Popular Bible Verses from Matiyu 7

Share

“Oy-oy kulang bi, maku jaꞌ kam pa Tuhan. Binuwanan jaꞌ sina kam. Oy-oy gunahan ningkaam, miha kam pa Tuhan. Nammu jaꞌ sina kam. Tuktuk gunahan ningkaam tulung, tugtugun bi jaꞌ lawang Tuhan, boꞌ bi binukisan.

Batan sagannap ina ma maku pa Tuhan, mastiꞌ binuwanan jaꞌ. Sagannap ma miha, mastiꞌ nammu jaꞌ. Maka sagannap ma nugtug, mastiꞌ binukisan jaꞌ sina lawang ninsila.

“Na sagannap ma pakale ni siga tōꞌ ku, boꞌ tud bean da du, malaingkan halul-akka sila. Sibuꞌ du karuha da ka jama bay buwat lumaꞌ pagon makoy tehang mehe boꞌ kinalihan palawom sampay sinoksokan lagi batu mehe-mehe.

“Pooy-pooy karomanan bi meꞌ jama buwat kaam, subay meꞌ naa du meꞌ bi buwat sila. Bong siꞌ ina inaa na bean bi, malaingkan sibuꞌ du ka lay na bogbogan bi mimon saraꞌ Nabi Musa sampay siga tōꞌ kanabi-nabihan.”

Boꞌ lawang kiput ina, san dikiꞌ lān na maka dangkitiꞌ du jama nūs, tumiluꞌ baw sila pa jawom kasampulnaan nyawa ma yaꞌ luu katapusan na.

Yuk si Isa lagi, “Bong kam doman tabeꞌ pa jawom pamarinta Tuhan, talpaksaꞌ subay kam pingkaꞌ man lawang kiput. Batan lawang mehe ina, san luha lān na ka meka jama nūs, tumiluꞌ baw sila pa jawom kabinasahan.

Na bong kaam manusiyaꞌ ma ndang dusahan pandoy muwan pabuwatan ayad ni anak bi, labi na Mmaꞌ bi Tuhan ni sulgaꞌ saꞌ pandoy muwan ga pakaradjaan ayad ni sagannap ma maku niiya.

Maka yuk si Isa, “Daa kam os-os manding jama pa kalaatan taggahaꞌ kaam na baw pasīng binanding pa kalaatan. Batan pooy-pooy jaꞌ ina meꞌ bi manding jama, meꞌ naa du sina meꞌ Tuhan ka pagkahi bi manding kaam. Bong nnaꞌ ta pa sukatan bohas, pooy-pooy sukatan pakoy bi ni pagkahi bi, meꞌ naa du sina sukatan pinakoy ningkaam.

Sugaꞌ sagannap ma pakale ni siga tōꞌ ku, boꞌ yaꞌ du bean da, malaingkan kulang pamiki da. Sibuꞌ du karuha da ka jama matangge lumaꞌ na taꞌ ungus sadjaꞌ.

Ongoy taggahaꞌ takita bi boboꞌ-boboꞌ jawom mata soheꞌ bi, pagka batang ni mata bi yaꞌ san paruli bi? Yaꞌ sina sikatuwaꞌ magtuyuꞌ kam ngalakkahan boboꞌ-boboꞌ ni mata soheꞌ bi, bong masi luu batang ni mata bi.

“Iyakin kam ni siga jama ma magbawuꞌ-bawuꞌ tukang masampay ga umanat man Tuhan. Ndaꞌ mata ina dambuwaꞌ mukalnaꞌ sila ka kaam. Boꞌ ko, sarī njawom atay da. Bong ina kam yaꞌ jaga, sibuꞌ du sina mintu karuha bi ka baanan bili-bili ma bay katis sinalik meꞌ idoꞌ tawun. Takila bi jaꞌ sina kadari da ni kawul-piil da meꞌ karuha poon kayu takila ni buwaꞌ na. Yaꞌ sina kam koleꞌ buwaꞌ anggul atawa buwaꞌ igira ni poon kayu itingan.

Tiyap-tiyap poon kayu mahap, mastiꞌ mahap du buwaꞌ na. Sugaꞌ bong poon kayu maat, mastiꞌ maat du buwaꞌ na.

Bong poon kayu mahap, yaꞌ luu buwaꞌ na maat. Damikiyan, bong poon kayu maat, yaꞌ du luu buwaꞌ na mahap.

Boꞌ mimon ina poon kayu ma yaꞌ luu buwaꞌ da mahap, mastiꞌ tinabbongan jaꞌ boꞌ tinunu.