Popular Bible Verses from 1 Pitrosi 2

Share

Kono mina mu lusika lo lu ketilwe, baprisita ba Mulena, sicaba se si kenile, batu ba Mulimu. Mu ketezwi ku talusa misebezi ye komokisa ya Mulimu, yena ya mi zwisize mwa lififi ku mi tisa mwa liseli la hae le li komokisa.

Kreste kasibili u lwezi libi za luna fa mubili wa hae, fa sifapahano, kuli lu shwe kwa sibi mi lu pile mw'a latela Mulimu. Ki ka mañiba a hae ha mu folisizwe. Ne mu swana ni lingu ze latehile. Kono cwale mu kutiselizwe ku yena ya li mulisana ni mubuluki wa mioya ya mina.

Pili ne mu si batu ba Mulimu, kono cwale mu sicaba sa hae. Pili ne mu sa zibi sishemo sa Mulimu, kono cwale mu si fumani.

Mu swane ni limbututu ze sa z'o pepwa. Mu nyolelwe nako kaufela mabisi a kenile a Moya, ili kuli ka ku a nwa, mu kone ku hula ni ku piliswa.

Balikani ba ka, na mi kupa, sina ha mu li bazwahule ba ba til'o koza feela mwa lifasi le, kuli mu kauhane ni litakazo ze maswe ze lwanisa moya. Mu be ni mikwa ye minde mwahal'a bahedeni, kuli niha ba ka mi tameleza kuli mu eza ze maswe, ba lemuhe ze nde ze mu eza, mi ka mukwa wo ba lumbe Mulimu zazi l'a ka taha.

Ni mina mu tahe, mi mu t'o sebeliswa sina macwe a pila kwa ku yaha tempele ya moya. Mwateñi, mu ta ba sitopa sa baprisita ba ba kenile, bao musebezi wa bona i ta ba wa ku iseza Mulimu litabelo za moya ze ta amuheleha ku yena ka Jesu Kreste.

Hakulicwalo, mu lisele bumaswe kaufela, bupumi ni buikuhumuso, muna ni lusinyo!

Mu tahe ku Mulena, ku lona licwe le li pila, le li hanilwe ki bayahi, kono le li ketilwe, ili la butokwa, ki Mulimu.

Mu pile sina batu ba ba lukuluhile. Nihakulicwalo, mu si ke mwa sebelisa tukuluho ya mina ku kwahela bumaswe, kono mu pile sina batanga ba Mulimu.

S'a lata Mulimu kikuli mu kuzise ka likezo ze nde, ze mu eza, lipulelo za bukuba za batu ba ba sa zibi se siñwi.