Popular Bible Verses from Abanyefezi 4

Share

Ahubwo mugirirane impuhwe n'ineza, mubabarirane nk'uko namwe Imana yabababariye muri Kristo.

Mwicishe bugufi rwose, mwiyoroshye kandi mwihangane, mugire n'urukundo rubatera kwihanganirana.

Ntimukagire ijambo ribi na rimwe muvuga, ahubwo mujye muvuga ijambo ryose ryakubaka ubugingo bw'abandi nk'uko babikeneye, kugira ngo rigirire akamaro abaryumva.

Mwamaganire kure icyitwa ukwishaririza, uburakari n'umujinya, intonganya no gusebanya, kimwe n'ubugome bw'uburyo bwose.

Kandi nimurakara ntibikabatere gukora icyaha, ndetse izuba ntirikarenge mukirakaye! Ntimugahe Satani urwaho.

Noneho nimwiyambure kamere yanyu ya kera yagengaga imigenzereze mwari mufite, kuko iyo kamere igenda ibonona kubera ibyifuzo byayo bishukana. Ahubwo muhindurwe bashya mu bugingo no mu bitekerezo. Mwambare kamere nshya mumere nk'uko Imana ishaka, iyo kamere irangwa n'ubutungane n'ubuziranenge bikomoka ku kuri.

Muharanire kugumana ubumwe butangwa na Mwuka w'Imana, amahoro abe ari yo mugozi ubafatanya.

Nuko aha bamwe kuba Intumwa ze, abandi ngo babe abahanuzi, abandi ngo babe abatangaza Ubutumwa bwiza, naho abandi ngo babe abashumba n'abigisha. Abigenza atyo kugira ngo intore z'Imana zitegurirwe gukora umurimo wayo, maze zubake Umubiri wa Kristo. Bityo igihe nikigera, twese tuzashyike ku rugero rw'ubumwe buva ku kwemera Umwana w'Imana no kumumenya byuzuye, kugira ngo tube abantu bahamye bageze ku rugero rwuzuye rwa Kristo.

Ubwo ntituzaba tukiri abana ngo duteraganwe hirya no hino n'imiyaga ibonetse yose, ari yo myigishirize y'abantu bashukana biyubikije uburyarya buyobya. Ahubwo nituvuga ukuri tubitewe n'urukundo tuzakura ku buryo bwose, twunze ubumwe na Kristo ari we Mutwe w'Umubiri.