Popular Bible Verses from Luˉka‸ li‸ 6

Share

Shu hta‸ piˇ-oˆ. Oˇ hkʼe piˇ ve kʼo, nawˬ hui hta‸ ka‸ shu kʼaw‸ pe‸ laˇ tuˬ yoˬ. Yawˇ hui pe‸ laˇ ve teˇ yanˇ htaˇ, kawˬ tuˬ uiˍ ve hta‸ kʼaw‸ kawˬ laˇ ve awˬ hkʼoˆ ka‸, biˇ sheˆ htaˇ hkʼa gaˬ nyiˉ keu hiˆ keu leh nawˬ hui ve taˉ poˆ hkʼaw keu laˇ tuˬ yoˬ. Awˬ lawn kʼo, nawˬ hui shu hta‸ kawˬ piˇ ve hkʼe shu nawˬ hui hta‸ kʼaw‸ kawˬ laˇ tuˬ yoˬ teh‸ kʼoˆ ve yoˬ.

Da‸ ve chaw lehˬ, a shu yawˇ nyi ma hkʼaw da‸ ve awˬ ceuˬ doˆ taˍ kuiˬ lo, da‸ ve awˬ ceuˬ hta‸ yuˬ tawˆ la ve yoˬ. Haiˬ ve chaw lehˬ, a shu yawˇ haiˬ ve awˬ ceuˬ doˆ taˍ kuiˬ awˬ hkʼaw lo, haiˬ ve awˬ ceuˬ hta‸ yuˬ tawˆ la ve yoˬ. Awˬ lawn kʼo, nyi ma awˬ hkʼaw lo hkʼa biˇ cawˬ ve hkʼe yawˇ ve maw‸ kʼaw yaw tawˆ la ve yoˬ.

Nawˬ hui lehˬ, nawˬ hui ve canˇ paˍ teˇ hpaˍ hta‸ ha‸ leh da‸ ve awˬ ceuˬ te piˇ-oˆ. Kʼaw‸ gʼa tuˬ ve hta‸ maˇ dawˇ law ve awˬ hkʼaw lo shu hta‸ chiˇ piˇ ngaˍ piˇ-oˆ. Oˇ hkʼe te ve kʼo, nawˬ ve la‸ shawnˍ uiˍ jaˇ leh, uiˍ jaˇ mvuh jaˇ ve Awˬ shehˍ hpaˇ ve awˬ yaˇ teˇ hpaˍ nawˬ hui hpeh‸ tuˬ yoˬ. Awˬ lawn kʼo, yawˇ lehˬ awˬ bon hta‸ maˇ shiˍ puiˉ ve chaw leh haiˬ ve chaw hui hta‸ awˬ bon te piˇ puiˉ ve yoˬ.

Nawˬ hui ve Awˬ pa ha kʼaˉ puiˉ ve hkʼa shuˍ shuˍ nawˬ hui htawˇ ha kʼaˉ puiˉ ve chaw hpeh‸ piˇ-oˆ.

Nawˬ hui shu hta‸ venˇbaˆ taˇ taˍ. Oˇ hkʼe maˇ taˍ ve kʼo, nawˬ hui hta‸ htawˇ shu venˇbaˆ maˇ taˍ. Shu hta‸ suhˉ taˇ taˆ. Oˇ hkʼe maˇ taˆ ve kʼo, nawˬ hui hta‸ htawˇ shu suhˉ maˇ taˆ. Shu ve venˇbaˆ hta‸ hpehˇ piˇ-oˆ. Oˇ hkʼe te ve kʼo, nawˬ hui ve venˇbaˆ hta‸ ka‸ shu hpehˇ laˇ tuˬ yoˬ.

Nawˬ hui hkʼa gʼa kaˇ ve chaw teˇ hpaˍ hta‸ ngaˬ kʼoˆ laˇ ve, nawˬ hui ve canˇ paˍ teˇ hpaˍ hta‸ ha‸-o‸. Nawˬ hui hta‸ nyi bawˬ ve chaw hui hta‸ da‸ ve teˇ ceuˬ te piˇ-oˆ. Nawˬ hui hta‸ hkeu laˇ ve chaw teˇ hpaˍ hta‸ bon na‸ piˇ-oˆ. Nawˬ hui hta‸ hkʼa mvuhˇ hkʼa na te laˇ ve chaw teˇ hpaˍ awˬ pon bon lawˬ-o‸.

Shu nawˬ hui hta‸ te laˇ piˇ lawˬ gaˇ ve hkʼe, nawˬ hui shu hta‸ oˇ hkʼe te piˇ-oˆ.

Nawˬ ve mehˆ hpfuhˇ diˬ teˇ paˉ hta‸ hta laˇ ve chaw hta‸ teˇ paˉ kʼaw‸ hpfuhˆ hkʼo piˇ sheˍ. Nawˬ ve aˉ po‸ zuhˬ ma hta‸ yuˬ gaˇ ve chaw hta‸ nawˬ ve aˉ po‸ hta‸ htawˇ yuˬ tuˬ taˇ tawˍ taˍ. Nawˬ geh hkʼa lawˬ ve chaw teˇ gʼaˇ le le hta‸ piˇ-oˆ. Nawˬ ve mawˇ hta‸ yuˬ ve chaw geh taˇ kʼaw‸ lawˬ hkʼaw‸.

Da‸ ve awˬ cehˬ lehˬ, maˇ da‸ ve awˬ shiˍ naw‸ ve teˇ cehˬ ka‸ maˇ cawˬ. Maˇ da‸ ve awˬ cehˬ lehˬ, da‸ ve awˬ shiˍ naw‸ ve teˇ cehˬ ka‸ maˇ cawˬ.

Awˬ lawn kʼo, awˬ shiˍ hta‸ nyi leh, awˬ cehˬ teˇ cehˬ le le hta‸ gʼa shiˍ ve yoˬ. Aˉ chuˇ cehˬ lo maˉ nawˆ shiˍ maˇ shaˉ jaw. Aˉ chuˇ buiˇ lo a pehˉ meuˇ shiˍ maˇ shaˉ jaw.