TENYARTEM MAPA 14

Paul Aser Barnaba Ikonia Nung

1Ikonia nung parnoki Yihuda nunger sinagogi atu aser parnoki junga jembi nung telok tulu ka Yihuda nunger aser Grik o jembirtem telok anapronglai amang. 2Saka mamangba Yihuda nungeri Bendangertem mulung arimeso aser tamangertem anema ajungmeso. 3Anungji mapang talangka parnoki idakji munga Kibuba tenüng nung tasü ita jembi, aser parnok teka agi temaitsü sayatenyatem aser tesüngmangtsü mapatem inyakdaktsütsü Kibubai mela-a, parnoki pa taochi indang kuli agütsü. 4Saka yimti nung aliba telokji lemsa adok. Kari Yihuda nunger den aden, aser kari tenyartem den aden. 5Kodang Bendangertem aser Yihuda nungertemi par yimsüsürtem den aden parnok dak maksüa benshitsü aser lung agi aontsü atongtet, 6aji parnoki metetadok, aser Lukonia yimtitem, Lustra aser Derbe yimtitem aser item temeket tonga parnoki jena ao. 7Idakjia parnoki Osangtajungji sayutsüngi.

Paul Aser Barnaba Lustra Nung

8Lustra nung tasodang nungi telemta, tetsüng tashi mait, aser kodanga mejajadangba nisung ka mena liasü. 9Pai idakji mener Pauli jembiba anga-a liasü. Pauli pa dak rangketa aji, aser pai jungjunga kümnüba tamangji ajitet. 10Anungji pai ola tulu adoka ashi, “Ne tetsüng agi indang indanga noktakang.” Aser pai pungmesoa noktak. 11Kodang teloki Pauli inyakbaji angu, parnoki Lukonia oshi nung ayimtena ashi, “Asenok dangi tsüngremtem nisung ama kümer arua lir.” 12Parnoki Barnaba dang Zeo aser Paul dang Herma ta aja, kechiaser pa o jembir tongtiba liasü. 13Aser yimti jakdang aliba Zeo tenla ki putiri süngkhümbong anasa nashi pungchitem aser narozüktem bener aru aser teloktem den tenladi ta liasü. 14Saka kodang tenyar Paul aser Barnaba tenati ya angashi parnoki jashia parnok sü shisa aser telok rongi pungoka ai aser ayimtena ashi, 15#Ani. 20.11; TKe. 146.6 “Nisungtem, kechiba nenoki itemi benshir? Nenok ama onoka nisung dang, kotak, alima, tzüyim aser yangji aliba ajak yangluba taküm Tsüngrem dangi item amajok mapatem nungi temulung meyiptsü onoki Osangtajung nenok dang sayutsüngir. 16Tesüiba pututem nung kin ajak pei lenmangtem nung jajatsü pai odang mela. 17Aji saka pai tajung benshia kotak nungi tzünglu aser tsüngkhüm tajung nenok nem agütsü nung, aser pai chiyungtsü aser tepela agi nenok mulung süngtsü nung, pai pei indang agütsüba kuli metoktsü.” 18Item o shiaka parnok dang metenlatsü asoshi parnoki teloktemji songtemtsü mokoki liasü. 19Saka Yihuda nungertemji Antiok aser Ikonia nungi aru. Parnoki teloktemji mesüzüker külen, Paul dak lung agi aon aser pa süogo ta bilema yimti nungi atsür adok. 20Saka kodang tamangertemi pa meketa atenshi pai shishi aser yimti jagi ai. Aser asüngji pai Barnaba den Derbe-i ao.

Siria Nung Aliba Antioki Meyipa Shilangba

21Parnoki iba yimti nungji sayutsüngia nütsüng aika kümdaktsür külen, parnoki Lustra, Ikonia aser Antioki meyipa aru. 22Parnoki nütsüngtem mulung tashi itdaktsü aser tamang nung akanga alitsü ajungshia, oda timtem aika ajanga dang asenoki Tsüngrem Yimli-i itettsüla ta sayu. 23Parnoki arogo shia nung lumia sarasadema tamburtem shimteta yutsür külen, parnoki amangba Kibuba nem parnok nungloka yutsü. 24Parnoki Pesidia ajanga süi aser Pamfuliai aru. 25Aser Perga nung Osangtajung sayutsüngir külen Ataliai alu. 26Idak nungjagi parnoki Antioki rong ka nung ao, kong tamasa Tsüngrem taochi dangi parnok aja aser iba mapa inyaktsü asoshi parnok nem nungloktsü; aser koba mapa parnoki renem. 27Parnok tonger külen arogoji külemi sentepdaktsür külen parnok den Tsüngremi inyakba ajak Bendangertem asoshi koda tamangba kishi ka lapoktsü, ya ajak parnoki ashi. 28Aser parnoki Antiok nung tamangertem den külemi anogo aika munga liasü.

Currently Selected:

TENYARTEM MAPA 14: AONAGABSI

Highlight

Copy