Popular Bible Verses from Yohanes 6

Share

Yesus bilang pa dorang, “Kita ini no tu roti yang bole beking orang dapa hidop kekal. Sapa jo yang datang pa Kita, dia itu so nyanda mo lapar lei, kong sapa jo yang percaya pa Kita, dia itu so nyanda mo aus lei.

Manusia nyanda mungkin mo dapa hidop kekal pake dia pe kekuatan sandiri, cuma tu Roh Kudus yang bole beking manusia hidop kekal. Tu kata-kata yang Kita da bilang ini, ini samua kata-kata dari Roh Kudus kong kata-kata ini lei yang kase hidop kekal.

Ngoni jang cuma bakarja for mo cari makanan yang mo abis deng mo busu, mar ngoni brusaha jo for mo dapa tu makanan yang nyanda mo busu kong bole beking ngoni dapa hidop kekal. Tu makanan itu Anak Manusia mo kase pa ngoni, lantaran Tuhan Allah so kase kuasa pa Dia.”

Soalnya ini tu Kita pe Bapa pe mau: Dia suka supaya tiap orang yang lia pa Dia pe Anak trus percaya pa tu Anak, dorang itu mo dapa hidop kekal kong nanti di hari kiamat, Kita mo se hidop ulang pa dorang.”

Yesus manyao pa dorang, “Ini tu Tuhan Allah pe mau for ngoni mo beking: percaya jo pa Dia yang Tuhan Allah da utus.”

Samua orang yang Bapa so kase pa Kita, dorang itu mo datang pa Kita. Kong sapa jo yang datang pa Kita, Kita nyanda mo tolak pa dia.

Simon Petrus manyao pa Dia, “Tuhan, torang mo pigi pa sapa lei? Cuma Tuhan pe firman yang bole se tau pa torang bagimana torang mo dapa tu hidop kekal.

Kita ini tu makanan yang so turung dari sorga, tu makanan yang bole mo se hidop pa manusia. Sapa jo yang makang tu makanan ini, dia bole mo dapa hidop kekal. Kong tu makanan yang Kita mo kase itu, itu no tu Kita pe badan yang Kita mo kase pa samua orang di dunia ini supaya dorang bole hidop.”

Nyanda ada orang yang bole datang pa Kita kalu Bapa yang da utus pa Kita nyanda bawa tu orang itu pa Kita. Kong Kita mo se hidop ulang tu orang yang Bapa da bawa pa Kita itu di hari Kiamat.

Soalnya tu makanan yang butul itu no tu roti yang Tuhan Allah da kase turung dari sorga, kong tu makanan yang butul itu bole mo beking manusia di dunia ini mo dapa hidop kekal.”

Kita ini tu makanan yang beking orang bole hidop kekal.

Yesus ambe tu roti itu, Dia bilang makase pa Tuhan Allah trus Dia se berbage pa dorang yang da dudu di situ. Bagitu lei Dia da beking deng tu ikang-ikang itu, kong dorang makang sampe kanyang. Waktu dorang samua so jadi kanyang, Yesus bilang pa Dia pe murit-murit, “Kumpul jo tu makanan yang da talebe supaya nyanda ada tu tabuang.”

Waktu dorang so bapanggayung de pe jao kira-kira lima ato anam kilometer, dorang lia Yesus da bajalang di atas aer da pi badekat ka prao, kong dorang jadi tako skali. Mar Yesus bilang pa dorang, “Nyanda usa tako! Ini Kita.”