Popular Bible Verses from Lucas 3

Share

Cárcel mera ikiyuxuba Juanpa yurawu bautizawakĩ Jesúsriwi bautizawadi. Jesúspa Dios kiwĩyaidu dai apekebedi. Espíritu Santo riwitadax aki wutupakekawãdi. Naskadu dai ariax Dios tsaidi: “Mi ewẽ Wake. Ẽ bia dui. Ẽ biki idibakui”, idi. Naskaitu yurawawe Jesúsweta dikadiwu.

Tapipaiyaiwawe Juanpa atu yuidi: “Ẽ ene ẽ batu bautizawai. Wetsa chipu ui. Naa bitsisipa. Ẽ askaraba. Naatu awẽ Espíritu Santopa batu bautizawaaxiwi. Chiĩriwi batu bautizawaaxiwi. Ẽ awẽ uibati itiru ẽ beeiba.

Ea uĩbakawe ana ma chakayabaxikakĩ ma shinamaiki. Duduri shinayabakawe: ‘Nu Abrahampa awẽ rewuduwu. Naskake Diospa duku ubiskuibaxiwiba nu chakawibiske’, aduri shinayabakawe. Diosparuku da ruwewu Abraham awẽ rewuduwu watiruki.

Datiã tsuãra reraxikĩ awẽ yami iwi tachadu ma asua keskara. Iwi wibisharatiruwuba yurawawe reratiruwu. Ma reraitaxakĩ nawu kuwatiruwu. Naskake wibisharatiruba keskara iyabakawe”, Juanpa atu wadi.

Na Juanpa aaxiwai profeta Isaíaspa kededi. Na kededi keskara naskadi. Isaíaspa duduri kededi: “Dukuwene na tsua ikabaduxu tsai ewapatu yui: ‘¡Na Diaiwu Dios uwaikiri wai sharawakawe! ¡Kayamestewakawe aũ nuku Diaiwu Dios usharaxinu! ¡Bai texpe ewapawu wuspiwakawe! ¡Naatiiwi bachi ewapawu na bachi kawasharawuya mispawakawe! ¡Wai ñushtuwu kayamestewakawe! ¡Wai texpe texpekadawu sapawakawe! ¡Naatiiwi yurawawe uĩnupukukadi na Diospa nichia duku axunu nu ubiskuiyabanu!’ dukuwene wai”. Naawu Isaíaspa kededi.