Popular Bible Verses from Santiago 2

Share

Yuxan, ta chi kaoc cu cꞌul yin Dios, catuꞌ man pax watxꞌoj cu bꞌeybꞌal, naꞌbꞌacꞌal chi kalaꞌ, tol chi kaoc cu cꞌul yin Dios.

Jaxca junoj mimanile camnajxa, yutol cꞌamxa spixan, queyton tuꞌ keocoj, ta tol tucꞌal chi kaoc cu cꞌul yin Dios, catuꞌ man pax watxꞌoj cu bꞌeybꞌal.

Jex wuẍtaj, jex wanabꞌ, ta tol chi kal yetoj cu tiꞌ, tol chi kaoc cu cꞌul yin Dios, catuꞌ man pax watxꞌ oj tzet chi el kuneni, tucꞌal chi kalaꞌ, chi yal tuꞌ. Ta jaxca tuꞌ chi kute kaon oc cu cꞌul yin Dios, ¿chi cu colcha che naꞌ?

Ey mactxequel chi yaoc yin scꞌul, tol junne Dios, watxꞌ ton snaꞌoni. Jacꞌalaꞌ ebꞌ pena espíritu chi ya pax oc ebꞌ yin scꞌul, catuꞌ chi bꞌilwi ebꞌ yu xiwcꞌulal sattaj.

Tejan ey mactxequel oj alon jaxca tiꞌ: “Jaach tiꞌ, asanne cha waoc ja cꞌul yin Dios. Jal jin pax xin, jaꞌ tzetyetal watxꞌ chi el wunen an,” ẍi. Ta chi wal jain tiꞌ an, tol cꞌam mactxequel chi skeꞌ xꞌoxon eloj, ta yel eyoc scꞌul yin Dios, ta cꞌam tzet watxꞌ chi el yuneni. Ey mactxequel xin, tol jaꞌ yin watxꞌ tzet chi el yuneni chi txeclo eloj, tol yel eyoc scꞌul yin Dios.

Ta tol cꞌam chi okꞌ cu cꞌul yin ebꞌ ket animail, man oj okꞌ pax scꞌul Dios kin yet oj snaꞌon oc kin. Ta tol chi okꞌ cu cꞌul yin ebꞌ ket animail xin, oj okꞌ pax scꞌul Dios kin yet scꞌual oj snaꞌon oc kin tuꞌ.

Yuxan, naꞌcha ojabꞌ el jun tiꞌ je yu, man asanne oj yutol chi kaoc cu cꞌul yin, yuxan watxꞌ jon yul sat Dios, tol yu pax tzet watxꞌ chi el kuneni, yuxan watxꞌ jon yul sat Dios.

Cu naꞌwejtej xin, tol jix yaoc scꞌul naj Abraham yin Dios, yuxan jix skeꞌ sjijen tzet jix akꞌle yunne. Jato yet jix yun naj jun tuꞌ, jix txeclo el sicꞌlebꞌil, tol ey ton oc scꞌul naj yin Dios.