TENYARTEM MAPA 21

Paul Yirusalemi Atuba

1Onoki parnok nungi pilar külen, rong nung indang indanga or Kozi aru, aser tanünüji Rodai ao; aser idak nungjagi Pataria ao. 2Fonikai aoba rong ka ajurua onoki ajagi ai aser ao. 3Onoki Kupra asetkong linük ngua aru, saka aji tabelen yutsür onoki Siria leni ao; aser onoki Tair leni alu kechiyong rongji idakji khu anenzüktsü liasü. 4Idakji onoki nütsüngtem ajuru aser anogo tenetnü amung. Tanela agi ajungshia parnoki Paul dang na Yirusalemi to ta shia liasü. 5Saka kodang anogoji abensa onoki aji toktsür pei lenmangi ao. Parnok ajak kinungtsürtem aser tanurtem dena onoki yimti majang tashi amung tonga parnoki onok meinoktsü. Aser tzüküm nungji onoki apudaka sarasadem. 6Idangji onoki tepila o jembiteper külen rongi ai.

7Aser onoki maneni Tair nungi rong nung apusoa Tolemai atong aser adianutem nem salem agüja parnok den anogo ka onoki amung. 8Tasüngji onok idak nungjagi pila aser Kaisaria tonga aru; aser idakji sayutsüngir Filip, shiba Yirusalem nung dikon tenet rongnung ka liasü, par kidang tua onoki pa den amung. 9Tang iba nisunger jala tasüngtet aiür pezü shin o jembia liasü. 10Idakji onoki anogo ishika munga alidang, ainkar ka tenüng agi Agaba, Yihuda linük nungi alu. 11Pai onok dangi arua, Paul teperem naiba sü agizüker pa sasa pei tetsüng teben alen aser pai ashi, “Tanela Temeshi-i yamai ashir: Iba teperem naiba sü kiburji Yirusalem nung Yihuda nungertemi yamaji alentsü, aser parnoki pa Bendangertem ket nung bendanga agütsütsü.” 12Kodang onoki ya angashi, onok aser idakji alirtemi Paul dang Yirusalemi matutsü mepishi. 13Idangji Pauli langzü, “Nenoki jeba kechiba kü mulung raksatsür? Kechiaser ni alendaktsütsüba dang masü, saka Kibuba Yisu tenüng asoshi asütsüa ni renema dang lir.” 14Kodang onoki pa memesüzüktet, onoki anenadok aser ashi, “Kibuba mulung sangma.”

15Item anogotem süir külen onoki khu renema bener Yirusalemi atu. 16Kaisaria nungi nütsüngtem kar onok den aru, aser onok anentsü aliba Kupra nunger Mnason shiba tamapur nütsüng ka liasü, pa parnok den anir aru.

Pauli Yakob Semdangba

17Kodang onoki Yirusalem atong, adianutemi onok pelashishia agizük, 18Tasüngji Pauli onok den Yakob semdangi ao, aser idakji arogo tambur ajak sentepa liasü. 19Aser pai parnok dang tepela o shir külen, Tsüngremi kechi koda pa tenzükba mapa ajanga Bendangertem rongnung inyaka liasü, item ajak osang rateta ashi. 20Parnoki aji angashia Tsüngrem nem sentsüwangshi agütsü. Aser parnoki Paul dang ashi, “Adianu Paul, Yihuda nungertem rongnungji tamanger meyirijang kwika ali nai angutsü aser parnok ajak Ozüng asoshi koma jangrabangra lir aji nai metettsü. 21Bendangertem rongnung alir Yihuda nungertem ajak dang parnok chirnurtem memejeptoktsü mesüra yimsü nung mejajatsü aser Mosa Ozüng sentoktsü nai sayur ta ne indang kuli tamajung parnok dang metetdakja kar. 22Na arua lir ta asübaji parnoki metettsüsa. Sürabang ya koda asütsü? 23Anungji onoki ashiba ya nai benshiang. Tenangzükba ayuba nisung pezü onok den lir. 24Parnok ne den anir oang aser parnok den külemi na meshitetang, aser parnok kolak sütoktsü#21.24: Tekolak sütokba: TMa.18.18 ji ajiang. nai sen agüjang, aser idangjibo kechisa ne indang parnok dang metetdakja aka, aji kecha masü, aser nai Ozüngji timi amshia jajar ta ajaki metettsü. 25Saka Bendangertem shir amangba purtem kümogo parnok atemajibo süngyanglutem dang tenlaba osettem nungi, telensetbatem nungi, azü nungi pila-a liang ta onoki lemtetba parnok dangi züluogo.” 26Anungji Pauli nisungtemji anir ao aser parnok den külemi temeshitetbaji agizük aser parnok meshitetba anogotem kodang abensatsü tenlabaji metenla tashi tenla kidang tua amung.

Paul Tenla Kidang Apuba

27Kodang anogo tenetji tabensar liasü, Asia nungi aruba Yihuda nungertemi pa tenla kidang angu, parnoki telok ajakji ajungmeso aser pa dak teka ai. 28Aser ayimtena ashi, “Israel nungertem yariang! Yihuda nungertem anema, Mosa ozüng anema aser iba tenla ki anema iba nisung yagi ajaklen sayur. Ano iba dangji talisa pai Grik nungertem anir aita iba temeshidak menendaktsüogo.” 29Kechiyong iba dang tejaklen Efesa nunger Trofima Paul den külemi yimti nung angu, aser Pauli pa tenla kidangi anir aru ta parnoki bilem. 30Parnoki yimti ajonga ajungmeso aser nüburtem külemi senten, aser parnoki Paul dak amet aser tenla kidang nungi atsür adok, aser kishitemji shibangdaktsü. 31Parnoki pa tepsettsü meranga alidang, Yirusalem ajonga rongrong nung lir ta meyirijang madak tanishiba dangi osang aru. 32Idangyongji pai pa den temerangertem aser noklang madak tanishirtem anir parnok dangi asema aru. Kodang parnoki meyirijang madak tanishiba aser temerangertem angu, parnoki Paul dak azükbaji anenadok. 33Idangji meyirijang madak tanishibai anasa aru aser Paul dak sot aser merang yinzü ana agi pa alentsü ozüng agütsü. Aser iba nisung ya shiba aser pai kechi tamajung inyak ta tanishibai asüngdang. 34Idangji telok rongnungi kari tapu ka aser kari tapu balaka ta ayimten. Rongrongshishi aser asatepba agi pai oji mangazüktet nung pai Paul mitsai anir atutsü ozüng agütsü. 35Kodang Paul iba mitsa apu jagi air atu, telokti kanga sashia arubayong temerangertemi pa ajunger mitsa jagi atutsüsa aküm, 36kechiyong nisung lokti-i tesülen anishia ayimtena ashi, “Pa tepsetang.”

Pauli Pei Sasa Temeten O Jembiba

37Mitsa jagi anir aitsü mapang nung Pauli meyirijang madak tanishiba dangji ashi, “Ni ne dang langka ashitsü akok asü?” Tanishibai Paul dang asüngdang, “Nai Grik O meteta lir ma? 38Süra temalen rongrong adokdaktsüba ljip nungba shibai nisung tepseter meyirijang pezü lisem linüki anir ajen iba nisungto na masü südi?” 39Idangji Pauli langzü, “Ni Kilikia nung aliba Tarsa nunger, Yihudapur ka, atemata yimti senso ka dangbo masü, Ni nüburtem dang o jembitsü kü dang mela-ang ta ni ne dang mepishir.” 40Tanishiba jagi Paul dang mela, aser Pauli apu bang nungji noktak aser nüburtem dangji teka agi tuyua nungtem. Kodang mokorai aküm, pai Ibri oshi agi parnok dang jembia ashi:

Currently Selected:

TENYARTEM MAPA 21: AONAGABSI

Highlight

Copy