü asoshi pa jakdang Elija tanela aser ain nung pai aotsü.”
18Zakariai tenyar dangji ashi, “Kechi koda ni aji metettsü? Kechiyong ni tambur kümogo aser yamaji kü kinungtsüa tantsür kümogo.” 19Tenyar jagi pa dang langzü, “Tsüngrem tsüngdang noktakba Gabrielji ni lir, aser ne den jembitsü aser iba osang tajung bener arutsütsü ni yoka lir, aser pa nüng temeshi lir. 20Ajiang, item ataloktsüba anogoji maru tashi na ola makai aser o mejembiteti alitsü. Kechiaser kü o koba mapang shitak nung ataloktsü aka aji nai mamang.” 21Nisungtemji Zakaria ata-a liasü pa papigaji tenla ki nung aliba asoshi parnok süngmanga liasü. 22Kodang pa kimai adok, pai parnok den mejembitet aser pai mangdang ka nguogo ta parnoki metet. Pai parnok dang temaitsü agi tuyu aser pai o mejembiteti liasü. 23Pai tataren tenzükbaji kodang atem, pai pei kidangi aru.
24Item anogoji süir pa kinungtsü Elizabet mashisa aküm, aser ita pungu tashi lai pei sasa miimshia ashi, 25“Nisung rongnungi kü maksü endoktsü asoshi Kibubai kü dang taochi agi inyakogo!”
Yisu Asotsü Indang Shinba
26Ita trokbuba nung Galil nung aliba yimti ka tenüng agi Nazaret; 27Dawid kidong nungi nisung ka tenüng agi Yosef, shibai aiür ka aniasünga liasü, la dangi Tsüngremi tenyar Gabrielji yok. Aser aiürla tenüngji Mari liasü. 28La dangi pa ao aser ashi, “Pela-a liang, na taochi kanga angula, Kibuba ne den lir.” 29Saka iba o angashiba nungji la kanga shisa bulua aküm, aser la mulung nung ya kechi amala salem o ka ta lai bilema liasü. 30Aser tenyar jagi la dang ashi, “Tetsübuma, Mari, kechiaser Tsüngrem nungi nai taochi nguogo. 31Na mashisa akümtsü aser tanur ka asotsü, aser nai pa tenüng Yisu ta ajatsü. 32Pa tulu alitsü aser pa dang Tematiba meyong Chir ta ajatsü, Kibuba Tsüngremi pa tebu Dawid chuba menden pa nem agütsütsü. 33Yakob kidong madak pai teti tatem makai chubatsü aser pa chuba yimliji tatem makai alitsü.” 34Saka Mari-i tenyar dangji ashi, “Ni kinungpu mali nung ya kechi koda takoktsü?” 35Tenyar jagi la dang langzü, “Tanela Temeshi ne dangi arutsü, Tematiba aini na akhümbangtsü. Anungji tasotsü aliba tanur dang Tsüngrem chir ta ajatsü, 36aser ajiang, ner kinunger Elizabet la tantsür liaka, la dak tanur ka tangloka la mashisa lir aser shiba dang tapungla ta aja la mashisa kümer ita trokbuba lir. 37Kechiaser Tsüngrem denbo kecha tamakoktsü malitsü.” 38Aser Mari-i ashi, “Ni Kibuba tenzükla, kü dang ne o amaji lidakjangma.” Aser tenyar jagi la nungi pila.
Mari-i Elizabet Semdangba
39Item anogo nungji Mari-i aramesoa tenem linük nung aliba Yihuda yimti jagi ilunga ao. 40Lai Zakaria kidangi ai aser Elizabet dang salem ashi. 41Kodang Elizabeti Mari o angashi, la nu menden nung tanur jagi pungten, aser Elizabet Tanela Temeshi agi asüng. 42Aser lai ola tulu agi ayimtena ashi, “Tetsürtem rongnung na temoatsüba aser ne nu menden tejang temoatsüba. 43Kü Kibuba tetsü kü dangi arutsüsa kechiba ya kü dak ang ataloker? 44Kechiaser ajiang, ne salem o kü narongi aidang kü nu menden nung tepela agi tanuri pungten. 45Kibuba nungi la dang, kechi jembiogo aji ataloktsü ta shibai amangogo la temoatsüba.”
Mari-i Atenba Tenüngsang Ken
46 #
1 Sa. 2.1
Aser Mari-i ashi,
“Kü nelai Kibuba uludaktsür,
47aser kü nelai kü kümtetdakba Tsüngrem dak pelaseter,
48 #
1 Sa. 1.11; 2.1 Kechiaser pai pei tenzükla ajemaluba züngshiogo,
kechiaser ajiang tang mapang nungi putu ajaki kü dang temoatsüba ta ajatsü.
49Kechiaser shiba Takoksang lir,
pai ni asoshi mapa tulu inyakogo, pa tenüng temeshi lir.
50Pa tsüburtem madak pa yimlibilem putusa putu alitsü.
51Pai pei teka agi pei tashi sayu,
temulungjang nung asüküm bilemba nisungtemji pai prokshidaktsüogo.
52 #
Yob. 5.11; 12.19 Pai chubatem parnok chuba menden nungi aludaktsüogo;
aser ajemalurtem ajungketdaktsüogo.
53Ayabatem tajung agi pai parnok tiptemdaktsüogo.
Aser takartem pai tazüng yokogo.
54Pai pei tenzüker Israel dang,
pa yimlibilem bilemtettsü asoshi yariogo,
55 #
Lip. 17.7; 1 Sa. 2.1 Asen tebutem dang ama,
pa metsü Abraham dang teti asoshi jembiba ama.”
56Aser Mari-i la den ita asem shi ali, aser lar kidangi meyipa ao.
Yohan Baptitsüba Asoba
57Elizabet asoshi nu amungtsü anogo abensa aru aser lai jabaso ka aso. 58Aser lar kiyongertem aser kinungertemi la dang Kibubai yimlibilem tulu sayuba indang angashi aser parnoki la den pelatep. 59Idangji anogo tinübuba nung parnoki pa mejeptokdaktsütsü aru, aser parnoki tebu nüngten Zakaria jadaktsünü. 60Saka tetsüi ashi, “Masü, pa tenüng Yohan ta ajatsü.” 61Parnoki la dang ashi, “Ner kinunger rongnung iba tenüng agi ajaba shinga mali.” 62Pai jabasoji shiba jadaktsünür ta parnoki tebu dang temaitsü sayu. 63Tezülutsü lungpak ka pai meshi, aser zülu, “Pa tenüng Yohan.” Idangji parnok ajak pangka. 64Idangjisa pa tebang lapokadok aser temeli saladok aser Tsüngrem sanga o jembi. 65Aser parnok kiyongertem ajak madaki tetsübutsü alu aser Yihuda tenem linük ajaklen item ajak indang jembia liasü. 66Item angashir ajaki ya pei mulung nung yua ashi, “Süra, iba tanur kechi asütsü?” Kechiaser Kibuba teka pa den liasü.
Zakaria Shin O
67Aser tanur tebu Zakaria Tanela Temeshi agi sünga shina ashi:
68“Israel Tsüngrem Kibuba sangdakjang,
kechiaser pai pei nübur semdangogo aser parnok alangzükogo.
69Pa tenzüker Dawid kidong nungi asenok asoshi,
tekümtet tezü ka pai adokdaktsüogo.
70Asen tebutem dang ainkartem ajanga akhi mapang nungi koba pai jembi;
71oda asen tsükchirtem nungi aser asenok sempartem ket nungi asenok kümzüktsü.
72Aji oda pai asen tetsüteboutem dang yimlibilem nangzükba ataloktsütsüsa aser pa temeshi tezüngzüktepba bilemtettsüsa;
73azüngashiba koba pai asenok tebu Abraham dang azüngashi;
74oda asenokji tsükchirtem nungi kümzüker külen tetsübu makai;
75pa madang temeshiba aser ochishiba nung,
asen arishi tepiyong pa tenzüktsüji asenok dang melatsü.
76 #
Mal. 3.1
Aser tebusang, na Tematiba meyong ainkar ta ajatsü,
kechiyong Kibuba jakdang pa lenmang renemtsütsü asoshi na aotsü.
77Oda pei nübur nem parnok taitem atokba ajanga,
tekümtet metetba shisatsü agütsütsü.
78Asen Tsüngrem temeim yimlibilem agi temalen nungi,
anogo tasen ka adokba jagi asenok semdangtsü.
79 #
Isa. 9.2
Ammang aser tasüba akhüm nung amenbatem manung sangwatsü asoshi;
tesünep lenmang leni asen tetsüng anitsü asoshi na Kibuba jakdang pa lenmang renemi aotsü.”
80Aser tanurji ain, aser tanela nung tashi ita aküm aser Israel dang pa sayuba anogo matong tashi pa lisem lima arem nung ali.
Currently Selected:
LUK 1: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
