Popular Bible Verses from Annefesu 4

Share

Nkhale oorerihana, o'kiriri, nlevelelanaka ntthu ni nkhwawe, toko Nluku culevelenlyaweni mwa Kristu.

Nkhale owiiyeviha ni upisa nrima, nvilelanaka ni nifento.

Nihikhume nuulumo noonanara wamalakuni winyu, nanso nikhale noorera, noolipiha nrima toko wamphaveliyaya, wiira avahiye nnema ale aneewa.

Cukhaleni uttayi, icuku cothene, urusiya, uviruwa ni itwaana, makufuru ni coonanara cothene.

Nrusiyeke nanso nhikose; nihikele ncuwa nnarusiyene, ni nhinvahe Sotwani nipuro.

Mwaha weekhuruwano, kinwiirelani munrule ntthu okhalayi, notankanyaa nlattu woottharatthara citthu coothepya, ni mananna owuupuwela winyu akhale onaanano, ni mummware ntthu onaanano, pattusiye nlikaniho na Nluku, nsariyani ni muttakattifuni ookhuma nkhwelini.

Mwaavye na ankhili othene wiira nsunke wo'salama umoca wo muNnepani.

Ni yooyo haavaha akina ukhala amitthenka, akina ukhala minapiyu, akina ukhala alalyeeri, akina ukhala ahakheli ni akina ayo aalimu, aphavelaka waatthenkemanihaca atthu attakattifu, wiira avare nteko awe ni itekiye irutthu ya Kristu, mpaka othene wanhalehu uphiya nlipa no'mooca no nroromelo ni uncuweleeha mwana a Nluku, mpaka uphiyera nlopwana eekhweli, vano ninaahala wunnuwa toko Kristu n'unlikanana uyo.

Commo, wiira nihikhale tho toko asaana, oorecihaciya miphantte cothene, nikakhaciyaka mmaceresere ni iphyoo co meetthuciho, ampankelelaya atthu oolavilavi wiira yaakosihe akhwaya. Nanso nittharaka ikhweli ni nifento, nunnuwe wo citthu cothene mwa Kristu ri muru.