Popular Bible Verses from Matius 13

Share

Ampo' yatone' banne ang dondong di tampo malompo sihapanne' tau ang unghingngi Kaheba Mapia anna napepähängngi si'da-si'dai. Lambi' mala keboa ma'luhpi'-luhpi'; aha ang pentallumpulo luhpi, aha ang pengngunnumpulo luhpi' anna aha ang pensangngatu' luhpi'.”

Yatone' banne ang dondong tama di alla' lohpo kedui sihapanne' tau ang unghingngi Kaheba Mapia, ampo' semata umpihki' supu katuhoanna anna pemala mendahi to makaka. Lambi' yato Kaheba Mapia ang puha nahingngi tihimpi' yaling di inahanna lambi' dai mala memboa mapia.

Noa indee: yato banne ang dondong pano di lalang sihapang tau ang untahimbo kaheba didiona Kapahentaanna Puang Alataala, ampo' dai napähäng. Lambi' sule Pongkahana setang anna nahampa'i yato aka ang puha natahimbo ang tiambo' sihapang banne yaling di inahanna.

Yatone' banne ang dondong di tampo ang di haho batu sihapanne' tau ang unghingngi yato Kaheba Mapia anna tahpa napatamang di inahanna sitonda kakahsiang, ampo' yato Kaheba Mapia ang nahingngi dai mengnguhaka' yaling di inahanna lambi' dai mala masae tohho yaling. Aka' mane ungngolai sanghupa kamasuhsaang bahtu' kamadahhaang aka' yato Kaheba Mapia, ya' darang natähäng anna ungkebo'i Puang Alataala.

Napatahhi' bumi Puang Yesus umpa'tula'i pahsikolana naoatee, ”Kapahentaanna Puang Alataala sihapang kulle ang tilamung yaling di tampo ang nalambi' mesa tau ampo' nalamung sala bou sumule tama yato di ongeanna. Ampo' aka' kahsi si'da-si'da yato tau ang mallambi', dianto anna le'ba'mi do umbalu'i asang ingkänna aka siamo ang aha naampui, mane ungngallii yato tampo ang naongei tilamung yato kulle.

Ampo' aha toe' piha banne ang manaho naung di tampo ang malambu. Yato banne tuho manahpa nei' lambi' keboa. Boana yatoo aha pentallumpulo luhpi', aha pengngunnumpulo luhpi' anna aha pensangngatu' luhpi'.”

Diare' pabei tomande'mi lobo' toe' yato lohpo ang takekuna sibaha pahe lambi' tempo pepaheang. Doneke'to ke la dipepaheng, mane kuoainte tau ang la mampepahe: Himpung toboia' nei' ne mating lohpo ang takekuna, ba'ba'-ba'ba'angngii mane untunuii tama di api. Puhaitoo ya' unghimpung tungnga'ne' ne pahe anna umbe'beiingkä'ne' tama di loko mapia-pia.’ ”