Popular Bible Verses from Matayo 6

Share

Do geunu ber mono Ajakanut ka Rubanga kede poore mere, di en eko bino mino wu gi nogi dedede.

“Pi mano, kur iparunu kop me diki, pien diki da bino bedo kede par mege kame make. Wek ceng acelacel bed kede peko mege kame make.

“Pi mano, ango awaco ne wu be, kur ibedunu kede par pi gikame ibinunu camo, arabo gikame ibinunu mato pi bedo kuo, amotoko pi gikame ibinunu ngapo. Mam kuo pire tek kalamo cam, doko kom da mam pire tek kalamo giangapa?

Do kame in iyaro lego, dony i agola ni di iko cego ekeko iko kwac but Papa ni kalikame neeno. Di Papa ni kame neno gi dedede kame in itimo i mung ko bino culi.

Pi mano, ka iyarunu ilega, kwaunu kaman: “Papa wa kame tie i malo, nyingi bed me awora. Ajakanut ni bin; wek tim i lobo gikame in imito, bala kite kame kotimo kede i malo.

Miwa tin cam wa me buli ceng.

Sasiro wa ki dub wa, bala kite kame wada osasiro kede jo kame timo ne wa kirac.

Kur iwek wa opot i atama, do gwok wa ki gikarac.

“Pien ka in isasiro jo ki dub gi, Papa ni kame tie i malo da bino sasiro in.

Nenunu ber winy me obar; gin likame kicuo kodi, akadi kac, akadi coko cam i dere, do Papa wu kame tie i malo mio gi cam. Mam wun piru tek kalamo winy?

“Kur ikanunu abar wu i wi lobo kan, kakame ajekel kede nyal dubo gi kiye, kede kakame jokuwo turo di kiko kwalo. Do kanunu abar wu i malo kakame ajekel kede nyal likame dubo gi kiye, kede jokuwo da likame twero turo di kiko kwalo. Pien kakame abar ni tie iye en kame cunyi da bino bedo iye.

“Likame tie ngatamoro kame twero timo tic ne jodongo are, pien ebino maro ngat acel di eko dagi ngat ocelu; aso ka li, ebino moko i kom ngat acel di eko weko ocelu. In likame ikaruno tic ne Rubanga kede bobo ne abar da.

Do ka Rubanga tubuso lum me obar, lum kame tin kuo, diki di oko wango gi i mac, iparunu be likame ebino ngapo wun kalamo? Okwecunu wun jo kame yei wu nonok!

Do ka itie mino ngacan gimoro, kur imi cingi tetu ngodal ngei gikame cingi tetu cam tie timo, tetekeny wek ebed gi me mung, di Papa ni kame neno gikame in itimo i mung ko bino mini giamia me pwoc.

“Gwokerenu kur itimunu tice wu kabeco i nyim jo be tetekeny gin kinen wu, pien mano bino mino likame iudunu giamia me pwoc kibut Papa wu kame tie i malo.

“Doko ka itienu kanyo kec, kur imiunu nyimu bedo di pek bala kite kame joecuke timo kede. Pien gin kiloko cal me nyim gi be tetekeny jo apat ngei be gin kitie kanyo kec. Ateteni awaco ne wu be, gin kitieko udo giamia gi. Do ka itie kanyo kec, wir wii kede mo, doko di iko lwoko wangi da, tetekeny jo apat kur ngei be in itie kanyo kec, do Papa ni kalikame neeno en kame ko bino neno. Di do Papa ni kame neno gi dedede kame in itimo i mung ko bino mini giamia me pwoc.