Popular Bible Verses from Matayo 6

Share

Ento koŋ wukwoŋ keto cwinywu i kom kerre, ki noŋo kit ma atir ma en tye kwede, ci jami magi ducu gibimedo botwu.

Pe wubed ki par mapol pi nino ma diki, pien nino ma diki biparo pire kene. Wuwek can me nino acel acel otum ki ninone.

“Pi meno awaco botwu ni, pe wubed ki tam mapol pi kwowu, ni wubicamo aŋo, nyo ni wubimato aŋo, nyo pi komwu, ni wubiruko aŋo. Kwo pe pire tek kato cam? Ki kom kono pe pire tek kato ginaruka?

Ento ka ilego, cit idony i kicikani ci ilor doggola woko, ka ileg Woru ma tye i muŋ; ci Woru ma neni i muŋ-ŋi bimiyi bakacic.

Doŋ wuleg kit man ni, ‘Wonwa ma tye i polo, giwor nyiŋi maleŋ. Ker meri obin; giti gin ma imito i lobo kit ma gitiyo i polo.

Miwa tin camwa me tin.

Iwek balwa, macalo wan waweko bal pa dano ma gibalo botwa.

Pe iterwa i abita, ento ilarwa bot Larac. [Pien ker ki tek ki deyo obedo meri matwal. Amen]’

Ka wutimo kica bot dano pi balgi, ci Wonwu ma tye i polo bene bitimowu kica

Koŋ wunen winyo me polo; pe gicoyo kodi dok bene pe gikayo, pe bene gidilo cam i dero, ento Wonwu ma tye i polo pud pitogi. Wun pe piwu tek kato pigi woko?

“Pe wukan lonyo piwu kenwu i lobo, ka ma nyenye ki nyal gibalo woko, dok ka ma lukwo gibino gituro ot ci gikwalo woko. Ento wukan lonyo piwu kenwu i polo, ka ma nyenye ki nyal pe gibalo, dok ka ma lukwo pe bino gituro ot ci gikwalo. Ka ma lonyowu tye iye cwinywu bene bedo iye.

“Pe tye dano mo ma twero tic ki rwodi aryo; pien bikwero ŋat acel ci maro mukene-ni, nyo bimoko i kom ŋat acel, ci cayo ŋat mukene-ni. Pe wutwero tic pi Lubaŋa ka dok wutiyo pi lim bene.

Ka ce Lubaŋa ruko lum ma i tim kit meno, ma bedo tye pi nino ma tin keken, ento diki inoŋo gibolo woko i keno, ci en pe birukowu makato, wun jo ma niyewu nok?

Ento in ka imiyo kony bot lucan, pe iwekciŋi ma lacam oŋe gin ma ciŋi ma lacuc timo, wek imi kony bot lucan i muŋ; ento Woru ma neni i muŋ bimiyi bakacic.

“Wugwokke, pe wunyut kitwu ma atir i nyim dano ni wek gunenwu. Ka wutimo kumeno ci pe wubinoŋo bakacic mo ki bot Womwu ma tye i polo.

“Ka wuri kec pe wubed macalo lugoba ma waŋgi noŋo olwal woko, pien gibalo waŋgi kit meno ni wek dano onen ni gitye ka ri kec. Ada awaco botwu ni, doŋ gutyeko gamo bakacicgi woko. Ento ka wuri kec, wuwir wiwu woko ki moo, ci wulwok waŋwu woko bene, wek dano pe gunen ni wutye ka ri kec, ento Wonwu ma tye i muŋ aye onen; en Wonwu ma nenowu i muŋ bimiyowu bakacic.