Popular Bible Verses from Ecles 3

Share

Nilhokej m'ayhay tä lewhäy iche tä ihonhatena

Lewhäy tä nech'e iche hin'o, wet äp lewhäy tä äp y'il. Lewhäy tä hin'o itihchä, wet lewhäy tä äp itonhiche tä tälho lewhay. Lewhäy tä hin'o ilän elh, wet lewhäy tä ichesat. Lewhäy tä hin'o iwasthi m'ak, wet lewhäy tä yenlhi.

Lewhäy tä hin'o tafwlhi, wet lewhäy tä t'ischeylhi. Lewhäy tä hin'o y'äyin, wet lewhäy tä takatinlhi. Lewhäy tä hin'o ifwtsatkathi tuntey, wet lewhäy tä t'äkwe tuntey. Lewhäy tä hin'o tatsufwelej elh, wet lewhäy tä ileyej tä tatsufwelej.

Lewhäy tä hin'o hich'esajche m'ak, wet lewhäy tä itsekche. Lewhäy tä hin'o nitahuya, wet lewhäy tä yämlhi. Lewhäy tä hin'o ihumin elh, wet lewhäy tä y'ulhan. Lewhäy tä hin'o iwo laka'tshayaja, wet lewhäy tä laka'tshayaj nofwi.

Lewhäy tä hin'o t'ukwe m'ak, wet lewhäy tä ileyej tä t'ukwe. Lewhäy tä hin'o t'amajej m'ak, wet lewhäy tä iwom.

Ontäfwelej tä nilhokej Dios lhenhay häpkhila m'ak tä t'un. Isit'ak õy'isej lhip wok õ'soyej lhip. Dios iwoynejetso tsi häpkhilek wichi ihumin wet iwoye lhämtes.

Otahuy lhamej wet oyok, Oelh tä is alhoho lhäy'e elh tä ni'isa alhoho Dios itihiyeja lakalelhthayaj lhamel. Tsi iwo lewhäya nilhokej m'ak tä õyenlhi.