TENYARTEM MAPA 23

1Pauli Mungdang nungertem dak rangketa ajia ashi, “Adianutem, tanü tashi Tsüngrem madang kü mulungsentsü teindang nung dang lia aruogo.” 2Idangji temaba putir Ananiai Paul anasa alirtem dang pa tebang nungji maokjang ta ozüng agütsü. 3Idangji Pauli pa dang ashi, “Hai, na jara temesüngba Tsüngremi ne dak azüktsü. Nai idakji mener ozüng nung aliba ama kü o bendanger süra ajangla kü dak maoktsütsü nai ozüng agütsüdang ne sasa ozüng raksar masü no?” 4Idangji anasa noktaka alirtemi ashi, “Nai Tsüngremer temaba putir mezüngmeshitsü ama?” 5#Ani. 22.28 Pauli langzü, “Adianutem, paji temaba putira ta ni memeteti liasü; kechiyong ya zülua lir, ‘Ner nübur yimsüsür ka dang nai tamajung mejembitsüla.’ ”

6Saka kodang Pauli parnok kar Sadukitem aser kar Farisitem ta ajitet, pai mungdang nungji ayimtena ashi, “Adianutem, nia Farisi ka aser Farisi chir ka lir. Tasürtem shia arutsü teimla aser shia aruba indang nung kü o bendanger.” 7Pai yamaji tejembidak nung Farisitem o Sadukitem na tsüngda nung obang mapu adok, aser telokji sadangadok. 8Kechiaser Sadukitemi shia aruba süshia, kotak tenyar süshia, tanela süshia kecha mali ta ashir, saka Farisitemibo item ajakji lir ta amanger. 9Aser Farisitem telok nungi Ozüng tesayur kari noktaka kanga sashia ashi, “Iba nisung dak asenokibo kecha tai majiteter, aser tanela mesüra kotak tenyar kati pa dang jembiogo ta süra kechi ali?”

10Raratepji kodang kanga sashia aküm, parnoki Paulji anükanüka shisatsütsü ta tsübua meyi madak tanishibai temerangertem ludaktsü aser parnok rongnungi pa aniteter adoka mitsai anir atutsü ozüng agütsü. 11Iba aonungji Kibubai pa anasa adoka noktaka ashi, “Tasü itang, kechiaser Yirusalem nung nai kü indang kuli agütsüba ama, Rom nunga yamaji nai kü kuli agütsütsüla.”

Paul Taküm Anema Tasa Tamajung Asaba

12Sangwa akümdang Yihuda nungertem ajak külemi obang ajema tasa tamajung ka atongtet. Paul metepset tashi parnoki kecha machitsü mesüra kecha majemtsü ta shia parnok rongnung o züngtep. 13Iba tasa asartemji parnok nisung lir dak tali liasü. 14Parnoki putiungertem aser tamburtem dangi oa ashi, “Onoki Paul metepset tashi kecha mechidangtsü ta azüngashia o züngtepogo. 15Anungji tang nenoki aser mungdang nungeri meyirijang madak tanishiba dang Paul asoshi o shitak bendangtsü ta shia, pa nenok dangi anir arutsü mepizükang; saka pa nenok anasai marudang onoki pa tepsettsü renema lir.” 16Saka Paul teyir chiri parnok ar-amenba indang lazük aser mitsai tua Paul dang aji metetdaktsü. 17Idangji Pauli noklang madak tanishirtem rongnung ka jar ashi, “Iba asanguba ya meyirijang madak tanishiba dangi anir oang; pai pa dang langka tashitsü kar.” 18Anungji pa meyirijang madak tanishiba dangi anir oa pai ashi, “Tepuokdak alisang Pauli ni aja aser asangur ya ne dangi anir oang ta asüngdang kechiaser pai ne dang tashitsü langka lir.” 19Aser meyirijang madak tanishibai pa teka nung amer aniena miima pa dang asüngdang, “Nai kü dang kechi ashitsü aka?” 20Pai ashi, “Paul indang o tali tejangjaba asüngdangtsüsa mungdang madangi asüng pa anir arutsü ne dang asüngdangtsü ta Yihuda nungertemi lemtetogo. 21Anungji parnoki na temesüzükdaktsü, kechiaser parnok nisung lir dak tali pa asoshi ar-mena lir. Parnoki pa metepset tashi techiyunga mechiyungtsü, tajema majemtsü ta o züngtepa lir, aser joko parnoki na nungi tenangzükba asoshi ata-a renema dang lir.” 22Anungji meyirijang madak tanishibai asangubaji odaktsü aser pai iba o pa dang metetdaktsüogo ta shinga dang teshi ta ashi.

Governor Felik Dangi Paul Yokba

23Tang meyi madak tanishibai noklang madak tanishir ana pa dangi jar arua ashi, “Taonung tuku baji mapang nung temeranger noklang ana, kor nung amener neter aser nü amer nisung noklang ana Kaisaria tashi aotsü renemdakjang. 24Aser Paul mendaktsütsü asoshi kor renemjang, aser governor Felik dangi pa jungjunga anir oang.” 25Aser pai shiti ka yamai zülu: 26“Tamarenba Governor Felik dangi Klaudia Lusiai salem yoker. 27Iba nisung ya Yihuda nungertemi pur parnoki pa tetepseter dang liasü. Pa Rom senso ka ta ni angazük nung temeranger anir oa ni pa kümzük. 28Kechi kuli ajanga parnoki pa anema taitsüba o bener aru aji ni metetnüa liasü, anungji ni pa parnok mungdang madangi anir aru. 29Parnok ozüng indang asüngdangbatem tsütsülen pa aitsüba dak alema pa tepuokdak ayutsüsa mesüra tasütsüsa pai tai kecha inyaka maka ta ni bushitet. 30Aser kodang iba nisung anema tasa asaba ka indang kü dang metetdaktsü, idangyongjisa ne dangi ni pa yoker, aser pa aitsürtemia ne madang pa anema taitsüba oji ashitsü ozüng agütsür yoker.”

31Anungji parnok nem ozüng agütsüba ama, temerangertemi Paul agizük aser aonung Antipatriai pa anir aru. 32Saka tasüngji parnoki kor nung amenertemji pa den aotsü toktsür parnok mitsai meyipa aru. 33Parnok kodang Kaisariai aru parnoki shitiji Governor nem agütsü, aser Paul-a pa madang yutsü. 34Governori shitiji züngdanger külen, pa koba linük nungi ta asüngdang. Kodang pai pa Kilikia nungi ta angazük; 35pai ashi, “Kodang na aitsürtem arudir, ni ne o ajak angatsü.” Aser pa Herod chuba kidang yur nüka ata-ang to ozüng agütsü.

Currently Selected:

TENYARTEM MAPA 23: AONAGABSI

Highlight

Copy