Popular Bible Verses from MACIU 6

Share

Ia dou vakasaqara taumada ga na matanitu ni Kalou kei na nona dodonu, ka na soli me kena i kuri vei kemudou na veika kecega oqo.

O koya oqo mo dou qai kakua kina ni lomaocaoca me baleta na siga ni mataka, ka ni na qai tiko talega na lomaocaoca ena yaco mai kina. Sa kua soti ni da vakuria na lomaocaoca vakaoqo ki na siga yadua.

“Oqo na vuna au sa kaya kina vei kemudou mo dou kakua ni lomaocaoca me baleta na nomudou bula ena ka mo dou kania, se na ka mo dou gunuva, se me baleta na yagomudou, se na ka mo dou vakaisulu kina. E sega li ni bibi cake na bula mai na kakana, kei na yago mai na i sulu?

Ia o iko, ni o sa masu, curu ki na nomu rumu, ka sogota na nomu katuba, ka qai masu vua na Tamamu sa tabogo; ia, na Tamamu o koya sa raica na ka e vuni ena qai sauma ga vei iko.

Mo dou qai masu kina vakaoqo: ‘Tama i keimami mai lomalagi, me vakarokorokotaki na yacamuni. Me yaco mai na nomuni matanitu. Me caka na lomamuni e vuravura me vaka sa caka tiko mai lomalagi.

“Ni solia mai vei keimami ena siga oqo na kakana e rauti keimami.

Ni vosota mada na neimami i valavala ca, me vaka keimami sa vosota oti na nodra era sai valavala ca vei keimami.

Ni kakua ni kauti keimami ki na vere; ka mo ni vakabulai keimami mai na ca. (Ni sa nomuni na matanitu, kei na kaukauwa, kei na lagilagi, ka sega ni mudu. Emeni.)

“Kevaka dou sa vosota na nodra cala era sa caka cala vei iko, ena vosoti kemudou vakakina na Tamamudou mai lomalagi

Dou saravi ira mada na manumanu vuka: era sa sega ni dau kakaburaki, se tatamusuki, se daukumuna vata ki na lololo; ia, sa vakani ira tikoga na Tamamudou vakalomalagi. Dou sa sega li ni yaga vakalevu cake sara mai vei ira?

“Dou kakua ni kumuna vata vei kemudou na i yau e vuravura ena vanua e dau vakacacana na sarasara kei na veveka, ka ra dau curu botea kina na daubutako ka butakoca, ia dou kumuna ga na nomudou i yau mai lomalagi ena tikina e sega ni vakacacana kina na sarasara se na veveka, ka sega ni dau curu botea kina na daubutako me butakoca. Ni vanua ga e tiko kina na nomudou i yau, ena tiko talega kina na yalomudou.

“E sega ni dua na tamata me qarava rawa e le rua na turaga. Ni na cata e dua ka lomana ga e dua, se ena kabita sara e dua ka beci koya ka dua. Dou sega ni qarava rawa na Kalou kei na i yau.

Ia kevaka sa vakasuluma vakaoqo na Kalou na co ni veivanua, na co ka sa bula edaidai ka sa yali tale yani ni mataka ni sa vakamai ena lovo, ena sega li ni qai levu cake sara na nona kauwai me vakasulumi kemudou, Oi kemudou sa lailai na nomudou vakabauta?

Ia ni dou sa soli ka ni loloma, me kakua ni kila na ligamu i mawi na ka e cakava tiko na ligamu i matau, me ka vuni kina na nomu i loloma. Ia na Tamamu, o koya sa raica na veika e sa vakayacori lo, ena qai sauma vei iko.

“Dou qarauna mo dou kakua ni vakayacora na nomudou ka ni loloma vakalotu ena matadra na tamata me ra raica kina na veika dou cakava. Kevaka dou sa vakayacora vakakina, ena sega na kemudou i sau mai vua na Tamamudou mai lomalagi.

“Ni dou sa lolo, kakua ni vakaveveku mata me vakataki ira na dauveivakaisini, ni ra dau vukica vakatani na matadra, me laurai vei ira na tamata na nodra lolo voli. Au sa kaya vakaidina vei kemudou, era sa taura oti na kedra i sau. Ia o iko, ni o sa lolo, lumuta na ulumu, ka tavoya na matamu, me kakua kina ni laurai vei ira na tamata na nomu lolo voli, ia ki vua ga na Tamamu sa tabogo me kila. Ia na Tamamu, o koya sa raica na ka e vuni, ena qai sauma ga vei iko.