YOHAN 15

Yisu Chichiba Tsükmenatzü-zü

1“Ni chichiba tsükmenatzü-zü, aser aluyimsangji kü Bu. 2Kü dak tangloka aliba koba kongsangisa süngjang metanglir, pai aji leptoker aser koba kongsangisa süngjang tangdir; tali tangdaktsütsü asoshi pai aji jemteta merüktettsür. 3Ni nenok dang jembiba o agi joko nenokbo meshiteta lir. 4Kü dak liang aser nia nenok dak alitsü. Tezü dak tangloka melira kechi koda kongsangi süngjang metangtet, yamaji nenoka kü dak tangloka melira nenokia süngjang metangtet, 5Ni tezü aser nenok kongsangtem. Shiba kü dak lir aser ni shiba dak alir, pa jagi süngjang jenti atangtsü; kechiaser ni nungi pila-a nenoki kecha meinyaktet. 6Kari kü dak melira, pa kongsang ka ama endoker aser akonger; item kongsangtemji bendener aser mimong nung enoka aronger. 7Nenok kü dak lira aser kü otem nenok dak lira, nenoki kechisa aginür meshiang aser aji nenok asoshi inyaktsü. 8Nenoki süngjang jenti tangja aser kü nütsüngtem ama aliba agi kü Bu sentsüwangshidaktsür. 9Kü Bui kechi koda ni meim nia aji oda nenok meim. Nenok kü temeim nung liang. 10Ni kechi koda kü Bu ozüngtem benshir aser pa temeim nung alir, yamaji nenoki kü ozüngtem benshira, nenoka kü temeim nung alitsü.

11“Kü tepela nenok dak alitsü aser nenok tepela peridaktsütsü asoshi ni nenok dang itemi jembiogo. 12#Yoh. 13.34; 15.17; 1 Yo. 3.23; 2 Yo. 5 Ni nenok kechi koda meim, aji oda nenoka kati ka den meimtepang. Ibai kü temelaba ozüng lir 13Nisung kati pei tembartem asoshi pei taküm agütsüba dang nungi tuluba temeimji shinga daka melika. 14Ni nenok dang kechi melar aji nenoki inyakra, nenok kü tembartem lir. 15Joko ni nenok dang kilirtem ta majar, kechiaser kilir kati pei kiburi kechi inyaker aji memeteter. Saka ni nenok dang tembartem ta jaogo, kechiaser ni kü Bu nungi angashiba ajak nenok nem metetdaktsüogo. 16Nenoki ni meshimtet, saka niang nenok shimtet aser nenoki oa süngjang atangtsü, aser aji arishia alitsü asoshi ni nenok shimtet. Anungji nenoki kü nüng nung Tebu dang kechisa meshidir aji pai nenok nem agütsütsü. 17Ibai ni nenok dang melar: Nenoki kati ka den meimtepang.

Alimai Sempatsü

18“Alimai nenok sempara, iba jagi nenok mesempadang tamasa ni sempa ta nenoki bilemtetang. 19Nenok alima meyong asübo alimai pei meyong meimla; saka nenok alima meyong masü, joko ni nenok alima nungi shimtet, ajagi alimai nenok sempar.

20 # Mat. 10.24; Luk. 6.40; Yoh. 13.16 “Pei kibur dang kilir tuluba masü ta ni nenok dang ashiba o bilemtetang. Parnoki ni rishikangshi süra, ajangla parnoki nenok rishikangshitsü, parnoki kü o angara, ajangla parnoki nenok o a angatsü 21Saka parnoki kü nüng atema nenok dang ya ajak inyaktsü, kechiaser parnoki ni tenyaba meshitet. 22Ni arur parnok dang mejembi asübo parnok temenen melila, saka tangbo parnok temenen asoshi tejentetlen maka. 23Shibai ni sempar pai kü Bua sempar. 24Koba mapatem tangar shingaia meinyaktet item mapatemji parnok rongnung ni meinyak asübo parnok temenen melila; saka tangbo parnoki nguogo aser kü Bu künaprongla sempaogo. 25#TKe. 35.19; 69.4 Saka kecha kuli makai dang parnoki ni sempa ta par ozüng nung zülua aliba o ataloktsü asoshi ya adoker. 26Saka teyarir, oda Ochi Tanela, shiba Tebu nungi adoker, Pa ni nenok dangi yoktsü aser Pa arutaka nungi Pai kü indang kuli asütsü. 27Aser nenoka kü kulitem asütsü, kechiaser tetenzük nungi nenok kü den lia arur.

Currently Selected:

YOHAN 15: AONAGABSI

Highlight

Copy