Matiu 7

Ea 'Aho'a Namahujina

(Ruku 6:37-38, 41-42)

1Ja niho'o ea 'aho'a panamahakame pu ja 'u'o panamahuna. 2Ijihuna'e Godira 'unama ka'ene jara ea 'aho'a namahu kaja'ina'e Godi ja 'u'o ija'ina'e namahuna. 'Eje jara ichá'ina ka'ene ea vaji'avajaho ija'ina'e Godi ja vajihuna. 3A rakijihuna'e vweu puni nia vaji taura ka'ene namujaho kama 'wara'i kaivo oni nia vaji natohwaka namujaho marako pakama amairio? 4A raka vene oni nia titi taura ka'ene namu kaha'ajaho papi'ona'i kaivo napuru puni nia vaji taura ka'ene namujaho kama 'waramo? 5'Enakúne ira'asinakere maraku'a oni nia vaji taura ka'ene namu kaha'ajaho pi'ona'i kaivo iji'a napuru puni nia titi taura kajaho ape pi'ona'amana. 6'Ene ja uneunecha ka'ene ariramaijija 'ua pavaji'avara. Ijihuni maijaho pu ta'arohareje mwatumi'ejakúne pavaji'avara. 'Ene joni uneunecha mamaijijahija maha pavaji'avara. Ijihuni maijaho pu ma'eka tauti'ejakúne pavaji'avara.

Jarime Sarame 'Ana'ana'avara

(Ruku 11:9-13)

7'Enakúne ja Godoni siporua 'one jarima apena va'akame Hu ja vajihuna. 'Ene ja sarama apena va'avajaho ja kihuna. 'Ene ja vwicha 'ana'anaa apena va'avajaho Hu tirasahuna. 8'Ene ea irara siporua 'one jarima apene va'amajaho hu ijihuni mai 'ekahuna. 'Eje ea irara 'unama kaji sarama apene va'amajaho hu piunahuna. 'Eje ea irara vwicha kaji 'ana'anaa apena va'amajaho vwicha tatiranamahuna. 9Ea irara harihuni puretia'e 'wara'ipisa hu muni maha'e? 10'Ene hu kija jarira'ipisa hu tapari maha'e? 11'Enakaivo ja ea siseakija joni harihija uneunecha mamairu vajihura'e re'avajaho 'ú joni Oma ka'ene akúpi 'ahi hinuji jari'avajaho Hu uneunecha mamairu pavajihuna raka? 12'Ene ja ura ea 'ahopo jona vena'avarono ura renauja'ina'e ja ura rena'eje ea 'ahopuna vena'avara. Ikehuni maijaho varapa tamana 'ee poropetiepo najuhara.

Vwicha Ma'u'uijina

(Ruku 13:22-30)

13'Enakúne vwicha ka'ene ira mwahatitijino vaha. Ijihuni maijaho vwicha ka'ene natohwijaho 'unama ni'ima'ura ka'ene veni va'ujina. 'Eju'e ea mapoka'e ijihuna kajino va'ura. 14'Enakaivo vwicha ma'u'ua kajaho 'unama ka'ene majama hihunijina 'ee kikisima'ura'omo ea kwinu kwino piunavura.

Icha 'Ee Huni 'Ina

(Ruku 6:43-44)

15'Enakúne poropetia ira'ata najahi'inijija hami ki'avara. Pu joni roujaho sipia puni atehi same rohuna. 'Enakaivo puni vajijaho niho'o 'ua ne'a sa'ina. 16'Ena'omo puni 'inijino samai kihuna. 'Ú ea 'wija ajina 'ahi 'ekure? 'Ene ea mitota vaji matakina nitehure? 17'Enajihuna'e icha ka'ene maijija 'ina maa rejura. 'Eju'e icha ka'ene siseijija 'ina sisea rejura. 18'Eju'e icha ka'ene maijija 'ina sisea pareju'e icha ka'ene siseijija 'ina maa parejura. 19'Ene icha ka'ene 'ina maa parejujija 'uma veni jaura. 20'Ene puni 'inijino samai kihuna.

Na A Pahena Pakavura

(Ruku 13:25-27)

21'Enakaivo ea mapoka ka'ene Na Natohwe Natohweru 'wivujija Godoni ara pavahuna kaivo ea ka'ene Nuni Oma ka'ene akúpa 'ahi hinujara raka ka'ene Hu ura renujiru ve'avajipo vahuna. 22'Ena'omo ijihuni vea kajara ro'eja'e iji'a ea mapoka Na ika'ina 'warihuna Natohwe Natohwe 'ú nú Oni ihi vu'a 'waravure? 'Ene Oni ihi 'urahi'i 'avena sisea ajima'inijija siomahure? 'Ene uneunecha mapoka ea areri pavehuna nú vejure? 'wihuna. 23'Ejakame Na ika'ina samamai pu 'warahuna Na niho'o ja pakivurakúne usema va'aha ea sisea veji'inakije!

Ea No'o Ara Vejajina

(Ruku 6:46-49)

24'Ena'omo ea irara ike Nuni vu'ake hene ve'amajaho hu areri ea ka'ene vwiha mamai vwihaji'inijara ara'e muna 'ahi vena hinuja'ina. 25'Ena'omo nehi pine sai hirame 'ee puri hiramujaho ara kajaho ninavume patira'usahuna. Ijihuni maijaho ara kajaho muna 'ahi vejajihuna'e patira'usunahana. 26'Enakaivo ea irara Nuni vu'a henareje pave'amajaho hu areri ea ka'ene hami pavwihaji'ina ka'ene huni ara ajara 'ahi venaja'ina. 27'Enajihuna'e neha pine sai hirame puuri 'e'une ara kajaho 'anaume 'onajaho maijihi niho'o ani'ina tira'usunaha 'onana 'iamana.

Jesuni Harurijina

28Ijí vu'a kaji Jesura 'warame pa'arejume ea mapoka mapoka ijí Hura najaha kaji hejajaho oja hwa'usunahara. 29Ijihuni maijaho Hu niho'o haruriji'i pu najahana areri Sikuraipiepo najahuja'ina pana.

Currently Selected:

Matiu 7: mcq

Highlight

Copy