TENYARTEM MAPA 10

Peter Aser Kornelia

1Kaisaria nung nisung ka tenüng agi Kornelia, Itali nungi aruba temeranger telok noklang ka madak tanishir ka liasü. 2Pa aser par kinunger ajonga yimsü nung keta asenba aser Tsüngrem akhüm tsübuba nisungtem liasü; pai nüburtem nem angati aika agütsü aser Tsüngrem dang teti sarasadema liasü. 3Kenü nikongtsütsü asem baji meta pai mangdang ka nung jangja jangja-a Tsüngrem kotak tenyar ka aruba angu; aser pa dang ashi, “Kornelia!” 4Pai kotak tenyar dakji ranglok aser pai tsübua aküm, aser pai ashi, “Kechi-aka, Kibuba?” Kotak tenyar jagi pa dang ashi, “Ne sarasadem aser nai angati agütsüba indang Tsüngrem madangi mamatsüsa atuogo. 5Tang Yopai nisung yokang, aser Simon shiba dang Peter ta ajar, pa anir arung. 6Tzüyim küm nung aliba shiküp yanglur Simon kidang pa anena lir.” 7Aser kodang kotak tenyarji oadok; pei kilir ana aser pa tenzükertem rongnungi yimsü nung keta asenba temeranger ka ta pai aja. 8Pai parnok dang item o ajak shir külen pai parnok Yopai yok.

9Asüngji parnoki pei lenmang nung ao aser yimtiji atongtsü anasa alidang anjong meshi meta, Peteri sarasademdak kilem jagi atu. 10Pa ya-adok aser chiyungnü; aser parnoki chiyungtsüji renemdang pa mangdangi ao, 11aser pai kotak lapoka angu aser oset ka sü tulu ka mesüka kinük pezüsülen amer alima nung tsükdaktsüba pai angu. 12Iba sü nung tetsüng pezü atenba shiruru tapu ajak, ali nung juzüa senzübatem aser anüng ozütem ajak liasü. 13Aser ola kati pa dangi arua ashi, “Shishiang, Peter tepsetang aser chiang!” 14Saka Peteri ashi, “Kibuba yamaji kodanga masü, kechiaser ni kodanga oset mashi-i mesüra memeshiba kecha machir.” 15Ano ola kasa jagisa Peter den tanabena jembia ashi, “Kechi Tsüngremi meshitettsüogo, aji nai memeshi ta teshima.” 16Aser ya asemben tashi atalok, aser idangyongji osetji kotaki bener tuadok.

17Peteri iba mangdang anguba indangji ya kechi tetezü ta ratamata bilema alidang, ajiang, Korneliai yokba nisungtemi Simoner kiji koba ta asüngdanga kikümbang nung noktak. 18Aser Simon shiba dang Peter ta aja, pa idakji anena ali asü ta asüngdang. 19Peteri mangdang indangji bilema alidang, Tanelai pa dang ashi, “Ajiang! Nisung asemi na bushir. 20Anungji noktakang aser ludangang; aser kecha matidaki dang parnok den oang, kechiaser parnokji ni yoka lir.” 21Peteri nisungtem dang jagi alu aser ashi, “Ajiang, nenoki shiba bushir, paji ni lir, kechi asüngdangtsü atema nenok yagi aru?” 22Parnoki langzü, “Noklang ka madak tanishir Kornelia, ochishir aser Tsüngrem dang tsübuba nisung ka aser Yihuda kin ajongai kuli junga agütsütetba, par kidangi na ajatsü aser na nungi o angatsü temeshi kotak tenyar kati pa dang metetdaktsü.” 23Anungji pai parnok jaoka anendaktsü. Aser asüngji pai parnok den külemi apuso, aser Yopa nungi adianutem kar pa meina ao. 24Tananüji parnoki Kaisaria atong. Aser Korneilai par kimang aser temba-tinu külemi jaoka parnok aruba ata-a liasü. 25Aser kodang Peter kidangi ait, Korneliai pa den ajurutepa pa tsüngdang apudak aser pa agizük. 26Saka Peteri pa noktakdakja ashi, “Noktakang, nia nisung dang.” 27Peteri pa den jembitepa kidangi ai, aser pai aika sentepa angu. 28Pai parnok dang ashi, “Yihuda nisung kati tangar kin nisung den medemtsü mesüra ajuruteptsü tim masü ta nenoki nenok sasa meteta lir. Aji saka nisung shinga danga memerükba mesüra menendokba ta ajatsü tim masü ta Tsüngremi kü dang jungjunga sayuogo. 29Anungji kodang nai ni tajai yok, nia mulungsoa dang aru. Anungji kechi o atema ni tajai yok, aji ni metetnür.” 30Korneliai langzü, “Anogo pezünü süia ogo, ni ozü kidang asem baji nung sarasadema liasü, aser ajiang kü madang nisung ka sentsüprang sü abener noktak. 31Pai kü dang ashi, ‘Kornelia, Tsüngremi ne sarasadem angashiogo aser ne mapa tajung angati agütsüba pai meteta lir. 32Anungji Yopai yoka Simon, shiba dang Peter ta ajar, pa ne dangi ja-ang. Pa tzüyimküm nung aliba shiküp yanglusang Simoner kidang anena lir.’ 33Anungji idangyongjisa ni na tajai yok, aser na arubaji junger. Anungji tang Kibubai ne dang melaba ajak angatsü onok ajak Tsüngrem madang sentepa lir.”

Peteri Korneliar Kidang Sayutsüngiba

34 # Taz. 10.17 Peteri tebang lapoka ashi, “Tsüngremi nisung jak merepranger ta ni atangji ajiteter. 35Saka kin ajak nungi shibaisa pa akhüm tsübur aser tim mapa inyaker pai agizüker. 36Yisu Khrista Osangtajung tesünep indang sayutsüngia Israel nisungtem dangi koba osang yok, pa ajak madak Kibuba lir ta iba osang nenoki metet. 37Yohan Baptitsübai sayutsüngir külen, Galil nungi tenzüka Yihuda ajak nung atalokba nenoki metet. 38Aser koda Tsüngrem Tanela Temeshi ajanga Nazaret nunger Yisu shimtet, aser Tsüngrem pa den dena ali nung pai tajung inyaka, aser mojingi kangshiba ajak anebja senzü, ya-a nenoki metet. 39Yirusalem aser Yihuda nunger lima nung pai inyakba ajak indang onok kuli lir. Aser paji parnoki kangki nung meta-a tepset. 40Saka Tsüngremi pa asemnübuba nung shia arudaktsü aser pa jungkai adoka ngudaktsü; 41nisung ajak dang masü, saka Tsüngremi tamasa shimtetba kulitem dang, oda pa tasü nungi shia arur külen onok shir pa den chiyunga-ajem, onok dang pai jungkai adoka sayudaktsü. 42Akümlir aser tasürtem obendanger asütsü shiba Tsüngremi shimtet, ibaji pa ta nisungtem dang sayutsüngitsü aser kuli agütsütsü onok nem ozüng agütsü. 43Pa dak amanger shiai pa tenüng ajanga temenen tatokba angutsü ta ainkar ajaki pa asoshi kuli agütsür.”

Bendangertemi Tanela Temeshi Agizükba

44Peteri maneni item o jembia alidang, oji angashirtem ajak madaki Tanela Temeshiji alu. 45Tang Yihuda purtem tamangertem kwika Peter den külemi liasü, parnok ajak süngmangadok, kechiaser Bendangertem madak Tanela Temeshi sempetji mekeploktsü ta parnoki meteta aküm. 46Kechiyong parnoki tangar oshitem agi jembiba aser Tsüngrem uludaktsüba parnoki angashi. 47Idangji Peteri ashi, “Asenoki agizükba ama item nisungtemia Tanela Temeshi agizükogo, ajangla parnok tzü nung baptitsütsü nisung kari noktangteter ma?” 48Anungji Peteri parnok Yisu Khrista tenüng nung baptitsü mela. Idangji parnoki pa dang anogo ishika alitsü mepishi.

Currently Selected:

TENYARTEM MAPA 10: AONAGABSI

Highlight

Copy