Popular Bible Verses from Hebreos 12

Share

Konoje k'u ri' wa' wa tikawex lik xkik'ut ri kub'ulib'al kik'u'x. Lik chirajawaxik k'u ri' chiqe ri'oj jela' kaqa'ano. Ma wa oj k'o wi e pacha' jun k'alalem yey e ri'oj ri kojk'alalik. Ek'u rike kojkitzutza' loq, koye'em kojopon pa ri k'isb'al re ri k'alalem oj k'o wi. Ek'u ri' ri'oj qaya'a kan ronoje ri na utz taj kalatz'an qe, qaya'a kan ronoje ri mak ojura'lim y mojkos k'u ri' che ri b'e k'o chiqawach. Junoq kak'alalik e lik kutzutza' pan ri k'isb'al re pa karaj kopon wi. Jek'ula' ri'oj e qaya'a pan ri qawach puwi ri Jesús, ma ruk' Rire kape wi ri kub'ulib'al qak'u'x y e Rire ri katz'aqatisan uwach wa'. Xuya k'u ranima' xkam chwa ri cruz tob' wa' lik k'ixb'al uwach; e xutij ri k'ax ma reta'am we xrik'owib'ej wa', unimal ki'kotemal ri kuk'ulu. Ek'u ri' wo'ora tz'ul puwikiq'ab' rutz'ulib'al ri Dios.

Paqatzij wi na jinta juna q'ilonik lik kuk'ul qak'u'x echiri' oj k'o chupa, ma wa' ku'an k'ax chiqe. Pero we xqak'ul ri q'ilonik, lik k'o kutiqoj chiqe, ma kusuk'upij ri qab'inik qasilab'ik cha' kojk'oji' chi utzil chomal.

Lik chirajawaxik k'ola alaq chi utzil chomal kuk' konoje y tijoj ib' alaq che ri santowilaj b'inik chwach ri Dios, ma na jinta junoq ke'rila uwach ri Dios we na e ta ku'an ri'.

E lik k'ola na'oj alaq puwi ri xu'an ri Jesús; ma tob' na taqal ta che Rire, lik xutij k'ax pakiq'ab' raj makib'. Makos k'u ralaq y mapax ne k'u'x alaq chwa ri k'axk'ob'ik.

Jek'ula', ri'oj kaqak'ul jun luwar pa kaya'i' wi chiqe kojtaqanik y wa' lik tikil chi utz y na kasach ta uwach. Ruma k'u wa' chojtioxin chwach ri Dios, qaqasaj k'u qamejelem chwach y qaloq'nimaj ruk' xi'in ib'.

Lik k'u kuyu alaq ri q'ilonik, ma jela' kaq'alajinik alaq ralk'o'al ri Dios. ¿Na eta'am ta neb'a alaq e rachi k'o ralk'o'al lik chirajawaxik che keb'uq'il wa'?

Ma jela' pacha' ri aq' kuporoj ronoje, jek'ula' ku'an ri qa Dios echiri' kusach uwach ronoje ri na utz taj.

Ma ri qachu-qaqaw xa ajilam junab' kojkiq'ilo, yey ri kaki'an quk' xa e chirij ri kina'oj rike. No'j ri Qaqaw Dios lik kojupixab'aj puwi ri kajawax chiqe cha' ri qak'aslemal ku'ana jela' pacha' ri chomilaj uk'aslemal Rire.

Ma ralaq k'amaja' ne kopon alaq k'a chwa ri kamik ruma kach'o'jin alaq chirij ri mak.