TENYARTEM MAPA 24
24
Paul Anema o Abenba
1Pungunü lir külen tamburtem aser obendanger ka tenüng agi Tertula aser temaba putir Anania Kaisariai alu aser parnoki Paul anema governor dangi o aben. 2Kodang Paul aja, Tertulai pa aitsümesoa ashi, “Tamarener Felik, na ajanga onoki tesünep tulu angu nung aser nai anebaluba agi iba kin asoshi tamajungbatem metongshia kümdaktsü nung, 3onoki teti iba lenmang atema ne nem tetushi agütsür. 4Saka ano na melakdaktsütsü asoshi nai onok o ishika yimlibilema angatsü mepishir. 5Kechiaser iba nisung ya minprung agütsüba nisung ka aser alima ajonga nung Yihuda nunger rongnung rongrongshishi adokdaktsür nisung ka, aser Nazaren telok rongnung leniba ta onoki ngua aruogo. 6Iba dakji alaka pai tenla ki menendaktsütsü merang, aji asünung onoki pa apu aser onok ozüng amato onoki pa o bendanger. 7Saka meyi madak tanishiba Lusia aru aser tashiyim agi pai onok ket nungi anizüker ao. 8Aser pa aitsürtem ne dangi arudaktsütsü ozüng agütsü. Kechisünung onoki pa aitsü, item ajak ya nai ne sasa pa atitangba agi metettsü.” 9Aser Yihuda nungertemi itemji shitak ta shia taitsüba o nungji asem.
Pauli Felik Tsüngdang Temeten O Jembiba
10Kodang governori Paul dang jembitsü asoshi tuyu, pai langzü, “Küm aika iba kin asoshi nai ochi obendang agüja aru ta ni metet, anungji tang ne tsüngdang ni kü temeten o jembitsü pelar. 11Kechiaser ni Yirusalemi atuba anogoji tanü agi anogo terana dang süiogo ta nai metettsü. 12Tenla kidang süshia, sinagog nung süshia aser yimti nung süshia ni shinga dena bangsentepa mesüra telok rongrongdakja parnoki kodanga munguka. 13Taitsüba kechisa parnoki tang ni anema ne dangi bener arur, parnoki aji ochi kuli ta meshitettsü. 14Saka Ozüng nung aliba otem ama, aser ainkartem kaket nung kechisa zülua ali item ajak amanga parnoki koba dang tiyazü telok ta ajar iba lenmang ama ni asen tsüraburtem Tsüngrem külemer ajibo ni ne dang nangzüker. 15Temeshipurtem aser temenen purtem anaprongla shia arutsü ta parnoki amangba amaji nia Tsüngrem dak amanger. 16Aji asünung Tsüngrem aser nisung tsütsü mulungsentsü tajung akatsü asoshi nia kü sasa teti meranger.
17“Tang küm ka renteter külen, kü kin asoshi sempet aser tenla bener arutsütsü ni aru. 18Ni temeshitetba mapa agir külen item agüja alidang, parnoki ni tenla kidang angu. Kü den telok mali asü mesüra rongrongba kecha mali asü. Saka Asia nungi Yihuda nungertem kar idakji liasü. 19Parnok ni anema taitsüba langka lira ne madangi arua ni aitsütsüla. 20Mesüra idaki alirtem dang ni parnok mungdang madak noktak dang kechi taisa parnoki angu aji shidakjang. 21Ni noktaker parnok rongnung tasürtem shia arutsü ta ayimtenba atema dang tanü ni ne tsüngdang obendang dak noktaka lir.” 22Saka Feliki Lenmang indangji junga meteta alinung, pai parnok dang ashi, “Kodang meyi madak tanishiba Lusia aludir, nenok o ni bendangtsütsü.” 23Aser noklang madak tanishiba dang Paul tepuokdak nüka ayutsüla ta pai ozüng agütsü. Saka pa sünütsü südaktsütsüla aser pa tembartemi pa nüngdak ajak nung yaritsü tesongtem ta pai mela.
Paul Tepuokdak Aliba
24Saka anogo kar süir külen, Felik aser pa kibutsü, Yihudatsür Drusila den külemi aru aser Paul jaoka Khrista Yisu dak amangba indangji pa nungi anga. 25Aser kodang pai temeshi aser pei sasa azüokba aser tarutsü obendangba indang kuli agüja jembi, Felik kanga tsübuadok aser pai langzü, “Tan asoshibo odang oang; mapang tajung ka adokdang ni na kü dangi jadi.” 26Pauli pa nem sen agütsütsü ta Feliki imla-a liasü; aji asünung pa aiben jar pa den jembia liasü.
27Saka kodang küm ana rentet, Porkia Festai Felik melen. Aser Yihuda nungertem peladaktsütsü asoshi, Feliki Paul tepuokdak toktsü.
Currently Selected:
TENYARTEM MAPA 24: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
