Popular Bible Verses from Mattêuse 6

Share

Gûdib nâlegauvinga idluarningalo pinasuarᴋârsigik, tagva tunitjivioniarpose tamakkoninga tamainik.

Taimaimat ᴋauksaᴋ issumaginasiuk, ᴋauksak piksaminik pinialermat. Nâmakpoᴋ uvlut ilûnatik ingmikut siaklerviokpatta.

Tamanna pivlugo oᴋautivapse: Inôsise pivlugo siaklernairase, nerᴋiksapsingniglônêt imiksapsingniglônêt, timipselônêt annorâksanginik. Inôsise anernarnersaungilât nerᴋemît? Timiselo anernarnersaungilât annorânît?

Igville tuksiaromaguvit, iglungnut iterit, upkuangalo parngnanairlugo, Atâtallo sagvangitome tuksiarvigiuk. Atâtavillo, sagvangitomik tautuktub, akkileromârpâtit sagvartome.

Taimâk pivlugo imâk tuksiaritse: Atâtavut ᴋilangme! Attît nertortaule. Nâlegauvît ᴋailaule. Pijomajat piniartaule nuname sorlo ᴋilangme.

Uvlome piksaptingnik tunitjivigitigut.

Idluinivut issumagijungnaikit, sorlo uvagut idluitulivigijivut issumagijungnaivigigaptigik.

Oktortaulungnermut pitinata. Piulitigulle ajortomit. Nâlegaunek, pitsartunerlo, ânanaunerlo pigigangne issoᴋangitomut. Amen.

Inuit idluituliningit issumagijungnairupsigik, Atâtapsetauk issumagijungnainiarivait idluitulinise.

Tingmitjat ᴋilaub atânêtut nautsertorsigik: karngasuingilat, perorsianiglo katersingilat ᴋematulivingnut; taimaigallorartilugit, Atâtapse ᴋilangmêtub nerritipait. Taipkonangat anernarnersaungilasê?

Perᴋutinik pikuminartunik katersoijuksaungilase nuname, ᴋaurulillo mangertornerublo asseroiviginiartangine, tigliguillo itârviginiartangine tigligomavlutik. Perᴋutinigle pikuminartunik katersoiniaritse ᴋilangme, ᴋaurulillônêt mangertornerublônêt asseroivigijungnangitangine, tigliguillo itârvigijungnangitangine tigligveᴋarungnangitanginalo. Perᴋuteᴋarvipsingne, ômatise tagvanênivut.

Angajoᴋângnut maggûngnut kivgartortokarungnangilak; aipâ ômigilârpâlônêt, aipâ nagligivlugo; ubvalo aipâ ungagilârpâ, aipanga nachogivlugo. Gûdelo nunab pingillo atautsikut kivgartorlugit saperpose.

Iviksukat naternamêtut, uvlome perortut, ᴋaukpallo kiaksaumut egitaksaujut Gûdib taimâk pinnarnartinamigit, annorârtitsomanersaringilâsê? Okpernikitose tagva!

Tunergutiksanik pilitsiguvit, saumît aggaktit nalolaulit tallerpikpît tunergutânik, Tunijatit sagvartauᴋonagit. Atâtavillo, sagvangitomik tautuktub, akkileromârpâtit sagvartome.

Udjertoritse ajungitulerᴋonase inuit sângane, tautuktaujomavluse tâpkonunga; taimailiorupse, akkilertauniksaᴋangilase atâtapsingnut ᴋilangmêtomut.

Nerritailijarangapse, annûtuksaungilase takkormôrtutitut; kênatik tautorluktingmatsuk nerritailijarangamik, inungnut tautuktaujomavlutik. Âhamarik, oᴋautivapse: Akkilertaujarêrput. Nerritailijarangaville, niaᴋuit mingoaruk, ermiklutillo. Nerritailinernik takojauterᴋonak inungnut, Atâtangnulle sagvangitomêtomut. Atâtavîllo sagvangitomik tautuktub, akkileromârpâtit sagvartome.