Popular Bible Verses from मरकुस 13

Share

होर तुस्से मेरे पर विस्वास रख्हा ऐं इधी कठे सभी लोका तुस्सा किन्हें बैर करणा। पर जो आपणे मरणे रे टैमा तक मेरे पर विस्वास करघा, तेसरा ई उद्धार हूंणां।”

जागदे होर प्रार्थना करदे रैहया, क्यूंकि तुस्से नी जाणदे कि से टैम केभे आऊंणा।

जेबे तिन्हा तुस्से बंदी बनाई कर लई जाणे, ता पैहले ले फिकर नी करणी कि आस्सा क्या बोलणा। पर जो कुछ बोलणा हून्घा, से तुस्सा जो तेस ई टैम दसी दितेया जाणा। क्यूंकि बोलणे वाल़े तुस्से नी ऐे, पर पवित्र आत्मा ई।”

आसमान होर धरती टली जाणे, पर जो मैं बोली दितेया, से पूरा हुई किन्हें रैहणा।”

“तेस ध्याड़े या तेस घड़ी रे बारे मन्झ कोई नी जाणदा, ना स्वर्गदूत होर ना मह्ठा; पर सिर्फ बापू जाणहां।

होर जेबे तुस्से लड़ाई, होर लड़ाईया री गल्ला सुणघे, ता डरदे देख्या; क्यूंकि इन्हारा हूंणां जरूरी आ, पर तेस टैम अंत नी हूंणां।

इधी कठे जागदे रैहया, क्यूंकि तुस्से नी जाणदे कि घरा रे माल्का केभे आई जाणा, सांझा या आधी राती, या कुकड़ा री बांग देणे रे टैमा या भ्यागा। एह्ड़ा हुई सक्हा कि जेबे तेस अचानक आऊंणा ता हुई सक्हा कि तुस्से त्यार नी हो। होर जो हांऊँ तुस्सा किन्हें बोल्हा, तेह्ड़ा ई सभी किन्हें बोल्हा: जागदे रैहया।”

क्यूंकि एक जातिया दूजी जाति रे बरखलाफ, होर एक राज्या दूजे राज्या रे बरखलाफ लड़ाई करणी, होर कई जगहा पर हिलण हूंणे, होर अकाल पौऊणे, ये ता सिर्फ पीड़ा री सुरूआत ई जिहां बच्चे रे जन्मा रे टैम एक जनाने जो कस्ट हुंहाँ। पर एता ले बी ज्यादा कस्ट हल्ली आऊणें बाकि ऐं।”

पर जरूरी आ कि पैहले खुसी री खबर सब जातिया रे लोका मन्झ प्रचार कितेया जाए।

क्यूंकि बौह्त लोका मेरे हका मन्झ आऊंणा, होर तिन्हा बोलणा कि, ‘हांऊँ मसीह आ,’ होर तिन्हा बौह्त लोक भरमाणे।

“पर तुस्से आपणे बारे मन्झ चतन्न रैहया, क्यूंकि लोका मेरे चेले हूंणे री वजहा ले तुस्से गांऊँआं रे पंचायता मन्झ सौंपणे, होर तुस्से यहूदी सभा मन्झ मारे पिटे जाणे; होर हाकमा होर राजे रे अगे सज़ा रे कठे खड़े हूंणां पौऊणा, ताकि तुस्से मेरे बारे मन्झ गुआही देई सको।

क्यूंकि झूठे मसीह होर झूठे नबिया आऊंणा, होर तिन्हा चिन्ह होर चमत्कार दसणे, होर हुई सके ता परमेसरा रे चुणिरे लोक भी भरमाई देणे।

“तिन्हा ध्याड़े, ‘तेस दुःखा ले बाद सूरज काला हुई जाणा, होर चांदा भी नी चमकणा, होर आसमाना ले तारे पऊंदे लगणे, होर आसमाना री सक्तिया हिल्लाई जाणी।’