Popular Bible Verses from Luka 11

Share

Nge enu vavapi mwatachikiza mwakuhanyina vana venu mawana amwenemwene, Senu wamwilu mwahambakananyi chikuma kuhana vyaShipilitu Wajila vaze navamulomba!

Kaha nangumilweza ngwami, Lombenunga, kaha navamihana; tonda-tondenunga, kaha namuwana; ngongomwezenunga, kaha navamisokolwelako.

Mwomwo weshowo eji kulombanga eji kutambulanga, kaha ou eji kutonda-tondanga eji kuwananga, kaha ou eji kungongomwezanga navamusokolwelako.

Kaha Yesu avambile ngwenyi, Omu namulomba, ambenu ngwenu, Ove Setu, lijina lyove valijililenga. Wangana wove wizenga.

Tukonekele milonga yetu yashili, Mwomwo nayetu nawa tweji kukonekelanga weshowo ali namukuli nayetu. Kaha kanda ututwala mwakutweseka chakuvulumwisako.

Kulya chetu chakutamo chahalikumbi, tuhanengacho hakumbi hakumbi.

Liso lyove likiko linongo lyamujimba wove. Shikaho nge liso lyove lyalikangule, kaha namumujimba wove mwosena namumunyika kanawa. Oloze nge lyaviza, kaha namumujimba wove mwosena namupwa milima.

Naumwe wauchi mwawika linongo nakulihaka mwakuswamana, chipwe kulifwikila mumbángo, oloze mwalihaka hachitumbikilo chalyo, mangana vaze navengila vamone zwalala.