Popular Bible Verses from Mateo 6

Share

Moukenn o Debles o ray pral t'mende te vell, oun krenn lauter, hoy yob kamella! Oun o Devel dell t'men lauter, hoy t'men hounte vell djipaske.

Doleske penau t'menge: Ma darenn glan kova, hoy taysar vella! Moukenn o vavar dives ap t'mende te vell, oun palle dikenna, hoy te krenn! Hako dives hi t'men doha, hoy krell t'maro djipen phares.

Doleske penau me t'menge: Ma darenn t'maro djipaske! Ma darenn, te vell t'men či te rhal oun či te piyell, vitar gar, te vell t'men či an-ripaske! O djipen hi boudeder moldo har o rhapen. Oun o mensho hi boudeder moldo har o ripen.

Tou te rakreh o Debleha, palle dja an tiri isema, klide o voudar pal toute, oun kote rake o Debleha! Oun o baro Devel, kay hi tiro dad an o bolepen, dikell tout kote. Oun yob dell o lačepen pale, hoy tou kral.

T'mer te rakrenn o Debleha, penenn: Maro dad an o bolepen. Tiro lab vell sharedo! Te vell ko tsiro sik, kay tou o ray hal pral i tseli phoub! Te krenn i menshe ap i phoub kova, hoy tou kameh, yaake har ninna kolla an o bolepen krenn, hoy tou kameh!

De men maro maro hako dives!

Oun biste mari doosh, hoy mer ap mende anam! Oun ninna mer bistrah o čilačepen, hoy i vavar ap mende kran.

Ma mouk men tiro dromestar tele te djal! Le men dran o bengeskro vast vin!

T'mer te bistrenn o čilačo koova, hoy i vavar ap t'mende kran, palle bistrell t'maro dad an o bolepen ninna o čilačepen, hoy t'mer kran.

Dikenn ap i čirkle! Yon vitsrenn kek djob an i phoub, te vell lo baro. Vitar gar anenn le o baro djob dren, te čivenn le les an o djobeskro kheer. T'maro dad an o bolepen dell len te rhal. T'mer han boudeder moldo har yon.

Anenn t'menge kek bravlepen ap i phoub khetne! Kote hi i kirme, hoy i ripya rhana. Koy krell o pani o saster paash. Kote hi i čorepangre, kay čorenn t'maro bravlepen. Anenn t'menge bravlepen an o bolepen khetne, kay kek čorepaskro t'maro koova hatsella! Oun kek kirme, vitar kek pani krell les paash. Kote, kay tiro bravlepen hi, kote hi ninna tiro dji.

Kek boudrell nay douy rayenge. Te vals kova yaake, boudrals lo ko yekeske mishto, oun ko vavareske gar mishto. Ko yekes kamals yob gar, kol vavares kamals yob o djiyestar. Tou nay boudreh gar o Debleske oun rodeh tiro bravlepen.

O Devel kras o zenlepen yaake shoukar, hoy kava dives vin tardo hi, oun o vavar dives an o bob vitsedo vella. Kitse kope boudeder nay dell lo t'men an-ripaske! Hoske hi t'maro patsepen yaake tikno?

Tou te deh i čorveles love, palle kre les čorrhanes, te djinell les kek! Mouk tiro servo vast gar te djinell, hoy tiro čačo vast kras! O Devel, kay hi tiro dad an o bolepen, dikell ninna kova, hoy tou čorrhanes kral. Oun yob dell tout ko lačepen pale, hoy tou kral.

Denn yak, har krenn t'mer lačo koova! Ma krenn les yaake, te dikenn i menshe kova oun sharenn t'men! Koon t'mendar kova krella, koles dell t'maro dad an o bolepen kek lačepen pale.

Te rhan t'mer i tikno tsiro či, te mangenn o Debles an, palle krenn kova gar yaake, te dikenn i menshe kova! Ma krenn har kolla, kay hi len douy djia! Yon sikrenn ap pengro mouy, te bokenn le pengro Debleske. Čačepah, me penau t'menge: Kolla lenna či o Deblestar. Yon anan pengro lačepen kokres dren. Tou te rhah či an ko tsiro, kay tou o Debleha rakreh, palle thob tiro mouy, mak tire balla har hako dives, te dikenn i menshe gar, kay tou bokeh o Debleske. Oun o baro Devel, kay hi tiro dad an o bolepen, djinella, hoy tou leske kreh. Yob dikell tout, oun dell tout o lačepen pale, hoy tou leske kral.