Popular Bible Verses from Mateo 6

Share

Buska reino di Dios i buska pa hasi su boluntat promé i boso ta haña tur e sobrá kosnan akí aserka.

Pues, no preokupá pa e dia di mañan, pasobra e dia di mañan ta preokupá pa su mes problemanan. Kada dia tin sufisiente problema di su mes.

Mi ta bisa boso: No preokupá pa boso bida, esta si boso tin di kome òf di bebe. Ni tampoko si boso tin paña pa boso bisti. Akaso bo bida no ta bal mas tantu ku kuminda i bo kurpa mas tantu ku paña?

Ma abo, ora bo ta bai resa, drenta bo kamber sera porta i resa na bo Tata, ku ta den e lugá sekreto akí, i bo Tata ku ta mira loke bo ta hasi den skondí lo rekompensá bo.

Resa antó di e forma akí: Nos Tata, ku ta na shelu, bo nòmber sea santifiká; laga bo reino bini; bo boluntat sea hasí na tera meskos ku na shelu.

Duna nos awe nos pan di kada dia

i pordoná nos nos faltanan meskos ku nos ta pordoná esnan ku a falta ku nos

i no laga nos kai den tentashon, ma libra nos di e malbado. [Pasobra di Bo e reino ta, tur poder i gloria, te den eternidat. Amèn.]

Si boso pordoná hende nan faltanan, boso Tata ku ta den shelu tambe lo pordoná boso.

Wak e paranan den laria; nan no ta sembra ni kosechá, ni nan no ta warda nada den mangasina. Ta boso Tata den shelu ta duna nan di kome! Boso no ta bal mas tantu ku para?

No montoná rikesa riba mundu kaminda mòt i frus ta kome nan i ladron ta kibra drenta hòrta nan. Montoná rikesa den shelu, einan ni mòt ni frus no por kaba ku nan, ni ladron no por kibra drenta hòrta nan. Pasobra kaminda bo rikesa ta, einan bo kurason tambe ta.

Niun hende no por sirbi dos shon, pasobra lo e odia esun i stima e otro. Lo e pega un na su kurason i menospresiá e otro. Ta imposibel sirbi Dios i plaka tambe.

Si Dios ta bisti flor di mondi ku awe t'ei pero mañan ta bai tirá den fòrnu, bunita asina, kuantu mas lo E bisti boso, hende di poko fe.

Ma abo, ora bo ta duna esnan ku ta den nesesidat algu, no laga bo man robes sa kiko bo man drechi ta hasi. Asina bo dunamentu ta keda sekreto i bo Tata ku ta mira loke ta sekreto lo rekompensá bo.

Tene kuidou boso no kumpli ku boso obligashonnan religioso públikamente djis pa hende mira. Sino boso lo no haña rekompensa di boso Tata ku ta den shelu.

Ora boso ta yuna, no traha kara fèrdrit manera e hipókritanan; nan ta hasi nan kara mahos pa hende mira ku nan ta yuna. Mi ta sigurá boso: Ya nan a haña nan pago kaba. Ma abo, ora bo ta yuna, laba kara i peña kabei pa asina hende no ripará ku bo ta yuna. Solamente bo Tata, ku ta den skondí, lo mira; i bo Tata ku ta mira loke bo ta hasí na skondí, lo rekompensá bo.