Popular Bible Verses from Smart Guys 26

Share

Wen one guy talk to you dat tink he no need learn notting, No talk to him da same way he talk to you, Jalike he one stupid head kine guy wit attitude. Cuz den you goin be jalike him! Wen one guy talk to you dat tink he no need learn notting, Good you talk to him Jalike he one stupid head kine guy wit attitude. Den he no goin tink he da kine guy Dat know wat fo do erytime!

Wen one guy dat no like learn notting Stay do da same stupid kine stuff Ova an ova, an get attitude, He stay ack jalike one dog dat bahf, Den layta, he come back an eat wat he wen bahf.

Wen no mo enuff kiawe wood, Da fire pio. Wen nobody talk bad, No get peopo fo talk back, Jalike dey like beef.

You dig one hole fo catch somebody, You da one goin fall down inside! You push one big rock fo smash somebody, You da one goin get smash!

Mo easy, fo teach one dumb buggah Dat no like learn notting, Den fo teach one guy Dat tink he know wat fo do erytime, But yet he donno.

If you hear odda peopo talk jalike dey stay beefing An you jump in, no matta az not bout you, Az stupid, dat! Jalike you stay grabbing one wild dog by da ears.