Popular Bible Verses from Eksodus 10

Share

Dan MASRA taigi Moses taki: “Go na Farao. Na Mi meki taki en nanga den knekti fu en e tranga den ati, fu Mi kan sori den ala den marki disi. Yu mus ferteri den pikin nanga den granpikin fu yu tu fa Mi broko den sma fu Egipte saka. Yu kan ferteri den sortu marki Mi du na den mindri. Dan un sa sabi taki Mi na MASRA.”

Baka dati MASRA taigi Moses taki: “Langa yu anu go na heimel, fu a heri kondre Egipte kon dungru. A sa de sowan hebi dungru taki yu no o man si yu anu.” Dan Moses langa en anu go na heimel èn dri dei langa wan dipi dungru ben de ini a heri kondre Egipte. Dri dei langa no wan sma ben man si wan trawan. No wan sma ben man puru futu. Ma ala den Israelitisma ben abi faya pe den ben e tan.

Ne Moses langa en anu nanga a wakatiki abra a kondre Egipte. Dan a heri dei nanga a heri neti dati MASRA meki wan winti wai abra a kondre di ben kmoto fu oostsei. Di dei broko den sprenka ben doro nanga a winti. Na so den sprenka kon ini a kondre. Ipi ipi sprenka ben saka kon ini ala pisi fu a kondre. Noiti bifo someni sprenka ben de makandra èn noiti moro a sa psa baka.