Popular Bible Verses from IPERIU 11

Share

Na vakabauta sai koya na noda vakadinata ni na yaco na veika eda nuitaka, kei na noda kila ni ra sa na tiko vakaidina na veika eda sega ni raica. Ni sa vakadonui ira na tamata ena gauna eliu na Kalou ena vuku ni nodra vakabauta.

Ni kevaka sa sega na vakabauta, sa ka dredre sara me da vakalomavinakataka na Kalou, baleta ni o ira kece sara era via torovi koya e dodonu me ra vakabauta ni sa bula tiko o koya ka dau vakaicocovitaki ira talega era sa vakasaqarai koya vagumatua.

E na vuku ni vakabauta eda sa kila kina ni sa buli na vuravura ena vosa ni Kalou, me yaco rawa kina me caka na veika sa raici rawa mai na veika sa tawa raici.

E na vuku ni vakabauta sa talairawarawa kina vua na Kalou o Epara-ama ena gauna sa kacivi kina, ka me lako ki na vanua sa yalataka na Kalou me solia vua me taukena. A sa biuta na nona vanua ka lako, ia sa sega ga ni kila na vanua sa lako tiko kina. E na vuku ni vakabauta sa tiko vakavulagi voli kina o koya ena vanua sa yalataka vua na Kalou. A sa bula voli ga ena valelaca eso, a sa vakakina o Aisake kei Jekope, oi rau ka sa ciqoma talega na vosa ni yalayala vata o ya mai vua na Kalou.

E na vuku ni vakabauta sa rogoca kina o Noa na i vakasala ni Kalou me baleta na veika me na qai yaco emuri ka se sega ni raica rawa o koya. A sa talairawarawa vua na Kalou ka taya e dua na waqa, a sa vakabulai kina o koya kei na nona matavuvale. E a qai yaco emuri me vakaluvuci na vuravura, ka sa vakadonui o Noa mai vua na Kalou me tamata yalododonu ena vuku ni vakabauta.

Ena vuku ni vakabauta sa maroroi kina o Inoke me kakua ni mate. Ia, sa kau cake ga vua na Kalou, ka sa sega ni dua e kunei koya rawa, baleta ni sa kauti koya cake na Kalou. Ia ni se bera ni kau cake, me vaka sa tukuna na i Vola Tabu, a sa vakalomavinakataka na Kalou o koya.

E na vuku ni vakabauta sa vakacabora kina o Epeli na i soro e vinaka cake mai na i soro i Keni. Ena vuku ni nona vakabauta sa vakadonui koya kina na Kalou me tamata yalododonu, baleta ni sa vakadonuya na Kalou vakai koya na nona i madrali. Ena vuku ni vakabauta e se vosa tikoga kina o Epeli, ka dina ga ni sa mate oti.

E na vuku ni vakabauta sa rawa talega kina vei Epara-ama me vakaluveni, ka dina ga ni sa qase sara o koya ka sa sivita o Sera na gauna ni vakasucu gone. A sa vakadinata ga o koya na yalodina ni Kalou, o koya sa dau dinata na nona veiyalayalati.

Ni sa namaka tiko o Epara-ama na koro sa tudei na kena yavu, na koro sa tauyavutaka ka tara na Kalou.

E na vuku ni vakabauta sa bese kina ni vakatokai me luve i koya na luvenitui yalewa o Mosese ni sa tamata bula mai. A sa digitaka o koya me la'ki vakararawataki vata kei ira na tamata ni Kalou ka sega ni vinakata me bau la'ki marautaka vakalekaleka mada ga na i valavala ca ena siga eso. A sa okata o koya ni sai yau levu cake na veivakalialiai sa sota kaya ena vuku i Karisito ka lailai na i yau kei Ijipita; ni sa rai matua tikoga o koya ki na i covi sa wawa tu mai liu. Ena vuku ni vakabauta sa biuti Ijipita kina o Mosese ka sa sega ni rerevaka na cudru ni tui. A sa vaka ga ni sa raici koya na Kalou sa tabogo, ka sa sega kina ni saumaki lesu.

E na vuku ni vakabauta sa vakacabori Aisake kina o Epara-ama ena gauna a vakatovolei koya kina na Kalou. O koya ka sa tau vua na veivosa ni yalayala sa voleka sara ni vakacabora me i soro kama na luvena e duabau ga

E na vuku ni vakabauta sa taqomaki kina o Reapi na yalewa dautagane, me kakua ni vakamatei vata kei ira era sa talaidredre vua na Kalou, ni a maroroi rau na yamata.

E na vuku ni vakabauta era sa lako kosova kina na Isireli na Wasa Damudamu me vaka ga ni sa vanua mamaca; ia era a vakatovolea me ra kitaka vakakina o ira na Ijipita ka mani luvuci ira na wasawasa.

E na vuku ni vakabauta sa bale kina na bai kei Jeriko ni sa oti na nodra tayabe wavokita na Isireli ena vitu na siga.

E na vuku ni vakabauta sa rokova kina o koya na Lakosivia kei na kureitaki ni dra, me kakua kina ni vakamatei ira na ulumatua ni Isireli na Agilosi ni Mate.

E na vuku ni vakabauta sa tukuna kina o Josefa na nodra biuti Ijipita na Isireli, ena gauna sa voleka kina ni mate; ka tataunaka tu na ka me na caka ki na yagona.

E na vuku ni vakabauta sa vosa vakalougatataki rau kina na luve i Josefa tagane o Jekope ni sa bera ni mate; a sa cuva sobu, a sa tatabaki ki na ulu ni nona i titoko, ka sa masu vua na Kalou.

E na vuku ni vakabauta sa cavuta kina o Aisake na nona vosa ni veivakalougatataki vei Jekope kei Iso me baleta na veika sa tu ki liu.