Popular Bible Verses from Proverbios 3

Share

Ni‑yu'u ni‑ini ro kukanu ini ro Su'si ma nawa sa'a ro ma, te máko kukanu ini ro ja ja jani ini maa ro ma te kuu sa'a ro nawa kúni ro ma. Ndakunitnuni ro ja maa Su'si ma, sana kuu sa'a ro nawa kúni ro ja sa'a ro ma, te maa ya chindee ña'a ndaka nawa jiniñu'u ro ma.

Máko kani ini ro ja maa ro kúu ñayii ndichi‑ka, su'va koyu'u Su'si iya ndákan kuenda ma, te kakayata nuu ja u'vi ma.

Te ndaka nawa ni'i tna'a ro ma ji'in ndaka ja xinañu'u kée itu ro ma ndakua'a nuu Su'si ma. Te sukan, te ku'un chitu yaka ve'e ro ma ja kaa ja ko'o ro ja taa Su'si ma.

Másu ko ndunaa kuiti ro ja ko sa'a ro ja ndaa ja ndija ma. Te ko kutoo ndija ro in‑ka ñayii ma, te ku'un ku'un‑ni ini ro ja sukan ko sa'a ro ndaka kivi nde kua'an nde vee ro. Ûni másu ko ndunaa ro.

Sa'ya maa ri, máko saxiko ro ja ndáka'an so'o ni'i Su'si ma nuu ro ma, te máko ndakiti ini ro ja káxtnu'u ya ja masu va'a‑ni sa'a ro nuu ya ma. Vaa Su'si ro Iya Tátnuni ma chi ñayii kútoo ya ma chi ndonda ya nuu i ja ndáka'an so'o ni'i ya nuu i nú masu va'a‑ni sa'a i ma. Vaa sukan sa'a tee ma ji'in sa'ya de ma, ja ndónda de nuu i nú ñatuu sa'a i ja va'a ma, vaa kútoo de i ma.

Sa'ya maa ri, máko ndunaa ro ndaka ja káxtnu'u ri nuu ro a, su'va tava'a onde ini anua ro a, te ku'un ini ro ja ko sa'a ro sukan ká'an tnu'u tátnuni ri a. Vaa sukan, te koteku ro kua'a xeen kuiya, te koo sii ini xeen ro, te koo va'a ro.

Naka vii naka va'a kúu ñayii ni'i tnu'u ndichi wa'a Su'si ma, vaa jáku'ni ini i te kúu i in ñayii ndichi. Vaa ja va'a‑ka kúu ja ni'i o tnu'u ndichi ma sana ja ni'i o xu'un plata ma. Te chíndee xeen‑ka ña'a tnu'u ndichi ma sana oro ma. Ja va'a xeen‑ka kúu tnu'u ndichi Su'si ma sana yuu vivii ka ndaa ma te ka ndeya'vi xen‑xeen ma. Tnu'u ndichi Su'si a chi ûni ñatuu nawa iyo ñuu ñayivi a ja inuu kúu ji'in i.

Nú iyo in ñayii nawa jiniñu'u i ma te nú kuu chindee ro i, máko kondetu ro.

Vaa Su'si Iya Tátnuni ma chi ni ka'an ya‑ni, te ni kuva'a ñu'ú a te iyo vava'a. Te ja ni ka'an ya ma‑ni, te ni kuva'a andivi ma, te ni jinkuiñi vava'a i. Vaa iya ndichi kúu ya.